Diesun sospechoso lo mester presenta
ORANJESTAD (AAN): Dialuna 7 Februari 2022, Corte di Husticia lo cuminsa cu tratamento di e caso penal cu Ministerio Publico a cuminsa contra un grupo di 11 persona. E caso aki ta hiba e nomber Avestruz.
E caso aki ta relaciona cu asuntonan di terenonan di Gobierno cu e minister di e tempo ey, actualmente Parlamentario Benny Sevinger, a otorga.
HOPI ACUSACION CONTRA SEVINGER: Por a compronde cu Ministerio Publico a presenta un cantidad di acusacion contra Sevinger.
Acusacionnan manera entre otro: soborno, malversa Gobierno y abusa di su funcion como minister. E citacion contra Sevinger ta consisti di 8 pagina.
HUES DI CURACAO: Pa mustra imparcialidad den tratamento di casonan penal, mescos cu tabata e caso cu e caso Paul Croes, den e caso aki, un Hues di Curacao lo bin Aruba pa trata e caso.
Di e forma aki ta garantiza imparcialidad den e proceso hudicial.
DIESUN SOSPECHOSO: Segun e rol di casonan penal, un total di 11 sospechoso ta aparece y un compania. E sospechosonan cu mester presenta dilanti den Corte ta: Ewald Biemans, Franklin Abath, Edgar Werleman, Ninosca Nuñez, Oslin (Benny) Sevinger, Reina Richardson, Maria Leoncita Arends, Pieter Susebeek, Carlo Mansur, Curt Harms, y Frederic Every.
E compania cu tambe ta aparece riba e rol ta: Prestine Estate N.V.
CASO PRO FORMA: Ta asina cu e caso lo bay ta pro forma. Esey ta nifica cu no ta bay tin tratamento di e caso sino mas bien Hues lo bay scucha di parti di Fiscal y tambe di e abogadonan, kico mas lo ta desea pa haci di investigacion.
Posiblemente lo por palabra un fecha pa cuminsa tratamento di e caso. Mirando e cantidad di hendenan, lo por spera cu tratamento lo bay tuma algun dia.
