ORANJESTAD (AAN): Diaranson 8 juli 2026, den oranan di merdia, Hof di Corte Superior lo dicta sentencia den e apelacion di Alan Howell contra e castigo pa malversacion.
Dia 24 Maart 2023, Corte di Husticia den Promer Instancia a haya Howell culpabel y a conden’e na 24 luna di prison di cual 6 luna ta condicional, un multa di 35 mil florin of 120 dia sera y cu 15 mil florin ta keda confisca.
PG A EXIGI PA HOF MANTENE SENTENCIA
Tratamento di e caso a tuma lugar luna pasa caminda Procurador General (PG), a bisa Hof cu e ta exigi pa confirma e sentencia di Corte den Promer Instancia. PG a bisa cu e caso a cuminsa a base di e raport FIU caminda ta señala cu placanan cu fraccion di partido POR tabata haya di Gobierno, tabata bay riba cuenta di Howell. Investigacion a mustra cu mas cu 197 mil florin a wordo paga na otronan.
PG ta haya cu Howell y van Putten a malversa 154 mil florin. El a mustra cu Howell no tabatin declaracion satisfactorio pakico e tabata paga cash y no tabata transferi placa di e fundacion. PG a ripiti gran parti di e sentencia di Hues di Corte den Promer Instancia, pa mustra cu Howell ta culpabel y ta exigi pa mantene e castigo. PG a remarca cu despues di 3 aña, e defensa ta presenta un declaracion bou huramento. PG ta puntra con a yega na e declaracion aki. No por investiga esaki. PG a pidi Hof pa no acepta e declaracion aki. PG a bisa cu e no ta kere den e facturanan cu Howell a presenta. PG ta haya Howell culpabel di malversacion di mas cu 195 mil florin y falsificacion di facturanan. PG a pidi Hof pa confirma e sentencia di 24 Maart 2023.
ABOGADO NO TA HAYA CU TIN PRUEBA
Mr. Herrera, di Corsou, a bisa Hof cu e ta haya cu no tin suficiente prueba pa a condena Howell. El a mustra riba e declaracion di e ruman di Howell cu ta splica tur cos tocante pagamento cash. E abogado a bisa Hof cu Howell no a falsifica facturanan pa propio uso di placanan. Na opinion di abogado, e carta di FIU tabata informacion pa cuminsa investigacion. E abogado ta haya cu door di no a haya raport di MOT, a viola e derecho di Howell pa haya informacion pa abogado por haci investigacion. El a mustra cu a pidi PG diferente biaha pa haya raport MOT pero nada.
El a cuestiona e hecho cu Landsrecherche a cuminsa investigacion sin cu tin suficiente informacion y no kier duna e raport di MOT. E abogado ta haya cu mester kita tur e informacionnan di e investigacion. El a señala cu Hof den su decision den e proceso di investigacion, ta mustra cu e raport di FIU no ta motibo pa cuminsa e investigacion, siendo cu PG a uza e raport di FIU pa Landsrecherche haci investigacion.
E abogado a remarca cu FIU ta haya cu e transaccionnan di placa pa fraccion di POR, no por wordo uza pa otro cosnan. Howell ya ta haya un entrada. FIU ta haya remarcabel cu ta usando placanan di e fraccion pa paga otro cosnan. Abogado a mustra cu tin acuerdo firma entre fraccionnan y Gobierno pa cu uzamento di placanan di fraccion. Na opinion di abogado mr. Herrera, esaki ta mustra cu no tin un hecho castigabel. E ta haya cu Landsrecherche a bin cu acusacionnan cu no ta cuadra. E abogado ta haya cu a tacha e bon imagen di Howell.
E abogado a señala cu e rapport di Landsrecherche no tin nada otro cu e contenido di e raport di FIU y ningun investigacion! El a mustra cu e fundacion di POR a haya te na 2018 pago di fraccion cu forza retroactivo. El a bisa cu e pago na Fonso Advicesary, ta e tata di Howell tabata conseha Howell y Howell tabata paga su tata. Tin acuerdo entre fraccionnan y Gobierno cu e hendenan cu ta traha pa fraccion no mester declara na Belasting. E abogado a bisa cu ta increibel cu e dama F.B. cu a traha un calculacion pa trabaonan cu el a haci durante 2 aña, a bay bisa Landsrecherche cu Howell a force traha un carta, siendo cu el a bay di acuerdo pa traha un factura nobo.
E abogado a remarca cu e pagonan a wordo haci cash y no ta asina cu mester haci transferencia. Como tal no por bisa cu a falsifica facturanan. El a mustra cu Marisol Tromp tambe a pidi placa cash di fundacion. Segun e abogado, Marisol Tromp a bisa cu Gobierno a paga laat y Marisol Tromp tabata kier su placa cash pa asina e paga e hendenan cu a traha p’e. E abogado a bisa cu e lidernan di fraccion mes mester a paga di nan saco pasobra Gobierno a paga laat. Abogado ta puntra cu si esaki ta wordo considera malversacion di placa.
E abogado a pidi Hof pa destrui e sentencia contra Howell y declara PG no admisibel. Mr. Herrera ta haya cu mester declara Howell liber.
HOF a palabra cu dia 8 Juli 2026 lo sera tratamento di e caso na Corsou y via video conference lo dicta sentencia. DIARIO lo informa lectornan di e sentencia.
