ORANJESTAD (AAN): – Manera DIARIO a publica, diabierna mainta den sala di Corte di Husticia mester a sigui cu tratamento di e lamentabel caso di tira Shayuri Petronia mata riba 4 Juni 2021.
Sinembargo, tratamento di e caso no a sigui. A resulta cu e raport di psychiater no a keda cla y door di esey no por a sigui cu tratamento di e caso. Hues a bolbe pospone e caso.
Dia 28 di Februari 2022 a cuminsa cu tratamento di e caso caminda ta sali na cla cu Zuriel y Izak tabata trip. Na dado momento nan a bay na cas di Izak caminda despues di un rato Shayuri a yega serca nan. Ta asina cu Shayuri lo ta biba hopi serca. Shayuri lo a bay trip cu un amigo J.
Zuriel y Izak a bolbe sali y ora nan a bolbe cas di Izak nan a haya Shayuri tabata den auto cu su amigo para dilanti cas di Shayuri y nan a baha bin na cas di Izak.
Pafor nan tabata bebe y huma marihuana. Segun Zuriel e no ta bebe ni droga. El a bisa Hues cu e ta corda bon bon kico a pasa.
Na dado momento J. a bisa cu e ta bay. Despues Zuriel, Shayuri y Izak a bay paden di cas di Izak. Zuriel a bisa Hues cu Shayuri y Izak tabata lora un marihuana na un mesa. Riba e mesa tabata e Glock di Izak.
Shayuri lo a coy e arma y tabata haci snapchat cu esaki y marihuana den man. Zuriel a bisa Izak pa kita e arma. Promer cu Izak a reacciona, Shayuri a pone e arma riba mesa.
Un rato despues Izak a coy e arma y segun Zuriel, e peña a cay. E ora Izak a bay hala parti di e arma patras pa mira si tin bala den e loop. E tabatin su dede riba e gay. E momento ey e lo a perde balans riba e stoel cu tabatin un pia kibra. Door di e tilt aki, un tiro a sali y alcanza Shayuri cu ta sinta na otro banda di e mesa den cabez.
No a sigui cu tratamento di e caso pasobra Fiscal a pidi Hues pa laga psychiater evalua e dos sospechosonan. E pregunta cardinal den e caso aki ta, esaki ta wordo considera un tiro accidental of un asesinato? Ainda mester sucha kico Fiscal ta pensa di e caso y tambe kico e abogadonan ta bisa.
CASO POSPONI ATROBE
Dia 28 Februari 2022, Hues a palabra cu ayera 3 Juni 2022 ta sigui cu e tratamento di e caso, caminda lo repasa e evaluacion di psychiater y despues Fiscal lo bisa kico e ta pensa di e caso y exigi castigo pa despues e abogadonan hiba nan defensa.
Ta asina cu psychiater no a keda cla cu e rapportnan y esey a haci cu ayera e caso tabata poni pro forma, esta pa Hues fiha un otro fecha pa tratamento.
E dos sospechosonan Izak y Zuriel tabata den un oficina na KIA mientras cu Hues, Fiscal y abogado tabata den sala di Corte.
Hues a bisa cu e rapport di psychiater ta hopi importante pa e caso. El a bisa cu e por a compronde cu dentro di algun siman e raport ta cla.
Hues a fiha dia 24 Juni 2022 pa 9.30 di mainta lo sigui cu tratamento di e caso.
