Hues a rechaza cu bebida Four Loko a pone acusado perde cabez
ORANJESTAD (AAN): Diabierna mainta e homber S.J.H.M. di 34 aña a presenta dilanti Hues pa scucha su sentencia. Luna pasa tratamento di e caso penal di Ministerio Publico contra S.M. a tuma lugar caminda Fiscal a haya S.M. culpabel di a purba maltrata severo e dama v.d.B. pero no purba mata. Tambe Fiscal ta haya cu S.M. a maltrata e baby di 9 luna di e dama v.d.B., a maltrata e yiu di 1 aña y 11 luna di e dama v.d.B.. Tambe cu S.M. a maltrata un otro dama di inicial L. cu mokete na su cara. Fiscal a exigi 24 luna di prison di cual 6 luna ta condicional y 3 aña di prueba, bou guia di Reclassering.
Diabierna Hues a bisa cu e ta haya S.M. no culpabel di intento di mata y tampoco di a horta un smartphone y un cartera. Hues a rechaza e defensa di abogado mr. Zara cu door di e energy-drink “Four Loko” cu e dama v.d.B. a cumpra, y cu esey a pone S.M. perde cabez. Hues a condena S.M. na 18 luna di prison di cual 6 luna ta condicional y cu 3 aña di prueba.
Fiscal: Luna pasa, 12 Januari 2024, tratamento di e caso a tuma lugar caminda Fiscal a bisa cu ta S.M. mes a hinca su mes den problema den caso di maltrato di e dama v.d.B. door di bebe. Fiscal ta haya cu a base di raportnan medico, cu S.M. ta culpable di intento di maltrato severo. E no ta haya proba cu S.M. a choca v.d.B.
Fiscal a bisa cu tin raport medico cu ta mustra fractura di nanishi di v.d.B. Fiscal tambe ta haya cu S.M. a maltrata v.d.B. cu tabatin un baby di 9 luna den su man. Tin potret di e baby cu sla y raport medico ta mustra cu e baby a sufri sla ora v.d.B. a cay cun’e door di maltrato di S.M. Tambe e otro yiu cu ta 1 aña y 11 luna bieu a sufri dos bofta den cara.
Fiscal a sigui bisa cu S.M. a core tras di v.d.B. cu un cuchiu. El a bisa cu riba video di seguridad por mira S.M. cu algo ta blink den su man. Polis a haya e cuchiu tambe. Tambe Fiscal ta cu S.M. a coba den smartphone di v.d.B. y a horta un Debit Card di banco cu no por haya.
Fiscal a sigui bisa cu e dama L. tambe a haci denuncia di maltrato di S.M. El a sufri 2 wowo blauw. Na opinion di Fiscal, no por prueba e otro acusacion di L. na Maart 2023. El a pidi pa declara S.M. liber pa cu e acusacion aki.
Castigo: Fiscal a bisa cu ta trata aki di maltratonan severo haci door di S.M. Fiscal a tene cuenta cu ta un first offender. El a mustra cu tanto Reclassering como psycologo ta recomenda tratamento y S.M. mes a bisa cu e kier tratamento. Fiscal a exigi 24 luna di prison di cual 6 luna ta condicional cu un tempo di prueba di 3 aña.
Pa loke ta demanda di daño, Fiscal ta haya cu no ta suficiente argumenta e gastonan di v.d.B. Fiscal ta haya mesun cos pa L. El a pidi pa declara nan no admisibel cu e posibilidad pa cuminsa un caso civil.
Sentencia: Diabierna mainta Hues a bisa cu e no ta haya proba intento di mata y tampoco cu S.M. a horta un cellular y cartera riba 2 Maart 2023. Hues a declara S.M. liber di e acusacionnan aki. Hues ta haya legalmente proba e acusacionnan subsidiario cu riba 6 Juli 2023, S.M. a causa maltrato severo na e dama v.d. B. A dal’e cu mokete den cara. A maltrata e baby di 9 luna. Tambe a maltrata un mucha di 1 aña y 11 luna bieu.
Hues a sigui bisa cu S.M. tambe ta culpabel di a core tras di v.d.B. Hues a bisa cu e tambe ta haya legalmente proba cu na Januari 2023, S.M. a maltrata e dama L. door di dal’e mokete den cara. Hues a reacciona riba defensa di mr. Zara. Hues a rechaza e ponencia di e abogado cu e bebida ‘Four Loko’ a causa cu S.M. a perde cabez.
Pa cu e castigo, Hues a bisa cu e ta tene cuenta cu seriedad di e caso. Tambe Hues a tene cuenta cu Reclassering a mustra cu chens ta grandi cu S.M. lo ripiti. Hues a condena S.M. na 18 luna di prison di cual 6 luna ta condicional y 3 aña di prueba. Durante e 3 aña di prueba, S.M. ta cay bou guia di Reclassering.
