Hues a confirma exigencia di Fiscal
- E politico y activista a droga mucha homber y abusa di dje
- John ta desmenti tur cos pero Hues no ta ker’e
ORANJESTAD (AAN): Diahuebs mainta Hues di Corte di Husticia a dicta sentencia den e caso penal cu Ministerio Publico a cuminsa contra e homber John D. de Haseth, kende ta wordo acusa di a droga y abusa di un mucha homber di 17 aña riba 23 Maart 2022. Hues ta haya de Haseth culpabel y a confirma e exigencia di Fiscal di 2 aña di prison.
John de Haseth di 56 aña, ta conoci localmente pa su participacion den e asina yama ‘Grupo 7’, y tambe na Juni 2021 a participa den eleccion y tabata riba lista di Partido PP (Pueblo Prome).
Acusado ta culpabel: Tratamento di e caso a tuma lugar algun siman pasa caminda John de Haseth (kende ta den libertad condicional aworaki), a para riba cu e no a haci nada.
Diahuebs mainta e acusado de Haseth no a presenta den Corte pa scucha su sentencia. Hues a bisa cu de Haseth ta wordo acusa di a abusa di un hoben homber menor di edad di 17 aña. Hues a bisa cu Fiscal ta haya de Haseth culpabel y a exigi 2 aña di prison.
Hues a mustra cu e victima a duna declaracion extenso con el a wordo abusa y con e cas di de Haseth ta paden. Polis durante investigacion na cas di John de Haseth, a haya e substancia conoci como ‘Rush’, cu ta un droga.
Hues a bisa cu de Haseth a bay busca e hoben pa traha cune. Na dado momento de Haseth a ofrece e hoben Rush pa e hole cu supuestamente lo dun’e forza. E hoben a bira tur marea y e momento ey de Haseth a bay riba dje y a cuminsa kita su carson. Apesar cu e hoben tabata bis’e pa stop, de Haseth a sigui y a chupa e parti intimo di e hoben. Despues di a abusa di e hoben, de Haseth a bay dun’e den auto pa haci algun respondi. E hoben na un cierto momento a mira chens pa baha for di e auto y core bay.
Hues a sigui bisa cu ora cu Recherche a check den e smartphone di de Haseth, na na bin haya mensahe caminda e ta papia cu un persona di e droga Rush, cu el a usa riba e hoben. Hues ta haya cu de Haseth a tacha integridad di e hoben y no a respeta e decision di e hoben kende a bisa pa stop.
Castigo: Hues a mustra cu durante tratamento di e caso de Haseth a keda desmenti y a purba pinta e hoben scur. Sinembargo Hues ta haya e exigencia di fiscal na su lugar y a condena de Haseth na 2 aña di prison. Esey ta nifica cu John de Haseth mester bay sera.
