Hues ta hay’e culpabel di intento mata
ORANJESTAD (AAN): Diabierna mainta Hues di Corte di Husticia a dicta sentencia den e caso penal cu Ministerio Publico a cuminsa contra e hoben homber R.I.(16). Ta asina cu Hues ta haya R.I. culpabel di a hinca e hoben homber D.H. cu cuchio den pecho riba 22 Februari 2023. Hues a confirma e castigo exigi pa Fiscal. Ta asina cu R.I. ta den libertad caba.
Fiscal a exigi castigo combina: Algun siman pasa tratamento di e caso a tuma lugar caminda Fiscal a bisa cu e momento cu R.I. a hinca, e tabatin 15 aña. Segun ley hubenil, e maximo castigo ta 12 luna. Pa cu e castigo, Fiscal a bisa cu e ta tene cuenta cu Reclassering ta bisa cu R.I. mester di guia y psicologo ta haya cu R.I. no ta completo responsabel. Psicologo tambe ta haya cu R.I. mester guia. Teniendo cu tur e raportnan aki, Fiscal ta kere den un castigo combina pa asina R.I. bay bek riba e bon caminda. Fiscal a exigi 360 dia di prison di cual 162 dia ta condicional y 2 aña di prueba y bou guia di Reclassering. E mesun dia R.I. a sali liber.
Abogado mr. Kip a mustra cu R.I. tabata forma parti di un gang y ora el a aleha di e gang, esnan di e gang tabata persigui’e. E dia di e incidente, esun cu R.I. a ataca ta di e gang. R.I. a kere cu D.H. tabata arma y pesey a actua den defensa propio.
Sentencia: Hues a bisa cu e ta haya legalmente proba cu dia 22 Februari 2023, R.I. a hinca D.H. cu un cuchiu. Hues a mustra cu Polis a wordo notifica cu un homber a wordo hinca na Coba Lodo banda di un supermercado. E tabatin hinca den pecho.
Hues a bisa cu R.I. ta wordo acusa di a purba mata D.H. Subsidiario, maltrato cu arma cu consecuencia severo. Hues a reacciona riba e punto di bisa di mr. Kip kende a bisa cu R.I. no tabatin intension di mata y causa herida severo. Hues ta haya R.I. culpable. Hues ta haya cu mirando e herida cu D.H. a sufri, R.I. mester a hinca cu forza. Hues ta haya cu R.I. mester tabata sa cu e por a mata D.H. El a bisa cu R.I. a tuma e chens cu D.H. por a fayece. Hues a conclui cu R.I. ta culpable di intento di mata D.H.
No a actua den defensa propio: Hues a sigui bisa cu abogado mr. Kip ta haya cu R.I. a actua den defensa propio pasobra el a kere cu D.H. lo tin un arma cun’e. Hues no ta haya acceptable cu R.I. tabata den un situacion pa defende su mes. Hues a mustra cu riba e video di seguridad por mira cu den un periodo di 26 seconde, R.I. a hinca D.H. y no tabatin ningun situacion di menaza.
Hues a bisa cu e ta haya cu R.I. por a cana bay pero a scoge pa ataca D.H. Na opinion di Hues, no tabatin un situacion cu R.I. por a pensa cu e ta wordo ataca. Pa cu e castigo, Hues a bisa cu e ta tene cuenta cu e momento ey R.I. tabatin 15 aña y e mester aplica ley hubenil. Hues a bisa cu danki Dios cu e hinca no a resulta fatal. Hues a bisa cu hincamento ta causa hopi intrankilidad den comunidad. Hues a bisa cu el a lesa raport di Reclassering cu ta mustra cu e chens ta existi cu R.I. lo por bolbe haci’e y mester di guia di Reclassering. Psicologo den su raport ta constata cu R.I. sa kico ta bon y kico ta malo. E ta conseha cu R.I. mester di ayudo y Reclassering lo ta suficiente.
Castigo: Hues a confirma exigencia di Fiscal. El a condena R.I. na 360 dia di prison di cual 162 dia ta condicional cu 2 aña di prueba. Cu e castigo aki, R.I. no mester bay bek prison. Hues a bisa cu e ta pone condicion special cu R.I. mester cay bou guia di Reclassering.
