E lo mester cumpli cu condicionnan specifico sino ta bay bek sera
ORANJESTAD (AAN) – Dialuna mainta Corte Superior a atende e apelacion di R.Danies contra su condena di Maart 2021. Ta asina cu tratamento di e caso no a sigui door cu Danies no tin abogado. Na Augustus 2021 ora cu e caso a bin dilanti pro forma, Danies a laga sa cu e no kier mas su abogado pasobra e no ta confia e abogado.
Hof a pidi Procurador General (PG) pa check pa Danies haya un abogado pero e no a logra. PG ayera a splica Hof cu el a instrui e comision na KIA cu ta encarga cu abogado pero 8 abogado a bisa cu nan no ta disponibel. A check tambe cu Orden di Abogado, pero ningun reaccion.
HOF A ACUTA
Hof a mustra cu tin un serie di acusacionnan contra Danies y a puntra con lo mester sigui ora cu Danies wordo laga liber. No por ta asina cu si Danies wordo laga liber lo por tin problema atrobe cu Danies cu Polis. Hof ta haya cu mester stop cu esaki. Danies a bisa cu e ta compronde cu den pasado e tabata haci malo y a papia cu un Procurador General pero no compronde e Hulandes eleva cu a papia cun’e. El a manda un carta pa Ministerio Publico caminda mustr’e cu no por haci keho di e forma aki.
Hof a mustra cu segun raport di Reclasering, Danies mester di guia. Danies ta mustra riba su combersacion di PG. Hof a bis’e cu Reclasering no tin nada di haci cu PG. Segun Danies e ta confia den Reclasering pero no ta kere den e fundacionnan. E ta blo menciona e combersacion cu e tabatin cu PG anterior.
DANIES TA CONFIA PG
PG a mustra Danies cu el a sinta basta den KIA y Reclasering y Respaldo ta dispuesto pa yuda Danies pa e cuminsa di nobo. Hof a puntra PG con e ta mira e situacion cu Danies mester di tratamento pasobra e no ta bon di cabez. Hof a menciona articulo 499 di ley penal cu ta duna Hof e poder pa tuma decision riba e situacion mental di Danies y asistencia di abogado. Lo por lag’e liber. PG a bisa cu pa laga Danies liber lo mester tin un plan con lo bay atende cun’e na Respaldo y Reclasering. E lo mester atene su mes na palabracionnan y si e no ta cumpli, e lo mester bay atrobe KIA pa caba di sinta su castigo.
Danies a bisa cu si PG dicidi cu e lo mester tratamento di psychiater e lo sigui esey.
DANIES LIBER OTRO LUNA
Hof a pospone e caso un rato pa bay pensa con lo bay sigui. Despues di basta rato nan a bolbe y a dicidi cu lo aplica e articulo 499 di ley penal cu ta podera Hof dicidi riba e situacion mental di Danies. Nan ta haya cu no por trata su caso y cu e mester di asistencia di abogado. Tambe ta importante pa e drenta contacto cu Reclasering. Tabatin un miembro di Orden di Abogado y Hof a haci peticion pa percura pa Danies haya un abogado cu lo wordo aproba door di Hof. Orden di Abogado lo mester notifica Hof riba esaki.
Hof a dicidi cu 11 October 2021 pa 9.30 di mainta, Danies ta haya su libertad condicional. Esaki bou condicionnan: No por haci cosnan contra ley. Mester sigui indicacionnan di Reclasering y hasta si esey ta nifica cu e lo mester haya tratamento na Respaldo.
