ORANJESTAD (AAN): Diahuebs mainta Hues di Corte den Promer Instancia a dicta sentencia den e caso penal cu Fiscal di Ministerio Publico a cuminsa contra e dama L.K. biba na Hulanda.
El a wordo haya culpable di a hinca un agente di Polis cu cuchio.
HINCA AGENTE DI POLIS CU CUCHIO
Algun siman pasa tratamento di e caso a tuma lugar caminda Fiscal a bisa cu e ta haya cu L.K. a hinca e agente di Polis T. cu cuchio. T. a wordo hinca den pecho y T. a perde hopi sanger. Fiscal ta haya cu L.K. a tuma riesgo cu T. por a muri door di e hinca. Fiscal tabata sospecha cu abogado lo bin cu defensa propio. Fiscal a bisa cu ta un hecho cu T. a dal L.K. un skop na pia. Despues L.K. a bay coy un cuchio den cushina. Ora el a bay den camber, el a mira T. cu e pistool den man.
Fiscal a bisa cu T. tabatin e arma den camber promer cu L.K. a bay den cushina. T. a warda su arma na momento cu L.K. a hink’e. T. no kier a haci denuncia contra L.K. pero mirando e seriedad di e caso a dicidi cuminsa un caso. No ta haya cu por papia aki di defensa propio. Ta trata aki di un caso hopi serio caminda L.K. a hinca T. cu cuchio den pecho. Fiscal a bisa cu normal ta castigo di prison e lo a exigi pero door cu L.K. a wordo laga liber y el a bay biba na Hulanda el a dicidi di exigi castigo condicional.
Fiscal a exigi castigo condicional di 189 dia di cual 180 dia ta condicional cu un tempo di prueba di 1 aña. Tambe e mas cu 1600 florin di daño cu T. a paga na pasashi pa a bay Hulanda pero no a bay. E resto di demanda di daño Fiscal a declara no admisibel.
SENTENCIA
Hues ayera mainta a bisa cu e ta rechaza e ponencia di abogado cu a pidi pa declara Ministerio Publico no admisibel. Pa cu e castigo, Hues a tene cuenta cu ta basta tempo a pasa y pesey lo tene cuenta cu esaki den castigo. Hues a rechaza defensa propio. El a declara liber L.K. pa e acusacion di posesion di arma.
Hues a mustra cu tin un cuchio den cas no ta wordo considera un arma. Hues ta di opinion cu ta L.K. mes a busca confrontacion. E ta haya intento di mata legalmente proba. Hues a condena L.K. na 1 aña di prison condicional y 2 aña di prueba.
Hues a declara no admisibel e demanda di daño di T. E ta haya cu no ta gastonan relaciona cu e caso.
