ORANJESTAD (AAN): E Venezolano D.N., mas cu 2 aña despues di a forma parti den e asalto arma na Caribbean Cinemas, awor ta wordo condena.
Hues di Corte den Promer Instancia a haya D.N. culpable cu riba 27 November 2019, hunto cu otronan a haci un asalto arma riba Caribbean Cinemas.
DI TRES COMPLICE CONDENA
E promer acusado cu a wordo condena pa e asalto aki, tabata un empleado di Caribbean Cinemas. Tratamento di e caso aki tabata dos aña pasa. Apesar cu e hoben aki a nenga, Hues a mustra cu miembronan di Recherche por a mira via camera cu intencionalmente a laga e porta patras di emergencia habri, siendo cu esaki mester ta completamente sera. E dia ey ta e acusado tabata encarga cu esaki. El a wordo condena.
E di dos acusado, su caso tabata aña pasa. E tabata forma parti di un grupo di asaltante cu a bay asalta un pareha cu tabata trahando riba un cas. A resulta cu e acusado aki, despues di e asalto na Caribbean Cinemas, caminda a bay cu alrededor di 8 mil florin, a huy bay Venezuela. Despues el a bin bek Aruba y a bolbe bay haci un asalto arma.
E di tres acusado, D.N., ta sera den KIA pa un caso y durante interogacion riba un otro caso, un persona a bisa cu D.N. a participa den e asalto na Caribbean Cinemas. E ora ey miembronan di Recherche a bay investiga y a resulta cu enberdad D.N. tabata complice di e asalto arma na Caribbean Cinemas.
CASTIGO
Recien, Hues di Corte di Husticia den Promer Instancia, a haya D.N. culpable di a forma parti den e asalto arma na Caribbean Cinemas.
Hues den su sentencia a bisa cu e ta haya legalmente proba cu D.N. tabata complice di e asalto haci 27 November 2019.
Pa cu e castigo, Hues a bisa cu e ta tene cuenta cu hunto cu otronan, D.N. a haci e asalto arma riba Caribbean Cinemas. Den oranan di anochi a drenta via e porta patras di e edificio. Dos empleadonan cu tabata traha a wordo asalta y a menaza nan pa duna placa. Un di nan a hay’e obliga ta habri e caha fuerte y e asaltantenan a bay cu e placa. Despues nan a huy bay Venezuela. Hues ta haya cu e asaltantenan a causa trauma cerca e empleadonan. Nan sed pa haya placa facil a haci esey sin tene cuenta cu e trauma cu nan a causa.
Hues ta haya cu esaki ta un falta grandi di respet pa hende y propiedad. A shock comunidad y causa temor y inseguridad. Hues a bisa cu mester duna castigo di prison largo. El a condena D.N. na 4 aña y 6 luna di prison. Ainda D.N. ta pendiente pa e caso cu e ta sera na KIA.
