Hues no a sigui exigencia di Fiscal
ORANJESTAD (AAN): E homber S.V. di 20 aña a presenta den Corte pa e caso penal cu Ministerio Publico a cuminsa contra dje. Fiscal a acusa S.V. di posesion di un arma di candela riba 23 Augustus 2023 te 2 September 2023. Tambe Fiscal a acusa S.V. cu riba 27 Mei 2023 a comete violencia contra e homber E. door di tir’e cu un sotel y lag’e herida na su cara. Esaki a sosode den China Town Bar na San Nicolas.
Posesion arma: Hues a bisa cu S.V. tabatin un revolver cu bala. S.V. a admiti esey. Hues a bisa cu e caso aki a bin dilanti ora cu un amigo di S.V., difunto Ivanon Phelipa di 23 aña a tira su mes mata riba 23 Augustus 2023 na Rooi Koochi. Phelipa a tira su mes den cabez. Hues a bisa cu segun e amiga di Phelipa, ta S.V. a bin cu e revolver na e cas.
Amigo a tira su mes mata: Acusado S.V. a bisa Hues cu e tabata na e cas y nan a bis’e pa baña pa despues nan bay Casino. Segun S.V., ora el a yega na e cas, e no a mira ningun arma. El a nenga di tabatin un arma cun’e. El a bisa Hues cu ora e tabata den baño, el a tende tiro. E amiga tabata bati na e porta. El a habri porta y mira Phelipa benta abao. E amiga a bisa cu e no kier tin arma den cas. Segun S.V., el a bay den panico y a coy e arma y un bala cu tabatin na banda di e arma y bay cu nan for di e cas. El a yama un amigo pa e papia cun’e. Na caminda pa e amigo, na altura di un dam, el a tira e revolver den dam. El a bay cerca e amigo y cont’e kico a pasa. E amigo a bis’e cu e no por keda eynan sino e ta hay’e cu problema cu husticia.
Hues a puntra pakico S.V. a coy e arma y bay cun’e. S.V. a bisa cu e dama a bira histerico y S.V. den panico a coy e arma. Hues a bisa cu segun e amiga, e arma ta di S.V. E acusado S.V. a desmenti categoricamente. El a bisa Hues cu e no a hiba arma na e cas. Ta ora el a tende tiro y habri porta di baño el a mira e arma benta abao.
Wega di ‘Roulette Ruso’ a causa morto: Hues a lesa declaracion di e dama, kende a bisa cu S.V. a yega cas y pone e arma riba mesa y el a bisa S.V., pakico e ta trece e arma. E dama a bisa cu ora S.V. a bay baña, Phelipa a coy e arma y a haci roulette ruso. Tres biaha Phelipa a primi e gay na su cabez. Despues el a dirigi e arma riba e dama y primi gay. E dama a bisa cu despues Phelipa a coy un bala di e tres cu tabata riba e mesa y cuminsa hunga “Roulette Ruso”.
Na dado momento un tiro a los na banda di cabez y Phelipa a cay abao y cuminsa bati. Segun S.V. el a haya e revolver cu un bala riba mesa y a bay cu nan. Hues a puntra S.V. pakico e no a duna e arma na Polis. Segun S.V. el a drenta panico. El a keda bisa Hues cu ora el a yega na e cas, e no a mira e revolver riba mesa. Hues a puntra S.V. kico e ta pensa di arma. El a bisa cu arma ta peligroso. El a perde un amigo.
Pelea den Bar: Pa loke ta e caso di bringa den bar na San Nicolas, S.V. a splica cu un amigo a bin cerca nan bisa cu un homber kier bringa cun’e. S.V. a bay den bar y a bay papia cu e homber E. kende e conoce. Segun S.V., E. a cuminsa dal hende cu stoel. S.V. a pasa man pa un stoel y tira den direccion di E. pa e bay for di e lugar. Segun S.V. e no a haci’e cu intension pa dal E. Hues a mustra cu ora tira un stoel e por dal e homber E.
Hues a bisa cu segun e carchi di castigo di S.V., tin 3 caso pa cual no a persigui S.V. pero den casonan tabatin arma di candela.
