ORANJESTAD (AAN): E hombernan F.H. di 28 aña y E.v.d.B. di 28 aña a presenta dilanti Hues den Corte di Husticia pa duna cuenta pa e delito cu nan a haci.
Nan ta worde acusa di tabata bende marihuana entre 2020 y 2021.
Bendemento di Droga: Hues a puntra tanto v d B. como F.H. si ta berdad cu nan tabata bende marihuana. E acusado v d B. a bisa Hues cu e ta sufri di arthritis y ta mas bien un adicto y tabata bende.
F.H. a bisa Hues cu e no ta dealer pero ta bende cu amigonan entre nan mes. Hues a remarca cu si ta bende, esey ta worde considera ta dealer.
Menu di droga riba smartphone: Hues a bisa cu tin pruebanan entre otro testigonan cu a declara di a cumpra for di nan. Hues a mustra cu tin hasta menu di diferente tipo di marihuana y prijsnan cu ta manda via smartphone.
Hues a bisa cu ley ta baha pisa riba marihuana y den vecindario paisnan ta ocupa pa legalisa marihuana. Segun v d B. e ta usa marihuana door cu e tin arthritis y e marihuana ta yud’e cu dolor. Hues a mustra cu F.H. y v d B. ta bon amigo.
Fiscal a remarca cu aki ta trata di bendemento di basta droga. Fiscal a menciona declaracion di testigonan cu entre otro ta papia di cumpra 2 liber di marihuana. Tin otro ta papia di a cumpra 40 pa 50 biaha. Na opinion di Fiscal, e forma con tabatin menu di marihuana, ta mustra mas cu nan tabata deal den droga.
Exigencia di Fiscal: Fiscal a bisa cu e ta haya legalmente proba cu F.H. y v d B. tabata bende marihuana. Remarcabel ta cu ambos tabatin menu di marihuana cu prijsnan. Tambe tin potretnan di saconan cu marihuana. Fiscal a menciona nomber di hendenan cu a cumpra for di nan.
Tin hendenan ta papia di ta cumpra 4 pa 5 biaha pa siman. E forma di traha aki ta mustra cu nan ta bendedornan y ta conoci pa otro bendedornan. Fiscal a bisa cu castigo pa droga na Aruba ta mas pisa cu Hulanda. Ta henter un operacion tin tras droga y esaki ta fomenta criminalidad. Fiscal a exigi 10 luna di prison di cual 4 luna ta condicional y 2 aña di prueba pa F.H. y v d B.
Abogado a bisa: Abogado mr. Emerencia di F.H. a bisa Hues cu e ta haya cu aki ta trata di deal chikito. El a mustra cu ta 1.5 gram di marihuana a confisca. Na opinion di mr. Emerencia, Fiscal ta papia di menu manera ta cos grandi pero ta ofrece nan tabata ofrece droga. El a mustra cu tin testigo cu nan declaracion no ta confiabel.
Loke nan ta declara y si mira chat riba Smartphone di F.H. cu nan, no ta cuadra. E abogado ta haya cu F.H. no tabata bende desde 2020 sino na 2021 a cuminsa.
Abogado mr. Illes di v d B. ta haya cu no tin indicacion cu su cliente lo tabata bende for di 2020. Ta un testigo so ta papia di a cumpra for di 2020. E mayoria ta papia cu ta e aña aki a cumpra. V d B no tabata na Juni 2020 na Aruba sino Hulanda. Na September 2020 el a bin back. E abogado a bisa Hues cu e ta haya cu por papia di December 2020 te na momento cu v d B. a worde deteni.
El a pidi Hues pa declara v.d B. liber pa periodo promer cu December 2020. El a mustra cu v d B. ta sufri di arthritis cu ta haci cu e ta usa marihuana pa dolor. E abogado ta haya e castigo exigi pa Fiscal mucho halto. El a pidi Hues pa castiga v d B. na un castigo igual na loke el a sinta caba den KIA y e otro parti condicional.
Sentencia di biaha: Hues a sera tratamento di e caso y a dicta sentencia di biaha. Hues a bisa cu ambos a admiti di tabata bende pero un periodo mas cortico. Hues ta haya e exigencia di Fiscal tog bon.
Sinembargo el a condena nan na 300 dia di prison y kitando e tempo cu nan ta sera y e resto ta condicional. Esey ta nifica cu e mesun dia nan por bay cas.
