Weert na yoramento a pidi Hues pordon
ORANJESTAD (AAN)– Diabierna mainta Rudy “Elvis” Weert (61), a scucha Fiscal exigi 12 aña di prison p’e. Na yoramento el a pidi Hues pa pordon y a pidi comunidad pordon. Weert a expresa cu Fiscal ta pint’e manera un monster pero e no ta un monster.
Manera DIARIO a publica, ayera mainta tratamento di e casonan penal contra Weert a tuma lugar. Tabatin e caso di e acusacionnan di violacion di un mucha G. tempo e tabatin 14 aña y e caso di e dos yiunan muher di su actual pareha cu ta data di 2012 pa 2019. Den e articulo aki, DIARIO ta concentra riba e caso di e dama G., kende actualmente ta bibando na Hulanda y tin 27 aña.
VICTIMA A HACI DENUNCIA FOR DI HULANDA
Ta asina cu via video conference e dama G. tabata sigui e caso for di Hulanda. Durante tratamento di e caso a sali na cla cu G., despues di a sigui un serie di tratamento na Hulanda, a dicidi di haci denuncia na autoridad di Aruba, contra Weert.
Dia 20 Februari. 2019 e dama G. (27) biba na Hulanda a haci denuncia contra Weert. El a bisa cu Weert ta un abusador y e kier pa sera Weert pa stop di abusa di muchanan jong
VIOLA MUCHA
E victima ta declara cu tempo e tabatin 14 aña el a bay keda drumi cu su mama na cas di Weert. G. a keda den un otro camber y Weert a bay mishi cu su pechonan y e no bisa nada. El a bay papia cu e mama riba esaki pero no a bisa kico tabata pasando. G. tabatin miedo di Weert, kende tabata menace. Cada biaha cu G. tabata su so, Weert tabata manipula pa G. pa tene relacion sexual cun’e. G. a bisa cu e no tabata virgin pero no tabata activo. G. a splica con Weert tabata force pa tene relacion sexual na diferente lugar, den auto, den mondi y den apartamento. E no a bisa su mama pasobra su mama tabata enamora cu Weert y e mama lo no kere. G. a bisa cu Weert tabata manipul’e tur ora. Tempo e tabatin 15 aña, el a sali na estado di Weert.
Weert a ordena G. pa haci normal pa e mama no sa. El a bay na un ginecologo, cu entre tanto a fayece y a constata cu G. tabata 4 luna na estado. A haci abortus. Despues G. (17) a bolbe sali na estado. Weert a dicidi cu e mes ta bay haci e abortus. El a hinca un hangua den G. su parti intimo pa asina G. saca e yiu. G. cu a haya hopi dolor, a bay cu su mana dokter caminda dokter a primi e barica y despues el a bay baño y a saca un klompi. Segun G., despues di e di dos abortus, el a nenga di sigui tene relacion sexual cu Weert. Weert a pone G. satisface y e tabata pag’e 10 florin. Net promer cu G. a bira 18 aña el a conoce un gay y a ali for di cas.
SOSPECHOSO ADMITI
Ta asina cu Weert a admiti di a tene relacion sexual cu mucha y tambe cu a haci abortus. Di dos biaha ta Weert mes a haci’e pasobra Weert a bisa cu G. no por haya baby. Hues a lesa mensahe whatsapp di G. pa Weert caminda Weert a bisa cu el a enamora di G. y e sa cu el a haci malo di abusa di G. G. a bisa cu Weert tabata menace y no kier a stop. Weert a bisa cu e tabata stima G. masha hopi y pesey no kier a perde. G. a bisa cu e tabata sinti’e malo pasobra e tin relacion cu Weert siendo cu Weert ta cu su mama. Weert a bisa cu nan tur dos ta fout, un mas cu e otro. Weert a admiti cu e no a haci bon di tene relacion cu G. tempo e tabatin 14 aña. G. a bisa cu Weert a us’e manera e ta haya ta bon y tabata menaza G. pa no bisa nada. G. a bisa Weert cu el a haci’e hopi dolor. A confia Weert manera un tata pero Weert a abusa di e confianza. Weert a bisa cu e asunto aki ta traha ainda riba dje.
