ORANJESTAD (AAN): Diabierna mainta den sala di Corte di Husticia, a cuminsa cu tratamento di e caso penal cu Ministerio Publico a cuminsa contra e hombernan A.R.L. di 45 aña, R.E.S. di 35 aña, y e Venezolano I.R.S.d P. di 47 aña,
kendenan ta worde acusa cu entre 1 Januari 2023 y 22 Maart 2023 a haci contrabando di e dama Venezolano Leidy Johanna Salazar de Moreno, kende yegando Aruba a perde riba laman.
Tambe e grupo aki ta worde acusa cu entre 1 November 2022 y 22 November 2022 nan a haci contrabando di 6 persona.
Contrabando di hende no planea: Hues a bisa cu segun e relato di Polis, e dama Salazar de Moreno kier a bin Aruba den boto y a paga pa bin mas tempran cu e plan cu tabatin planea pa un grupo bin dia 25 Maart 2023.
Durante e interogacion di Hues di e sospechosonan, ta sali na cla cu A.R.L. tabata sa cu Salazar de Moreno kier a bin Aruba pero ni R.E.S. y tampoco I.R.S.d P. tabata sa. E dama Salazar de Moreno a drenta den contacto cu A.R.L., kende a bis’e cu e no por.
E dama a insisti cu e kier bin. E ora ey A.R.L. a pidi I.R.d P., kende a bisa cu e tampoco no por. A.R.L. a pidi R.E.S., kende den promer instante tambe a nenga. Segun R.E.S., e no sa haci e tipo di trabaonan aki pero door cu e dama Salazar de Moreno tabata yora, el a dicidi di bay busk’e na Venezuela den boto y trec’e Aruba.
Dama wanta na boei riba laman: R.E.S. a sali cu boto anochi y ariba laman den vecindario di Venezuela, el a haya Salazar de Moreno na un boei cu un salba bida bisti. Segun R.E.S. el a worde informa cu e dama sa landa pero loke el a mira e dama ta haci den laman, el a conclui cu e dama no sa landa.
Ora el a tuma Salazar de Moreno den boto, el a dun’e un salba bida. A laga e otro salba bida na e boei. R.E.S. cu señal di luz tabata comunica cu e otro boto cu a hiba Salazar de Moreno riba laman pa asina laga sa cu el a haya Salazar de Moreno.
Dama a perde banda di Baby Beach: R.E.S. a bisa Hues cu durante e viahe pa Aruba, e dama tabata sinta patras den boto. Ora nan tabata yegando Aruba, el a bira y mira e dama sinta. Ora nan tabata casi yega tera na Baby Beach, R.E.S. a mira Wardacosta tabata pasando.
Ora R.E.S. a bira pa bisa Salazar de Moreno cu Wardacosta ta biniendo, el a ripara cu Salazar de Moreno no tabata sinta mas den boto. R.E.S. a spanta y no tabata sa unda e dama a bula. Wardacosta a yega na e boto y e miembronan di Wardacosta a bisa R.E.S. pa bay tera cu e boto pa haci control.
R.E.S. no a bisa e personal di Wardacosta nada cu Salazar de Moreno a bula na awa.
Hues a puntra R.E.S., pakico e no a bisa nada. Segun R.E.S. e tabata spanta y a pensa cu si e bisa Wardacosta, e lo hay’e den problema. Ora a yega tera, R.E.S. a notifica A.R.L. Segun A.R.L. e momento ey ya e tabata na Rodgers Beach y a mira Wardacosta.
Despues di control di Wardacosta, R.E.S. a bolbe bay afor riba laman pa busca Salazar de Moreno. E ora ey A.R.L. a bisa cu e ta bay pier busca un boto pa yuda busca. El a bisa cu el a pidi un amigo cu tin boto y a bay Baby Beach pa yuda busca. No a haya Salazar de Moreno. Despues A.R.L. a yama e yiu homber, kende no tabata kier a bisa Wardacosta.
Su siguiente dia, A.R.L. a dicidi di notifica Wardacosta cu un boto cu 7 persona a bin Aruba pero falta un persona. A notifica Centro MOC di Wardacosta di Caribe Hulandes cu a laga helicopter y boto di Wardacosta haci buskeda, pero sin resultado. A.R.L. a bisa Hues cu a bay den social media y a splica tur loke a sosode.
Segun A.R.L., na dado momento nan tabatin miedo cu for di Colombia lo manda hende sea pa busca e curpa di e dama of pa busca nan. Pa evita problema a bay Polis. Durante interogacion di Hues, R.E.S. a bisa cu e stroom ey dia ey tabata bin pa Aruba. Esey ta mustra cu e dama lo por a yega tera.
Caso posponi: Ta asina cu na dado momento Hues a propone pa pospone e caso y sigui merdia. Abogado mr. de Hoogd a bisa Hues cu con largo ta calcula cu tratamento di e caso ta bay dura pasobra 3’or abogado mr. Mohamed tin un asunto di atende y mr. de Hoogd tin un asunto 4’or di atardi. Hues e ora ey a puntra Fiscal y e tres abogadonan, cuanto tempo cada un lo bay tuma.
Despues di a haya e informacion ey, Hues a bisa cu e ta kere cu ta mihor pospone e caso pa dia 22 November 2023 pa 8.30 di mainta. Na opinion di Hues, no tin sentido pa bay pura y tog e no ta mira cu lo bay keda cla na tempo pa e dos abogadonan por bay atende loke nan tin di atende. Tratamento di e caso lo sigui dia 22 November 2023, caminda Fiscal lo bay bisa kico e ta pensa di e dos casonan y ki castigo e ta exigi. Despues e abogadonan lo presenta nan defensa.
