ORANJESTAD (AAN): E hoben A.S.H. di 19 aña riba Diabierna mainta a scucha Fiscal exigi 4 aña y 6 luna di prison p’e.
Fiscal ta haya A.S.H. culpabel di intento di mata y posesion di diferente arma di candela. Abogado mr. Griffith a bisa Hues pa tene cuenta cu tempo cu A.S.H. a tira e tabatin 18 aña y pa aplica e ley hubenil. Tambe e abogado a bisa cu A.S.H. no a tira intencional pa herida sino a actua den defensa propio. Den e articulo aki, DIARIO ta publica e punto di bista di Fiscal y den un otro articulo, e defensa di abogado.
Acusacionnan: Den sala di Corte tabata presente famia di A.S.H. o sea su mama y su rumannan. Fiscal a bisa cu e ta acusa A.S.H. cu riba 15 October 2023, el a tira riba algun persona.
Tambe Fiscal ta acusa A.S.H. cu entre 1 Augustus 2023 y November 2023, e tabata den posesion di armanan di candela y municion.
Armanan di candela: Hues a mustra cu na e cas na Sero Patrishi, unda A.S.H. ta biba cerca su mama, Polis a haya un revolver. Segun A.S.H. e arma supuestamente no ta tira. E arma tabata den un tas di A.S.H. E arma tabatin balanan aden. Polis a check e arma y e ta funciona. Polis a haci investigacion den cellular di A.S.H. caminda a mira diferente potret y video cu diferente armanan di candela cu A.S.H. tabatin den su man.
Segun A.S.H., un conoci a mustr’e diferente armanan y el a saca potret y video di e armanan pa mustra su amigonan. Segun A.S.H. nunca el a mira arma asina. Pa loke ta e revolver cu a haya na e cas, A.S.H.a bisa cu ta na October 2023 el a haya e revolver for di e conoci y e conoci a mustr’e e otro armanan.
Tiramento: Hues a mustra cu 15 October 2023 banda di 5’or di mainta banda di Olde Molen tabatin tiramento. Hues a puntra A.S.H. kico a pasa cu A.S.H. a tira riba un auto. Segun A.S.H., el a sali cu algun amigo y su ruman chikito. Nan a bay Gusto y na dado momento dos homber a pasa y un di nan a bisa: “tin bala pa boso”. A.S.H. a keda asombra y a puntra e amigonan si nan tin problema. E amigonan a bisa cu no. Despues nan a bay Olde Molen pafor. Na dado momento e mesun dos hombernan a sali for di Olde Molen y un di nan a bisa: “ora mi bolbe, bala lo cay”.
E ora ey A.S.H. a cana bay na un auto y a mira e hombernan den un auto Nissan March y bay unda su amigonan y su ruman ta para. El a bisa cu el a tende un tiro y hendenan a cuminsa core. E ora ey el a saca su arma y lo un tiro riba e auto. El a bisa Hues cu el a kere cu nan lo a tira riba su ruman cu tabata hunto cu otronan. Segun A.S.H. el a pensa cu ta esnan den auto a tira y a los un tiro. E no a wak kende a tira sino a tende un tiro. E ora ey a saca arma y tira. Segun A.S.H. e no a dirigi arma riba auto pa herida hende sino pa spanta.
Haya arma den parking lot: El a splica Hues, el a haya e revolver riba un auto den parking lot banda di Gusto. Despues di a tira cu e arma na Olde Molen, el a tira e arma afor.
Hues a bisa cu segun security di Olde Molen, a tende un tiro y hendenan a core drenta den Olde Molen. El a sali y haya sa cu un gay a tira riba un auto Nissan March. Tin otro testigo cu a mira A.S.H. tira y warda e arma den un tas.
Fiscal a haci serie di pregunta. A pasa video di seguridad y a puntra A.S.H. na unda el a haya e arma y despues na Molen a mustra na unda e tabatin e arma poni banda di un auto. Despues cu esnan a bisa cu ora nan bolbe bala lo cay, A.S.H. a cana bay na e auto y a coy e arma hinca den su tas. El a bisa cu el a coy e arma pasobra e no sa kico tabata nan intension. Fiscal a mustra cu A.S.H. a declara na Polis cu el a tira riba e man di un hende for di e Nissan cu a tira. Segun A.S.H., el a tira ariba di e auto y no riba e auto.
Hues a mustra cu Reclasering ta bisa cu A.S.H. mester di guia.
Fiscal no ta kere sospechoso: Fiscal a bisa Hues cu esaki ta un caso hopi serio. A.S.H. hunto cu su ruman chikito y algun amigo a bay sali. Den oranan di anochi, a sosode e tiramento banda di Olde Molen.
Fiscal a bisa cu e no ta kere A.S.H., cu el a haya un arma banda di un auto den parkinglot di club nocturno Gusto. Segun Fiscal, den Corte, A.S.H. ta duna otro declaracion compara cu loke el a bisa na Recherche.
Intento di mata: Fiscal ta haya cu for di inicio A.S.H. tabata cu e arma. Tabatin 4 hende den e auto Nissan March y mirando e distancia cortico for di cual A.S.H. a tira riba e auto, e chens tabata tey cu un hende den e auto por a muri. Segun Fiscal, for di video por mira cu A.S.H. a dirigi e arma riba e auto y a tira. Fiscal ta haya cu A.S.H. tabatin intension di tira mata. El a bisa cu na momento cu ta tira riba un auto riba un distancia cortico cu hende sinta aden, ta tuma e risico cu un hende den e auto por sali herida y muri. Na opinion di Fiscal, tur e testigonan cu a scucha, ta papia di a scucha un tiro so. Ningun ta bisa cu a scucha mas cu un tiro. Ningun ta bisa cu ta for di e Nissan a tira. Ta solamente A.S.H. ta bisa cu ta for di e Nissan a tira.
Problema grandi di arma: Pa loke ta posecion di arma di candela, Fiscal a bisa Hues cu ta alarmante e cantidad di casonan di arma di candela den hobennan y tiramento. Esaki ta crea inseguridad. Pesey Ministerio Publico ta baha pisa riba posecion di arma di candela. Pa cana cu arma riba caya ta 2 aña di prison. Pa intento di mata ta entre 5 y 6 aña di prison.
Fiscal a bisa Hues cu e no ta kere cu aki por papia cu A.S.H. a actua den defensa propio. No tabatin circumstancia cu ta mustra cu esey lo a sosode.
Castigo: Pa cu e castigo, Fiscal a bisa cu e ta tene cuenta cu A.S.H.(19) ta hopi jong. Pero mirando seriedad di e caso, el a exigi 4 aña y 6 luna di prison.
Hues despues di a scucha defensa di abogado a bisa cu e ta bay studia e caso y dia 15 November 2024 lo tin sentencia.
