Polis a detene djis pa el a presenta dilanti Hues
ORANJESTAD (AAN): Diahuebs mainta e homber H. di 51 aña, un Adicto Ambulante sin lugar di biba, a scucha Hues conden’e na 2 aña y 6 luna di prison, pa a viola un muher Adicto Ambulante tambe di inicial P. Apesar cu H. ta para riba cu e no a viola e muher P., kende ta su pareha, Fiscal y Hues ta hay’e culpabel. Ta asina cu door cu H. no tin lugar di biba y ta anda den San Nicolas, Fiscal a duna orden pa Polis deten’e Diaranzon pa asina ta sigur cu Diahuebs e ta presenta den sala di Corte.
Adicto Ambulante ta viola otro Adicto Ambulante: Fiscal a acusa H. di violacion y maltrato di e dama P. riba 19 April 2022. Segun H. e no a viola e muher P. El a bisa Hues cu e dama P. ta su pareha. El a desmenti di a dal y viola. Hues a bisa cu P. a declara na Polis, cu e tabatin relacion cu H. pero esaki a caba. El a bisa cu dia 19 April 2022, e tabata banda di edificio di AVP na San Nicolas y cu H. a bay riba dje y bis’e cu e kier tin sex cun’e.
- a bisa cu e no kier tin relacion. H. a dal’e mokete diferente biaha y a bis’e cu e no ta worry di bay sera. El a penetra P. di patras. Ta asina cu e mesun dia P. a bay Polis y haci denuncia. El a worde hiba ImSan y a constata cu e tin un herida patras di su orea, sla na cara y tabata traumatisa. E muher a bisa cu e ta sinti dolor y inflamacion na su atras.
Acusado ta nenga: Segun H., e no a haci nada. El a bisa Hues cu te ainda nan ta cu otro y nan tin relacion sexual normal. El a bisa Hues cu riba 19 April 2022, promer di tene relacion, nan a usa crack y na dado momento H. tabata kier mas y a rabia. Hues a puntr’e con P. a haya e slanan. H. a bisa Hues cu e no por bisa con P. a haya sla. Segun H., tur dia P. tin relacion cu otro homber. El a bisa Hues cu P. tabatin un homber cu ta maltrat’e cada biaha. Ariba pregunta di Fiscal, el a bisa cu e sa unda P. ta keda na un lugar bandona.
- a bisa cu diaranzon el a worde deteni pa Polis pa bin Corte. E no tabata sa di nada y cu P. tampoco. H. ta un adicto biba ariba caya. El a bisa cu e no ta haya placa di Gobierno. El a bisa cu e ta mendiga riba caya na San Nicolas.
Hues a bisa cu H. tin carchi castigo pero e ultimo 15 aña, e no a cay den man di husticia.
Fiscal: Fiscal ta haya legalmente proba cu H. a maltrata y viola e muher P. Fiscal a remarca cu H. a bisa cu te ainda e cu P. tin relacion sexual cu otro. Na opinion di Fiscal, ta un hecho cu dia 19 April 2022, H. tabatin relacion sexual cu P. Despues di esaki, P. a bay haci denuncia na Polis y a bay ImSan caminda a haci investigacion. Raport medico ta mustra cu P. a worde maltrata y viola. Fiscal a bisa cu e no ta kere cu esaki tabata un plan di P. pa denuncia H.
Fiscal a bisa cu segun orientacion di casonan di violacion, tin un castigo di 3 aña di prison. El a bisa cu mirando e tempo cu a pasa, el a exigi 30 luna di prison y pa detene H. di biaha hiba KIA.
Abogado: mr. de Sousa a bisa Hues cu e ta laga na Hues pa dicidi riba e hecho. El a bisa cu e ta comparti punto di bista di Fiscal cu hopi tempo a transcuri. Tambe el a bisa pa Hues tene cuenta cu hopi tempo H. no a cay den man di husticia.
- a keda para riba cu e no a haci nada malo y no ta culpable.
Sentencia: Hues a sera tratamento di e caso y a dicta sentencia di biaha. Hues a bisa cu e ta haya legalmente proba cu H. a maltrata y viola e muher P., aunke cu H. ta nenga. Hues a bisa cu e dama P. a haci denuncia na Polis e mesun dia cu el a worde viola. E mesun dia P. a bay ImSan pa laga haci investigacion. Hues a bisa cu segun orientacion di Corte e castigo ta 3 aña di prison. Hues a condena H. conforme e exigencia di Fiscal esta 2 aña y 6 luna di prison. Por a mira cu H. a baha cabez abao y tabata tapa su cara cu su mannan.
Pa loke ta e exigencia di Fiscal pa detencion di inmediato, Hues a bisa cu e no ta mira motibo pa duna orden di detencion di biaha. Esey ta nifica cu e miembronan di seguridad CEA a djis hiba H. patras y despues lag’e liber.
