Hues ta haya cu manehador di brommer BMW tambe tin culpa
ORANJESTAD (AAN): Diahuebs mainta e homber B.E.H. di 27 aña a presenta den sala di Corte pa scucha sentencia di Hues, den e caso penal cu Ministerio Publico a cuminsa contra dje.
Hues no ta comparti punto di bista di Fiscal pa cu e castigo. Hues no ta haya cu B.E.H. a core iresponsabel. Hues ta haya cu e manehador di e brommer BMW tambe ta culpabel pasobra e tabata core mucho duro y esey tambe a yuda causa e accidente. Envez di castigo di prison manera Fiscal a exigi, Hues a condena B.E.H. na boet y castigo condicional.
Fiscal a exigi castigo di prison: Dia 27 di Maart 2025, tratamento di e caso a tuma lugar caminda Fiscal a acusa B.E.H. cu riba 11 October 2023, el a core e auto compacto KIA Picanto bao influencia di alcohol y a causa un accidente riba L.G. Smith Boulevard. El a keda sin duna preferencia na un brommer BMW caminda un dama Luisa F. Torres Gutierrez di 21 aña, sinta patras riba e brommer, a sufri herida severo y a muri riba 15 October 2023. E manehador di e brommer Lyendrick Kelly a sufri lesion.
Fiscal ta haya cu aki no por papia cu intencionalmente B.E.H. a causa e accidente sino cu door di su culpa e accidente a sosode. Fiscal a bisa cu mester tene cuenta cu e brommer tabata core cu velocidad hopi halto. Pero mas serio ta e hecho cu B.E.H. tabata hopi bao influencia di alcohol. Pa cu e castigo, Fiscal a bisa cu e ta tene cuenta cu ta promer biaha B.E.H. a cay sera. E auto a keda confisca. Fiscal a exigi 2 aña di prison, di cual 30 luna ta condicional cu 2 aña di prueba. Tambe Fiscal a exigi pa kita B.E.H. su rijbewijs pa 3 aña. E demanda di daño di 30 mil Florin, Fiscal a laga na decision di Hues.
Sentencia: Diahuebs mainta e mayornan di e victima Gutierrez tabata presente y B.E.H. a presenta cu su mama. Hues a bisa cu e pregunta ta si B.E.H. ta culpabel di accidente cu a causa morto di e dama Torres Gutierrez. Hues a bisa cu 11 October 2023, mas o menos 12:30’or di marduga a sosode un accidente, caminda B.E.H., riba L.G.Smith Boulevard a lora na man robez pa drenta Adriaan Lacle Boulevard mientras cu tabatin e brommer BMW tabata acercando den direccion contrario. Door di e impacto fuerte, e dama Torres Gutierrez sinta patras riba brommer a fayece algun dia despues.
No tabata core iresponsabel: Hues a bisa cu riba video di seguridad, por a mira cu B.E.H. a lora mientras cu e brommer tabata bini. Por a mira riba e video cu B.E.H. a tuma un birada mas tempran. E brommer tabata core 137 km/h siendo cu riba e caminda mester core 50 km/h.
E acusado B.E.H. tabata bao influencia di alcohol. Hues a bisa cu mester a investiga si B.E.H. tabata core iresponsabel. Hues ta haya cu mescos cu Fiscal y abogado, B.E.H. no tabata core iresponsabel. Na opinion di Hues, e bebemento di alcohol a pone cu B.E.H. no tabata core atento.
Brommer tabata core demasiado duro: Na opinion di Hues, e velocidad halto di brommer a causa cu B.E.H. a bira sin por a calcula e velocidad. Hues a conclui cu mester declara B.E.H. liber di a core iresponsabel y causa e accidente. Hues a bisa cu e ta haya B.E.H. culpabel di a core bou influencia y causa un accidente cu resultado fatal.
Boet y castigo condicional: Pa cu e castigo, Hues a bisa cu e ta tene cuenta cu B.E.H. a pone trafico den peliger door di core auto bao influencia di alcohol. Hues a tene cuenta cu ta promer biaha cu B.E.H. ta cay den man di husticia y cu B.E.H. ta conciente cu el a causa e accidente.
Hues a bisa cu e no ta sigui Fiscal den su exigencia y lo condena B.E.H. na castigo mas abao. Pa cu e asunto di daño material, Hues ta haya cu esaki ta mucho complica pa keda trata den un caso penal y ta declara esaki no admisibel. Esey ta haci cu por cuminsa un caso civil.
Hues a condena B.E.H. pa a pone trafico den peliger, na un boet di 350 Florin of 7 dia cera y pa ocasiona e accidente un boet di 1.000 Florin of 20 dia cera. Tambe Hues a condena B.E.H. na 6 luna sin rijbewijs pero esaki condicional cu un tempo di prueba di 2 aña.
Hues a sigui bisa cu e 70 dianan cu B.E.H. tabata sera, mester desconta for di e boetnan. Esey ta significa cu B.E.H. no tin cu paga boet. Hues tambe a dicidi cu e auto mester worde debolbe.
Por a mira cu e mama di e victima tabata hopi emociona ora cu Hues tabata bisa su sentencia. Un traductor tabata traduci p’e. El a sali for di sala di Corte hopi tristo.
