Dilanti Huez awor Fiscal a exigi castigo combina
*Ademas e ta wordo acusa di falsifica recibo pa 5 aña largo
* Fiscal special di Curaçao a bin pa atende e caso
ORANJESTAD (AAN): E muher di inicial M.G. di 52 aña di edad a presenta dilanti Hues di Corte di Husticia di Aruba pa duna cuenta pa e delito cu el a haci. E ta wordo acusa di a malversa 4300 florin na Ministerio Publico y falsificacion di recibo entre 1 Januari 2017 y 31 December 2021. Fiscal a exigi castigo combina.
Malversa placa: Ta asina cu un Fiscal di Curacao a bin Aruba special pa trata e caso aki. M.G. a admiti di a malversa placa. Hues a puntra M.G. kico el a haci. M.G. a conta, cu el a haci hendenan cu e conoce fabor di hiba e placa di pago di boet pa nan na Ministerio Publico, caminda e ta traha den e administracion. Pero e pagonan no a sosode. M.G. a bisa
Hues cu e tabata pasando den un situacion financiero hopi dificil. El a keda cu e placa pa paga su debenan en vez di paga e boetnan. Pa tapa e situacion, el a haci cambio den computer di Ministerio Publico pa mustra comosifuera e hendenan aki a paga nan boet. Pero e forma con el a haci’e no tabata corecto y asina a bin descubri esaki.
Fiscal a mustra cu 10 persona supuestamente a paga nan boet, pero esakinan no ta aparece den e sistema. M.G. a admiti di a tuma placa di 5 persona cu e conoce pero e otro personanan e no sa kende nan ta.
Situacion financiero hopi dificil: Ta asina cu M.G. na 2018 a gana un premio miyonario di Lotto. El a splica cu el a usa e placa aki pa paga su debenan, cumpra un auto y traha su cas. E no a keda cu nada di placa. Su situacion financiero a bira dificil pasobra su casa no ta traha y e tin un yiu malo. Actualmente M.G. ta suspendi, pendiente resultado di e caso penal.
Exigencia di Fiscal: Fiscal a bisa Hues cu a keda legalmente proba cu M.G. a comete malversacion. Na opinion di Fiscal esaki ta un caso hopi serio caminda M.G. a haci mal uso di su funcion trahando na Ministeiro Publico.
Fiscal a exigi 240 ora di trabao pa comunidad y si M.G. no cumpli cu esaki e lo mester bay 120 dia sera. Ademas Fiscal a exigi 3 luna di prison condicional, cu un tempo di prueba di 3 aña.
Abogado: Abogado mr. Hart a bisa Hues: “Mi cliente no por dera tur e mortonan den Ministerio Publico.” Na opinion di mr. Hart, su cliente M.G. ta admiti di a haci un fayo. Mr. Hart a bisa Hues cu loke su cliente M.G. a haci ta malo. Pero ni e promer acusacion, ni di dos, por wordo proba. Na opinion di mr. Hart, M.G. no a falsifica recibo pasobra ta den computer el a haci e cambio. Y e no a malversa placa di Ministerio Publico pasobra nunca e placanan a yega Ministerio Publico.
Ademas, e abogado ta haya cu su cliente M.G. a wordo hopi castiga publicamente ora cu den media a publica su potret y su nomber y Ministerio Publico tambe a saca un declaracion. E abogado a remarca cu den un caso similar den otro departamento no tabatin publicacion.
Hues despues di a scucha e punto di bista di Fiscal y e punto di bista di abogado, a sera tratamento di e caso y a bisa cu e ta bay studia e caso y dia 29 September 2022 lo tin sentencia.
