Fiscal ta haya cu esaki ta un asesinato sanger frieu ---
ORANJESTAD (AAN): Diahuebs Corte di Husticia a sigui cu tratamento di e caso penal contra Pascual Brown (22) kende ta wordo acusa di a tira mata Richi Henao Tavarez (20) riba 12 di April 2021. Esaki a sosode na Brazil.
TIRA MATA
Algun siman pasa a trata un parti di e caso y a pospone pa e raport di psikiatra. Durante tratamento di e caso algun siman pasa, Huez a bisa cu 12 April 2019 anochi, Polis a bay na Brazil caminda un hende a worde tira den cabez. Richi Tabares tabata sinta den veranda. Autopsia a mustra cu door di tiro den cabez. A haya bala den su cabez. Investigacion mustra cu e bala ta di un revolver Cal. 38. Bisiña di Richi tin camera y Recherche a haya imagennan di camera pa investiga. Nan a mira un Nissan March right-hand drive yega den becindario di e cas di Richi y por a mira e chofer. E persona tabatin un pechi cabey largo y a baha for di auto cu algo parecido na un arma den su man drechi. El a cana gebuk den direccion di cas di Richi. Despues e ta core bek gebuk drenta den auto y core bay.
RAPORT PSIKIATRA
Ayera Hues a lesa e raport di psikiatra. E psikiatra a bisa cu e raport di Reclassering no a trece cambio den su conclusion. Psikiatra a conclui cu Brown ta sufri di problema mental y esey a causa cu el a tira mata. Psikiatra den su raport ta mustra cu Brown por a haci otro ora e tabata tende stemnan ta papia cun’e. E por a bay papia cu otro hende. Hues a remarca cu Brown a bay haci e cos di mas malo cu un hende por haci esta kita bida di un otro.
EXIGENCIA FISCAL
Fiscal a bisa cu e ta concentra riba e caso di asesinato. El a mustra cu Richi (20) a wordo asesina y ta un dolor grandi pa e famia. Fiscal ta haya cu no tin ningun motibo pa Brown a tira mata Richi. Richi a wordo asesina door di su amigo. Richi no tin problema cu ningun hende. Tabata un sorpresa cu Brown ta yega na e cas na Brazil y tira mata Richi cu tabata sinta den veranda cu su pareha.
ASESINATO PREMEDITA
Fiscal a bisa Hues cu e ta haya cu premedita Brown a tira mata Richi. El a mustra cu segun sentencia di Corte Supremo e hecho cu e sospechoso tin un problema mental, no ta motibo pa bisa cu e no ta culpable. El a mustra cu Brown a sali for di Playa bay te Brazil. Na caminda el a haya un arma di candela. A dura 15 minuut promer cu el a yega na e cas. Fiscal ta haya cu Brown tabatin tur tempo pa para y bay bek. El a bay scondi na e cas pa no wordo mira. El a tira Richi mata y gebuk a core bay bek den auto.
ASESINATO SANGER FRIU
Fiscal ta haya cu esaki ta un ehempel di asesinato sanger frieu. El a señala cu tanto na Polis como den Corte, Brown tabata duna declaracion cu no ta cuadra cu e berdad. Esey ta mustra cu e tabata sa cu el a haci malo y ta purba sconde esey. Na opinion di Fiscal, asesinato ta un di e delitonan di mas serio. Brown mata Richi lagando atras un mucha chikito. Fiscal ta tuma Brown na malo pa loke el a haci. El a mustra cu Brown mes a bisa cu el a mira cu e partner di Richi a mir’e pero asina mes el a tira. Fiscal a remarca cu Brown no a mustra cu ta duel’e loke el a haci. Teniendo cuenta cu e raport di psikiatra, el a exigi 16 aña di prison.
ABOGADO
Abogado mr. Tromp a bisa Hues cu e ta haya cu mester declara Brown liber di asesinato. Na opinion di abogado, ta acusa Brown cu premedita a tira Richi den cabez. No tin siguranza cu door di e tira den cabez, a causa morto di Richi. Segun e abogado, no tin un raport di patologo cu ta mustra kico ta e causa di morto. El a mustra cu e victima a menaza Brown cu morto pasobra e ta sospecha cu Brown lo tin relacion cu su partner. Dia 12 April 2021, Brown tabata pisa bou influencia di droga y tabatin un cuchio cun’e. E kier a bay papia cu Richi pa soluciona e problema pero na caminda el a cumpra un arma. Na e cas, el a mira e partner di Richi y a los un tiro riba Richi.
E abogado a bisa cu Brown a bisa cu e no sa kico el a haci cu e arma. Na opinion di e abogado, no ta haya cu tabata e intension di Brown di tira mata. E tabatin un arma y no sa con pa tira. E ta haya cu Brown a perde cabez y a los un tiro. E momento ey, Brown no ta tabata su mes. E tabata paranoid manera psikiatra mes ta skirbi den su raport. Psikiatra mes ta bisa cu door di e paranoid, Brown a bay tira Richi. E abogado ta haya cu mester mira den forma critico e termino premedita. Brown a bisa cu el a bay pa papia cu Richi pa soluciona e problema. E tabatin un arma pero no pa tira mata. Brown a tira sin a mik. E no sa kico el a haci.
Brown a bisa cu diripiente el a mira e partner di Richi y nan tabata mira otro. Diripiente el a perde y un tiro a cay. Na opinion di e abogado, esey ta haci cu no por papia di premedita. El a remarca, con por papia di premedita siendo cu psikiatra ta papia di paranoid y cu Brown no tabata mira e realidad. E abogado ta haya cu Brown no ta responsabel pa loke el a haci. E abogado a conclui cu no por persigui of castiga Brown pa loke el a haci.
Fiscal a reacciona riba defensa cu ta mustra riba raport di psikiatra. Segun Fiscal e hecho cu Brown a sali pa bay na e cas di Richi no por papia di a perde cabez.
Hues a sera tratamento di e caso y a bisa cu dia 2 December 2021 lo tin sentencia.
