ORANJESTAD (AAN): E homber R. (23) di Sint Maarten biba na Aruba, diabierna mainta a presenta dilanti Hues pa e caso penal cu Ministerio Publico a cuminsa contra dje.
Fiscal ta haya R. culpabel di a abusa di un mucha muher di 14 aña durante un periodo largo y a saca e mucha aki na estado y cu e mucha entretanto a haya yiu. R. ta insisti den Corte cu e mucha a bis’e cu e tabatin 18 aña y cu e no tabata sa cu e mucha tin 14 aña.
Den sala di Corte por a mira familiarnan di R. pero e mucha muher mes no a presenta. Fiscal bisa cu R. ta wordo acusa cu entre Augustus 2021 y 13 Juli 2023, el a abusa di un mucha muher di 14 aña.
-Scucha combersacion di mucha den Corte
Abogado mr. G. Sjiem Fat prome cu tratamento di e caso a cuminsa, a cuestiona cu no por saca afor di e documentonan, cuanto aña e mucha tin. Hues a bisa cu enberdad no tin ningun informacion di edad di e mucha den e documentonan. Fiscal a presenta cu copia di paspoort di e mucha pa Hues y abogado. Riba e paspoort por saca afor cu e mucha ta naci 24 October 2008.
E abogado a mustra cu tin un combersacion entre mama di R. y e mucha caminda e mucha ta pretende cu e tin 16 aña. E ta haya cu R. por a duda den e edad. Hues a bisa cu lo ta bon pa scucha e combersacion. Abogado mr. Sjiem Fat cu su cellular den man poni na un microphone a bisa cu e combersacion ta di 24 Juli 2023. Por a scucha e mucha ta bisa e mama di R. cu e tin 16 aña. E mama di e sospechoso ta bis’e cu tin indicacion cu e tin 14 aña. E tempo ey parce cu e mucha lo tabata na estado y a haya e baby.
-Mama a introduci mucha na sospechoso
Den Corte, R. a desmenti e periodo cu e ta wordo acusa di a abusa di e mucha. El a bisa Hues cu entre Augustus y September 2022 e tabata cu e mucha. El a bisa cu el a conoce e mucha door cu e mucha su mama ta traha hunto cu R. na un hotel den housekeeping. Segun R., e mama a introduci su yiu na R. y a bisa cu e mucha lo ta bon pa R. R. a bisa Hues cu ta e mama a duna R. e whatsapp di e mucha. Na September 2022, R. a bay cas di e mucha. Despues nan a sali y tabatin relacion sexual. El a bisa cu nan tabata stima otro y e mucha ta bisa cu e tabatin 18 aña. R. tabata duda si di berdad e mucha tin 18 aña. Hues a bisa cu na 2022, ainda e mucha tabata 14 aña.
-Mucha di 14 aña na estado
Segun R. ora e mucha a sali na estado, el a sospecha cu algo a pasa pasobra KZP a detene. Hues a bisa cu na Polis, R. lo a bisa cu e mucha tin 16 aña. R. a bisa cu na December 2022 el a bin haya sa cu e mucha no tabatin 18 aña. Na KZP el a declara cu ora e baby a nace, el a haya sa cu e mucha tin 16 aña. Na Januari 2022 e mucha a bis’e cu e ta na estado. R. a spanta y a bisa cu e no tabata prepara pa esey. E mama di e mucha tampoco no tabata kier pa e mucha haya yiu pero e mucha si kier tin un yiu. Den Corte R. a bisa Hues cu e ta duda cu e ta tata y kier haci DNA pa ta sigur. El a bisa cu el a cumpra cos pa e mucha pa e baby. Riba preguntanan di Hues, R. a bisa cu e tabata sospecha cu e mucha tabatin relacion cu otro homber.
Durante interogacion por nota cu R. tabata cu wowo yen di awa. Ta asina cu e no tin relacion cu e mucha pero ta para responsabel si e ta e tata biologico. Actualmente e tin un otro pareha cu tin 21 aña.
-Fiscal
Fiscal a bisa Hues cu e ta haya cu R. ta culpable cu den e periodo Aug 2021 y Juli 2023 a abusa di e mucha. Fiscal a bisa cu Bureau Sostenemi a haci denuncia na KZP cu un mucha muher di 14 aña a haya baby y nan ta preocupa cu e mucha lo por deshaci di e baby door di entre otro bende. Tambe lo a tende cu R. y e mucha lo kier mata e mucha ora e nace. Fiscal a sigui bisa cu si bay tras di declaracion di R. cu ta na 2022 el a cuminsa tin relacion cu e mucha, esey no ta haci diferencia pasobra e tempo ey e mucha tabatin 14 aña. Fiscal a mustra cu R. tabata duda cu e mucha realmente tin 18 aña. E pasaporte di e mucha ta mustra cu e mucha tabatin 14 aña tempo cu nan tabatin relacion cu R.
Fiscal a bisa cu mucha mester wordo proteha pa tene relacion cu adulto. R.(23) ta tene relacion sexual cu mucha muher di 14 aña. Fiscal a menciona caso di e aña aki na Hulanda caminda un homber a abusa di un mucha di 14 aña. Corte na Hulanda a condena e homber na 22 luna di prison. Fiscal ta kere den un castigo combina pa asina R. haya guia di Reclassering. El a exigi 24 luna di prison di cual 15 luna ta condicional y 2 aña di prison. Fiscal a exigi pa R. cay bao guia di Reclasering.
-Abogado
Mr. G. Sjiem Fat a bisa Hues cu e ta haya importante cu ta e mama di e mucha a introduci R. na e mucha pasobra e ta haya R. ideal pa su yiu. R. a puntra e mucha cuanto aña e tin y e mucha a bisa 18 aña. R. tabata duda pero no a pensa cu e mucha tabata asina jong esta 14 aña. Nan tabata sali cu aprobacion di e mama. Despues di a haya sa cu e mucha ta na estado, R. a cumpra cosnan pa e mucha pero kier seguridad cu e baby ta di dje. Abogado a cuestiona e forma con a investiga e yamadanan entre R. y e mucha. Na opinion di abogado, net den e periodo December 2022, ora cu R. tabata sorprendi cu e estado di e mucha, esey ta usa den Corte. E abogado a remarca, pakico no a presenta e otro combersacionnan promer. El a mustra cu den e documentonan ningun caminda ta menciona edad di e mucha. Ta awor den Corte, Fiscal a presenta pasaporte cu ta mustra e edad di e mucha.
E abogado a bisa Hues cu ningun momento R. kier a abusa di e mucha. Nan relacion tabata voluntario. El a menciona un sentencia di 2017 di Corte di Husticia di Aruba, caminda un homber (41) a abusa di un mucha di 14 aña y a wordo condena na 18 luna di prison. El a pidi Hues pa tene cuenta cu tur situacion.
Hues a sera tratamento di e caso y a bisa cu 27 October 2023 lo tin sentencia.