Fiscal: Fiscal a bisa Hues 23 Augustus 2023, un lamentable incidente a sosode. Phelipa a tira su mes mata cu e arma cu S.V. lo a hiba na e cas. E dama amiga di Phelipa a bisa cu ta S.V. a hiba e arma na e cas. Fiscal a bisa Hues cu e no ta kere e storia cu S.V. a coy e arma y deshaci di dje door di tire den dam.
E pregunta ta, kende a trece e arma na e cas. Tin e declaracion di e dama y declaracion di S.V. Fiscal ta haya cu S.V. ta culpable di posecion di e arma y un bala. Tambe Fiscal ta haya S.V. culpable di a tira un stoel riba E. cu a dal’e den cara y E. a sufri kap na cara.
Exigi castigo: Fiscal a bisa Hues cu posesion di arma ta sumamente peligroso. Bo por menaza of tira cu e arma. Den e caso aki por a mira ki consecuencia tabatin. Segun Fiscal, si S.V. no a coy e arma, e lo no a worde deteni. Tin hopi tiramento riba Aruba. Fiscal no kier tin wild-wild-west na Aruba. El a exigi pa S.V. 12 luna di prison di cual 3 luna ta condicional cu 3 aña di prueba. Fiscal a bisa cu durante e tempo di prueba, S.V. lo mester cay bou guia di Reclasering.
Abogado: mr. Thielman a bisa Hues cu 23 Augustus 2023 a sosode un caso tristo. S.V. tabata den baño y ora el a tende tiro el a habri porta y mira su amigo morto benta abao y e arma benta abao. S.V. a bay den panico door di cu e amiga no kier mira e arma. S.V. a coy e arma y bay cun’e. E tabata kier bay cerca un bon amigo pa haya conseho pero na caminda a tira e arma den dam. El a bay cerca e homber M. cu ta doño di e auto cu S.V. tabata core. E homber M. a bisa cu S.V. tabata den un shock y tabata tril. Despues S.V. a keda depresivo.
E abogado a bisa cu S.V. a worde deteni na momento di entiero di su amigo Phelipa y no por a despedi di dje. Pa colmo e abuela di S.V. tambe a fayece y tampoco por a tuma despedi di dje. El a keda depresivo. E abogado a mustra riba e raport di Reclasering cu ta mustra e situacion na cas caminda ta S.V. ta yuda financieramente. E abogado, e amiga a bisa cu e arma tabata riba e mesa y S.V. tabata den baño. Na opinion di mr. Thielman, e arma no ta di S.V. y no por bisa cu e tabatin e arma henter e periodo cu ta acus’e.
Pa cu e pelea na China Town, e abogado a remarca cu e grupo tabata bringa y ta solamente ta persigui S.V. y no e grupo cu tabata bringando. E abogado ta haya cu por a haci un Tomzitting pa e caso aki. El a pidi Hues pa castiga S.V. igual na loke e ta sera y un parti condicional, bou guia di Reclassering.
Sentencia: Hues a cera tratamento di e caso y a dicta sentencia di biaha. Hues ta haya legalmente proba cu S.V. tabatin un arma y bala. Hues a bisa cu no tin motibo pa duda den declaracion di e amiga di e difunto cu ta bisa cu S.V. tabatin e arma. E pelea den China Town Bar, tambe por mira cu S.V. a tira un stoel den direccion di e homber E. Na opinion di Hues, no por conclui cu door di tira e stoel, E. a resulta herida. Pesey Hues a declara S.V. liber. Pero si Hues ta haya S.V. culpabel di violencia publico.
Hues a bisa cu e no ta comparti Fiscal su punto di bista pa cu e caso di Phelipa a tira su mes mata. Hues ta haya cu ta S.V. a hiba e arma na e cas. Hues a bisa S.V., si e no a bay cu e arma, e amigo lo ta na bida ainda. Hues ta haya e castigo exigi pa Fiscal abao. Pa cu e castigo, Hues a bisa cu e ta tene cuenta cu S.V. a perde un bon amigo y a keda afecta. Hues a condena S.V. na 15 luna di prison, di cual 6 luna ta condicional y 3 aña di prueba. Hues a bisa cu durante e tempo di prueba, S.V. mester cay bou guia di Reclassering.
