ORANJESTAD – E hombernan R.A.M. y S.J.P. a scucha Hues bisa cu nan ta culpable pa bende cocaina durante 1 aña.
Fiscal a exigi 2 aña di prison y Hues a condena nan na 1 aña y 6 luna di prison (18 luna).
BENDEMENTO DI COCAINA DEN RANCHO
Nan ta worde acusa cu entre 7 September 2019 y September 2021, nan tabata bende cocaina. Durante tratamento di e caso luna pasa, tanto R.A.M. como S.J.P. a desmenti di tabata bende cocaina. R.A.M. a bisa Hues cu e ta biba den Rancho y e sa unda ta bende droga. El a bisa Hues cu ta na e cas unda Polis a tene razia, ta caminda cu ta bende droga. El a bisa cu dia di e razia a detene esnan cu droga y nan no a bisa cu a cumpra droga for di R.A.M. S.J.P. a bisa cu e ta hopi den Rancho no pa bende droga sino ta bay serca su tanta, kende a lant’e.
EXIGENCIA FISCAL
Fiscal a mustra cu tin testigonan cu ta bisa di a cumpra droga for di R.A.M. y S.J.P. Fiscal a exigi 2 aña di prison pa cada un.
Ta asina cu tanto abogado mr. Illes como abogado mr. Bryson a cuestiona e hecho cu Polis ta usa choller como testigo. Nan a bisa cu e declaracionnan aki no ta confiabel.
SENTENCIA
Via video conference Hues a bisa cu e ta haya legalmente proba cu entre September 2020 y September 2021, R.A.M. y S.J.P. a bende droga.
RECHAZA DEFENSA
Hues a bisa cu di parti defensa a bisa cu e testigonan no ta confiabel pasobra nan ta adicto na droga. Hues si ta haya nan confiabel pero a bisa cu e ta tene cu cuatela e periodo cu nan ta bisa cu a cumpra droga.
Na opinion di Hues, e testigonan ta bisa basicamente cu durante 1 aña nan a cumpra. Hues a bisa cu e no ta haya proba cu pa un periodo mas largo manera cierto testigo a declara, R.A.M. y S.J.P. tabata bende droga.
CASTIGO
Pa cu e castigo, Hues a bisa cu e ta tene na cuenta cu durante 1 aña, e duo R.A.M. y S.J.P. a dedica na bendemento di cocaina. Cocaina ta malo pa salud y tin consecuencia pa esnan cu ta usa y comunidad. Dealmento di droga ta fomenta criminalidad. Esnan cu ta usa droga, ta bay haci delitonan pa asina yega na placa y cumpra droga. E duo aki a dedica na esaki pa haya ganashi.
Hues a condena R.A.M. y S.J.P. na 18 luna di prison, kitando e tempo cu nan ta sera caba den KIA. Hues a ordena tambe pa loke a confisca lo worde duna back.
