Mastercard a bati alarm na un banco
ORANJESTAD (AAN): Diabierna mainta e hombernan Z.V.D. di 45 aña di Bulgaria, y e Dominicano J.B. di 40 aña biba na Aruba, a presenta den Corte pa e caso penal cu Ministerio Publico a cuminsa contra nan. Nan ta wordo acusa cu entre 8 November 2024 y 20 December 2024 a falsifica credit cards y horta for di ATM Machinenan di Banco di Caribe.
Hues a pospone un caso: Hues a mustra cu Polis a reconoce J.B. na e ATM Machine via camera di seguridad. Hues a bisa cu el a anuncia cu e kier raport extra di Polis tocante e reconocimento di e acusado J.B. Hues a remarca cu den e raport actual, no ta indica riba cual imagen a reconoce J.B. y con por a reconoce J.B. Tambe Hues kier sa si den pasado a conoce J.B.
Ta asina cu ainda e raport aki no ta cla. Fiscal a bisa cu si Hues ta insisti riba raport, mester pospone e caso. mr. Canwood a bisa Hues cu e no tin nada contra pa pospone pero cu J.B. mester wordo laga liber. El a bisa cu J.B. a desmenti di ta envolvi. Fiscal a reacciona cu tin motibo di peso y e no ta haya cu mester laga J.B. liber.
J.B. a bisa Hues cu e no conoce Z.V.D. y no tin nada di haci cu e caso.
Abogado mr. Emerencia di Z.V.D. a bisa Hues cu den e caso aki e reconocimento di J.B. ta importante pasobra ta acusa su cliente di ta hunto cu un otro. El a bisa cu mester pospone e caso di Z.V.D. y pa laga Z.V.D. liber. El a mustra cu e otro acusado di inicial K. a wordo deporta y condena na 8 luna di prison.
Fiscal a reacciona cu no por laga Z.V.D. liber. El a bisa cu te awor Z.V.D. tin 5 luna y esey no ta hustifica castigo pa loke el a haci.
Por a compronde cu tabatin un otro Bulgaro K. y el a wordo deporta su siguiente dia. Parce cu tabatin un fayo di parti di husticia. Ta asina cu K. a wordo condena na 8 luna di prison.
Hues a pospone e caso contra J.B. pa e haya e raport cu e kier. Hues a stipula 10 April pa 8.30’or di mainta lo trata e caso. Hues a rechaza e ponencia di abogado mr. Canwood pa laga J.B. liber. Hues a bisa cu tin mas agentenan di Polis cu a bisa cu nan ta reconoce J.B. Hues ta haya cu tin motibo di peso. Hues a bisa cu J.B. ta keda encarcela.
Pa loke ta Z.V.D., Hues a bisa cu e resultado di J.B. no tin nada di haci cu e caso di Z.V.D. Hues no ta mira motibo pa trata e casonan hunto. Hues ta sigui cu e caso di Z.V.D.
Masha hopi transaccion haci: Ariba pregunta di Hues, Z.V.D. ta para riba cu e tin un Mastercard y no a usa Banco di Caribe. Hues a mustra cu un empleado di Banco de Caribe a bay Polis y bisa cu a haya notificacion di Mastercard cu tin hende di Europa a uza pin sospechoso na Aruba. E momento ey 24 mil Florin a wordo saca cu carchi cu ta falsifica. Via camera di seguridad a mira cu tin tres hende, cada vez ta usa e mashin di ATM. A haci investigacion y compara e potret di pasaporte y a reconoce Z.V.D. y K. Ta asina cu K. ta un amigo di Z.V.D. y nan a bin hunto Aruba.
Hues a puntra Z.V.D. kico nan a bin haci na Aruba. Segun Z.V.D., nan a bin pa turismo pa casi 3 luna. Hues a bisa cu e otro sospechoso di inicial K. entre tanto a wordo castiga cu 8 luna di prison y a wordo deporta caba. Polis a haya den maleta di Z.V.D. 3 t-shirt cu ta cuadra cu imagen di video. A mira tambe cu Z.V.D. tin un tattoo na su man y e ta cuadra cu e tattoo cu Z.V.D. tin.
Segun Z.V.D. e no ta compronde, pasobra Banco de Caribe no a verifica e carchi. Con Banco de Caribe ta paga siendo cu no mester a paga. A usa bancomatico na diferente lugar. Hues a bisa cu Mastercard a manda Banco de Caribe un lista di transaccionnan cu a wordo haci cu e carchi. En total a haci 115 transaccion y a lanta en total 80 mil Florin.
Ta asina cu e carchi ta falsifica y e doño di e carchi a notifica cu e no ta na Aruba. Esey a haci cu Mastercard a reacciona pa evita cu lo sigui saca mas placa. Ta asina cu Z.V.D. ya tin 167 dia sera den KIA.
Fiscal a exigi 8 luna di prison: Fiscal ta haya cu Z.V.D. ta culpabel di haci transaccion for di diferente ATM Machine di Banco de Caribe. Fiscal a bisa cu Mastercard a notifica Banco de Caribe riba esaki. Na opinion di Fiscal, esaki ta producto di skim credit card. Tabata usa code cu a copia for di otro carchi y asina tabata saca placa. A resulta cu doño di e carchi a notifica cu e ta haya registro di gastonan haci na Aruba, siendo cu e no ta na Aruba.
ATM Mashin no a modifica: Fiscal a bisa cu door di e situacion di skimming, hopi banco rond mundo a modifica nan machine di ATM. Na Aruba solamente esnan di Banco de Caribe no a wordo updated y modifica y door di esey por a saca placa facil. Fiscal a sigui bisa cu riba imagen di video di seguridad a mira Z.V.D., J.B. y K. na diferente di e mashin di ATM di Banco de Caribe na Aruba. Z.V.D. ta desmenti pero Fiscal ta haya cu tin imagennan di video caminda ta mir’e ta saca placa for di e ATM Machines.
Fiscal ta considera esaki un organizacion criminal internacional cu ta planea pa copia credit cards di hende y asina traha credit card falso. Z.V.D. y K. a bin Aruba cu e intension pa saca placanan. Fiscal a bisa cu Z.V.D. tabata envolvi den 11 transaccion caminda a haci mal uso di e fayo den e systema di ATM Machine. Fiscal a exigi 8 luna di prison pa Z.V.D.
Abogado: mr. Emerencia a bisa Hues cu Z.V.D. ta desmenti di a horta placa di ATM Machine. E abogado ta haya cu no tin prueba. Na opinion di abogado, e sospecho no ta suficiente demostra. No tin suficiente sospecho di parti di Banco de Caribe. E abogado ta haya cu Mastercard a mustra movecionnan sospechoso pero sin prueba. E hecho cu Z.V.D. tabata na ATM Machine, no kiermen cu el a haci transaccion ilegal. E abogado a conclui cu mester declara Z.V.D. liber.
Hues a sera tratamento di e caso y a bisa cu dia 6 Maart 2026 lo tin sentencia.
