Caso di La Linda
ORANJESTAD (AAN): Den edicion di Landscourant van Aruba di 24 di Maart 2023, e curator den e caso di La Linda NV na Aruba, esta abogado mr. De Cuba, a manda pidi via un anuncio, cu nan ta exigi presencia di algun compania procedente di e isla di St. Kitts & Nevis, pa nan presenta na Aruba.
Curator a pidi pa un representante di e compania Tepworth Limited, Ltd. pa presenta den Corte pa asina nan duna contesta riba e preguntanan den e caso di bancarota di herencia di Haim Rudolf Hochman. Tambe a pidi un representante di e compania Zabonti Ventures Ltd. di St. Kitts & Nevis tambe pa presenta den Corte na Aruba.
E fecha cu a ser duna pa atende cu esaki tabata Diabierna 5 di Mei 2023 pa 10’or di mainta. Esaki ta debi cu Curator kier bay pidi bancarota di e dos companianan aki na St. Kitts & Nevis.
Representantenan di e famia Hochman di La Linda na Aruba, esta Aaron Hochman y tambe señora Omaira Britten a busca representacion di Abogado mr. Zara. Esaki ta prome biaha cu famia directo a busca abogado, desde cu e tata Haim Hochman a fayece.
Abogado a keda asombra cu e heredero mes di Hochman, esta Aaron Hochman no a wordo informa di e formalidad di Diabierna mainta den Corte. Ta via di Landscourant a haya sa.
Hecho ta cu e herencia di Haim Hochman a wordo declara bancarota, pero e herederonan ta Aaron Hochman y su ruman muher Bilhah Hochman. Pues sigur nan tambe tin interes den e asunto aki di pidi bancarota di e dos companianan na St. Kitts & Nevis.
Segun abogado mr. Zara, hecho ta cu e companianan Tepworth Limited, y tambe Zabonti Ventures Limited ta forma parti di e boedel aki di companianan lanta pa Hochman. Pues abogado mr. Zara ta sinti cu nan por a dun’e un volmacht pa e representa e companianan di St. Kitts & Nevis.
Sinembargo, Diabierna mainta e Huez cu a atende e caso a opina cu abogado mr. Zara mester a bin cu volmacht di companianan Tepworth Limited y tambe Zabonti Ventures di St. Kitts & Nevis, y a dicidi tambe cu e yiu homber Aaron Hochman no por duna volmacht pa abogado mr. Zara representa nan.
Despues di esey, Huez a saca e famia heredero di Hochman y nan abogado mr. Zara afo. Unavez cu nan a sali, e ora Huez a sigui atende e caso hunto cu Curator solamente. Esey ta loke abogado mr. Zara a yama como “un wega”, como cu ta Curator so ta bay trece un banda di medaya so di e storia, djis pa purba haya Huez declara tanto Tepworth Limited y tambe Zabonti Ventures como bancarota.
Corte haciendo algo legal of no: Sinembargo segun abogado mr. Zara, e dos companianan Tepworth Limited y Zabonti Ventures no ta entidadnan estableci na Aruba. Pues un Corte na Aruba no por asina facil bay declara dos compania estableci na otro isla como ‘bancarota’.
Fuera di esey, loke Huez a haci cu e famia di herederonan Hochman riba Diabierna mainta a laga un sabor amargo atras, y ya caba famia y abogado ta pensando di entabla algun Caso Sumario pa trata na yega na un solucion.
Abogado a declara cu defunto Haim Hochman, ora cu su mama a fayece, e dama a nombre ‘testamentair executeur’. Señora Omaira Britten a mustra riba algun cos cu Haim Hochman a haci como testamentair executeur, y señora Hochman a dun’e cinco aña pa e haci e trabao. Cinco aña a caba, y segun corte di Aruba, e “trabao” no a wordo haci, y consecuentemente nan a retir’e for di e puesto ey, anto a haci abogado mr. Jeannot de Cuba prome como testamentair verificateur y despues a bira curator.
Nan ta mira cu abogado mr. Jeannot de Cuba como curator tin mas cu 8 aña ocupa cu e asunto aki, y ainda e no por a reparti nada. Loke tin di wordo reparti aki ta herencia di señora Anna Hochman. Nan tin’e “pega” riba e boedel di Haim Hochman. Abogado ta haya cu mester yega na un solucion pa e asunto aki.
