Abogado mr. Carlo ta señala --- ORANJESTAD (AAN): Diabierna Corte di Husticia a trata via video conference e caso pro forma contra e sospechoso di asesinato di John ‘Poentje’ Castro, esta e Anderson Rasmijn.
Tabatin discusionnan hopi interesante di parti di e abogado mr. Carlo, kende su peticion pa laga psychiater determina e estado mental di su cliente, a keda honra.
E abogado su punto di bista riba esaki ta cu si psychiater determina cu Rasmijn no ta compronde pakico e ta sera como sospechoso, lo mester laga Rasmijn liber. Por a constata cu Hues a reacciona bisa cu no ta laga Rasmijn liber.
Interoga y laga liber: Abogado mr. Carlo a mustra cu su cliente Rasmijn, na 2011 a worde deteni y interoga relaciona cu e caso di asesinato di Castro y a worde laga liber.
Na opinion di e abogado, e tempo ey tabatin video y tur interogacion a worde graba pero no tabatin ningun prueba cu ta Rasmijn ta envolvi.
Habri investigacion pa un declaracion: Durante tratamento di e pro forma, Hues a mustra cu Rasmijn lo tabatin un saco den cual e tabatin e arma. DIARIO a puntra mr. Carlo tocante esaki y e abogado a splica cu Hues kiermen e declaracion di G.M., e promer sospechoso cu a worde deteni 6 September 2021.
E abogado a bisa cu a base di e declaracion ey y supuesto tipnan cu a drenta despues di e anuncio di Ministerio Publico na April 2021, un biaha mas ta punta dede riba su cliente Rasmijn.
Influencia di prensa: Abogado mr. Carlo a bisa Hues cu e ta haya masha straño cu apenas el a keda apunta como abogado, ya prensa a yame. E ta haya cu e caso aki ta worde influencia door di prensa.
Fiscal a bisa cu tin libertad di prensa y ta keda na cada un pa publica. Fiscal a admiti cu prensa ta influencia e caso pasobra 10 aña no tin nada di e caso y comunidad kier sa kico a pasa. E ta haya cu ni Fiscal, ni Hues ni abogado por haci algo contra esaki.
Hues a bisa cu na interes di e investigacion e ta pospone e caso pa 16 Februari 2022. E caso lo ta pro forma pa haya sa kico psychiater ta pensa di Rasmijn.
Riba e potret por mira abogado mr. Carlo.