Hues a bisa cu Weert a declara cu e tabatin relacion cu e mama y despues G. Desde 10 Mei 2021 e ta deteni.
ACTITUD NARCISTA
Raport di psicologo riba Weert ta conclui cu Weert tin actitud narcista, anti social pero no pedofile. Ademas ta alcoholico. E psicologo ta mustra cu Weert no ta mira cu e ta fout y ta egoista. E ta mustra cu Weert tin suficiente inteligencia pa sa kico ta bon of malo. Pero door di su actitud narcista, e no ta mira e consecuencia cu e ta causa. Psicologo ta haya cu pa un parti Weert no ta responsabel pa su actonan. E ta haya cu Weert mester haya ayudo obligatorio pa stop tene relacion cu muchanan. E psycologo a bisa cu Weert tin trauma di cosnan cu lo a pasa cun’e den internaat na Curacao.
FISCAL
Fiscal a bisa cu e caso ta relaciona cu abuso di tres menor di edad. For di 2012 e caso a cuminsa ora e tata B. a haci denuncia. E mama di e muchanan no kier haci denuncia pasobra e ta haya cu su yiunan ta gaña. Door di e situacion ey, e tempo ey no a cuminsa un caso penal. No tabatin pruebanan di sosten y e pareha B. a separa di otro. Na 2019, G.(27) a haci denuncia contra Weert, despues di a sigui terapianan. E mucha G. tabata wak Weert como un tata y Weert tabata abusa di su posicion y abusa di G. Weert tabata manipula G. y pone presion pa tin relacion sexual. E casonan di abortus riba G. ta mustra seriedad di e caso caminda Weert ta laga su interes mas importante cu esun di e mucha. Ta Weert a bay acerca e dokter y a convence e mucha pa haci e abortus.
Pa loke ta e rumannan B. ta despues di a haya e resultado final di e investigacion, a dicidi di inclui e denuncianan aki. Loke nan a pasa ta cuadra cu loke a pasa cu e dama G. Door di e denuncia di G. y cu Weert a admiti por usa esaki den caso di e muchanan B., pasobra tin e mesun forma di actua. Tur e victimanan tabata yiu di e pareha di Weert. Tur e victimanan a wordo mishi y despues penetra. Weert a bisa tur e muchanan cu nan no por bisa nada.
CASTIGO
Fiscal ta haya cu aki tin violacion di 3 mucha entre 14 y 16 aña. Ademas 2 abortus. Como padastro mester a distancia su mes pero a tene relacion cu muchanan cu ta yiu di su partner. Fiscal ta haya cu mirando seriedad di e casonan aki exigi 12 anja.
WEERT TA PIDI PORDON
Weert a bisa cu si sigui exigencia di Fiscal, e lo Sali for di KIA cu su 72 aña y kico lo bay pasa cun’e. El a cuminsa yora y bisa cu ultimo 3 aña e no ta bebe. E ta orguyoso pa esey. El a bisa cu e tin 10 aña di relacion y ta duda cu su partner lo bay sinta warda 12 aña. E ta realisa cu el a haci malo pero awor e ta wordo pinta como un monster pero e no ta un monster. E ta desmenti di a mishi cu e muchanan B. El a bisa cu ta duele loke haci. El a pidi Hues pa pordon y a pidi pordon na comunidad. El a bisa Fiscal pa lesa Mateo 14 y 15 di Bijbel. Segun Weert, el a reforma su mes den oracion. El a bisa cu Dios ya a pordon’e.
Hues a sera tratamento di e caso y a bisa cu dia 18 Februari 2022 pa 8.15 lo tin sentencia.
