ORANJESTAD (AAN): E homber di inicial E. di 25 aña, Diabierna mainta den sala di Corte a bisa Hues cu e tabata sa cu e mucha muher tabatin 15 aña y tabatin relacion sexual cun’e.
El a bisa cu e tabatin bon intensionnan cu e mucha muher pero cos no a bay manera el a kere.
E acusacion cu Fiscal a presenta contra E., ta cu e tabata tene relacion sexual cu un mucha muher di 15 aña entre Maart 2021 y 18 Juni 2022. Tambe Fiscal ta acusa E. di tabatin potretnan porno y video di mucha.
Tene relacion cu mucha: Hues a puntra E. si e acusacion ta berdad. Aki e homber E. a bisa Hues cu el a tene relacion sexual cu e mucha muher y tabatin un plan pa casa cun’e y tin yiu. Despues di tempo el a ripara cu e mucha no ta serio.
Segun E., e mucha muher tabatin relacion cu otro homber mas bieu cu E. Tabatin discusion riba e asunto ey, y aki E. a bisa cu e lo bay bisa e mama. E mama a tum’e como un menaza pero segun E. no ta asina.
Segun E. e no tabata na Aruba na Maart 2021 manera ta acus’e. E tabata na Santo Domingo pa rehabilitacion di adiccion di droga y na November 2021, el a bin Aruba. For di Santo Domingo e tabata tin contacto cu e mucha muher via Facebook. E homber E. a bisa Hues cu e tabata sa cu e mucha muher tabata entre 15 y 16 aña. Hues a bisa cu E. mester sa cu esey ta castigabel pa ley aunke cu E. tabatin intension serio.
Segun E. el a kere cu debi cu e tabatin 23 aña e tempo ey, esey no ta castigabel. Hues a bisa cu segun ley, ora e mucha tin 16 aña, e por dicidi cu ken e kier tin relacion.
Hues a mustra cu segun declaracion di e mucha, e no tabata kier tin relacion cu e homber E. E mucha a bisa cu ta E. ta esun cu a forza pa tin un relacion. Segun E. si ta asina, e mucha lo no tabata pidi’e pa busk’e na school diferente biaha y hasta a bay keda pasa anochi cerca E. Segun E., su wela dos biaha a bay busca e mucha na school.
Potret y video pornografico: Ta asina cu ta sospecha cu E. a saca potret di e mucha muher y graba video. Segun E., ta e mucha mes a manda e potretnan y nan dos a dicidi pa haci un video con nan tin relacion sexual. Hues a puntra E., pakico el a haci esey. E. a bisa Hues cu e no a pensa cu e asunto aki lo bay asina leu. E. a bisa cu el a manda e video pa e mucha.
Na dado momento e relacion a kibra pero E. a purba drecha e relacion diferente biaha te na mas o menos Juni 2022.
Fiscal a haci preguntanan na E. si el a realisa cu e mucha ta menor di edad. Segun E. el a realisa esey pero no a pensa cu cos lo bay asina leu. Segun E. a splica, e tabata adicto na heroina, cocaina y piedra pero despues di rehabilita, e sa usa marihuana. El a keda 1 aña y 9 luna na Santo Domingo. El a caba di studia na EPB y kier a bay Hulanda pa studia pa mecanico.
Fiscal: Fiscal a bisa cu e ta haya legalmente proba cu entre November 2021 te cu 18 Juni 2022, E. tabatin relacion sexual cu un mucha muher di 15 aña. Fiscal a bisa cu a base di e mensahenan cu E. tabata manda e mucha, e mama a bay Polis pasobra e mama tabata considera esakinan un menaza. Fiscal a bisa cu E. tabata sa cu e mucha tabata menor di edad.
Fiscal a splica cu e ley ta pa proteha muchanan menor di edad contra nan mes pa no bay haci cosnan cu despues nan ta lamenta. Tambe e ley ta pa proteha e mucha contra adultonan cu ta bay tene relacion cu e mucha. Fiscal a bisa enfatico cu e adulto mester ta conciente cu tene relacion cu un mucha no por. Fiscal a mustra cu entre E. y e mucha muher tin un diferencia di 8 aña y E. mester sa mihor.
Fiscal a bisa cu e hecho cu e mucha tabata kier tin relacion no ta haci cu no ta duna castigo. Segun ley, pa tene relacion cu mucha menor di edad, tin un castigo di 3 aña di prison. Pa cu e castigo, Fiscal a bisa cu e ta tene cuenta cu esaki a sosode durante un periodo largo. Fiscal ta haya cu lo ta bon pa E. haya guia di Reclasering pa e bolbe drenta den comunidad. Fiscal a exigi 3 aña di prison di cual 1 aña ta condicional y 2 aña di prueba. Esaki bou guia di Reclassering. E smartphone di E. lo keda confisca.
Abogado: Abogado mr. Paesch a bisa Hues cu E. a admiti tur dos acusacion. El a pidi Hues pa tene cuenta cu E. ta first offender. Tambe pa tene cuenta cu nan tabata gusta otro y pesey nan tabata saca potret.
El a pidi Hues pa condena E. na 6 luna di prison, cu ta e tempo cu E. ta sera den KIA y un castigo condicional.
Sentencia: Hues a pospone e caso un rato pa pensa y despues a dicta sentencia. Hues ta haya legalmente proba cu entre November 2021 y 18 Juni 2022, E. tabatin relacion sexual cu un mucha muher di 15 aña. Tambe Hues ta haya cu E. tabatin potret y video pornografico.
Hues no ta haya cu E. tin tendencia pedofil sino tabatin intension cu e mucha. Hues ta haya cu E. a duna claridad di e caso y no a duna impresion cu e tin tendencia pedofil.
Hues a bisa cu e ta kere cu E. lo bay haya e stempel di pedofil ora e sali liber y ta haya cu ta bon pa E. haya guia di Reclassering.
Hues a condena E. na 30 luna di prison di cual 10 luna ta condicional cu un tempo di prueba di 2 aña. Hues tambe a pone e condicion cu E. lo mester cay bao guia di Reclassering. El a bisa cu e smartphone cu potret y video lo keda confisca.
