Abogado ta haya cu su cliente ta inocente
ORANJESTAD (AAN): Diabierna mainta e homber D.F. (36) di Hulanda y biba na Rotterdam, a desmenti cu el a tira riba un auto na Molen y cu 2 hende a resulta herida. Fiscal ta haya cu D.F. ta culpabel y a exigi 9 aña di prison. Abogado mr. D.Croes a bisa Hues cu su cliente ta inocente y cu ningun momento D.F. a tira.
TIRAMENTO
E acusacionnan cu Fiscal a presenta contra D.F. ta cu riba 21 Januari 2024 el a haci su mes culpabel di intento di mata. Fiscal a bisa cu D.F. a tira riba un auto cu consecuencia cu dos ocupante V.E. y M.E. a resulta herida. Fiscal tambe a bisa cu D.F. tabatin arma di candela den su poder. Tambe Fiscal a acusa D.F. di a destrui e auto door cu bala a dal den e auto.
Hues a haci preguntanan na D.F. caminda D.F. a bisa cu e tabata na Molen, pero no a tira. El a bisa Hues cu e ta un “rapper” cu a bin Aruba pa canta na un club. Despues di a canta, el a dicidi bay South Beach y despues Molen.
Segun D.F., na Molen el a bebe y el a topa algun hende cu ta contra cu loke e ta canta. El a bisa su amigonan pa nan bay for di e lugar. El a bay baño pa orina y na dado momento el a scucha tironan. D.F. a bisa cu e tabata cu algun amigo den un auto Yaris color cora. Hues a bisa cu lo a tira riba un Nissan March color roos den cual tabata V.E. y M.E. Segun D.F., e no conoce nan y no tin problema cu nan. D.F. a desmenti cu e tabatin arma.
PASA VIDEO DI TIRAMENTO
Hues a dicidi di pasa e video di seguridad caminda ta mira con e tiramento a sosode. Por a mira e parkinglot di Molen y autonan ta pasa, banda di e Toyota Yaris cora cu tabata para. D.F. tabata para pafo hunto cu amigo S. y hendenan tabata pasa den auto cumind’e. Den oranan di marduga, despues di 4’or, na dado momento e Nissan March a pasa bay. Despues ta mira D.F. ta cana bay para mas leu di parkinglot manera den un mondi. Despues di basta rato por mira e Toyota Yaris a bay busca D.F. unda e tabata para. Segun D.F., el a bay orina. Un rato despues por a mira 4 flash di tiro y despues ta mira D.F. ta cana bay pura na e Toyota Yaris. Hues a bisa cu na e Nissan March tabatin un impacto di bala y V.E. y M.E. lo a sufri rasca di bala.
FISCAL A BAHA PISA
Fiscal a bisa Hues cu ta un hecho cu tabatin un tiramento na Molen. E pregunta ta, kende a tira. Na opinion di Fiscal, por a mira riba video di seguridad tur loke a sosode riba e parkinglot. Polis ta conclui cu ta D.F. a tira riba e auto, ora e tabata para tras di e auto preto. V.E. y M.E. a sufri rasca di tiro. Fiscal ta haya legalmente proba cu ta D.F. a tira, aunke cu D.F. ta desmenti esey. Fiscal a sigui bisa cu por a mira riba e video cu un homber, un tal S., a saca algo for di su zij y pasa D.F. esaki. Despues e tiramento a sosode. Fiscal ta haya cu esaki ta intento di mata riba V.E. y M.E. Fiscal a bisa cu D.F. ta culpable di posecion di arma y a causa destruccion riba e auto cu el a tira ariba. Fiscal a mustra cu tabatin autonan para riba parkinglot y tabatin mas hende ta cana rond. El a bisa cu D.F. tin suerte cu nada mas serio a sosode.
Pa cu e castigo, Fiscal a bisa cu e ta tene cuenta cu D.F. a pone bida di hendenan na e parkinglot den peliger. E caso aki a sacudi comunidad y ta crea sentido di inseguridad. Fiscal a exigi 9 aña di prison, kitando e tempo cu D.F. ta sera den KIA.
ABOGADO
Mr. D.Croes a pidi Hues pa pasa e video di seguridad atrobe y el a bisa Hues cu ningun caminda ta D.F. a tira. Na opinion di e abogado, por a mira e homber S. lo a mustra D.F. algo y a pas’e pero despues D.F. a dun’e bek. E abogado a sigui bisa cu ora D.F. tabata para mas leu, por a mira flashnan y D.F. a cana bay pura na e auto cu a bay busc’e, pasobra el a kere cu ta riba dje nan tabata tira. Na opinion di e abogado, e flashnan no tabata unda D.F. tabata para. E abogado ta haya cu mester declara D.F. liber. El a bisa tambe cu e exigencia di Fiscal di 9 aña di prison, ta exagera. Hues a sera tratamento di e caso y a bisa cu dia 20 September 2024, e lo dicta sentencia.
