E no ta worde haya culpabel di desfalco manera Fiscal mes a bisa
ORANJESTAD (AAN): Diahuebs mainta e funcionario di Brandweer, O.A., a presenta den Corte pa scucha sentencia di Hues di Corte den Promer Instancia.
Luna pasa tratamento di e caso a tuma lugar caminda Fiscal a bisa Hues cu no por prueba cu O.A. a haci desfalco pero si cu O.A. a destrui e laptop door di delete informacionnan. El a exigi un multa di 400 Florin.
Diahuebs mainta, Hues a bisa nada di e acusacion di desfalco, cual ta nifica cu a kita e acusacion ey for di mesa. Hues a haya O.A. culpabel di a delete informacionnan for di laptop di Brandweer.
E acusacionnan cu Fiscal a presenta luna pasa den sala di Corte contra O.A. ta:
(*) Desfalco di dos laptop na trabao den e periodo di 23 October 2020 y Januari 2021.
(*) Tambe ta acusa O.A. di destruccion di e dos laptop.
No por proba desfalco: Luna pasa Fiscal a bisa cu 23 October 2020, ora a prohibi O.A. drenta Brandweer, e lo mester a entrega e laptopnan pero no tin ningun carta cu ta bisa esey. El a mustra cu e carta di 6 Januari 2021 ta bisa O.A. cu e mester entrega e laptopnan.
Fiscal a bisa cu e no ta haya cu por papia aki di desfalco. El a mustra cu O.A. a bisa cu e kier entrega e laptopnan. O.A. ta bisa cu e no a kita informacionnan di e laptop HP. Na opinion di Fiscal, tin experto ta bisa cu O.A. a limpia e laptop nobo. E otro laptop tabata daña.
Segun Fiscal, door cu O.A. a entrega laptop cu un potchi cu scrufnan ta crea impresion cu a mishi cu e hard drive. O.A. a bisa cu e kier a haci e laptop limpi y cu e laptop tabata traha. Experto a bisa cu e laptop no tabata traha. Fiscal a bisa cu O.A. a instala cosnan personal den e laptop siendo cu e sa cu e laptop ta di Brandweer.
Fiscal ta haya proba cu O.A. a destrui e laptop di Brandweer. El a exigi un multa di 400 Florin y si no paga esaki. O.A. mester bay 8 dia sera. Fiscal a sigui bisa cu for di e multa, mester kita e 3 dianan cu O.A. tabata sera, na rason di 50 Florin pa dia. Esey ta nifica cu mester kita 150 Florin for di e multa di 400 Florin.
Sentencia: Hues a bisa cu e ta haya O.A. culpabel di a delete informacion pertenece na Brandweer for laptop HP. Hues a bisa cu e ta rechaza e parti di defensa cu mester declara Fiscal no admisibel pasobra a haci cosnan cu no permisibel durante investigacion entre otro e interogacion a sosode na oficina di Recherche.
Hues a bisa cu esey no ta considera violacion di norma. Hues a bisa cu O.A. mes a bisa cu el a delete informacion. Hues tambe a bisa cu e testigonan a bisa cu a delete informacionnan.
Hues a confirma e exigencia di Fiscal. El a condena O.A. na un boet di 400 Florin y si no paga esaki, e lo mester bay 8 dia sera. For di e 400 Florin ainda mester kita 150 Florin cu ta e 3 dianan cu O.A. tabata cera.
