ORANJESTAD (AAN): Diabierna mainta e homber T. di 71 aña a scucha Fiscal exigi 20 luna di prizon p’e.
Fiscal ta haya T. culpabel di a mishi cu e mucha muher A. (awor tin 12 aña) entre 2021 te Januari 2023.
Den sala di Corte tabata presente e mayornan di e mucha, kendenan ta famia di e sospechoso. E victima ta yiu di e yiu muher di e pareha di T.
Sospechoso ta nenga: Hues a bisa cu e tempo ey e mucha tabata 11 – 12 aña y cu e sospechoso T. a mishi na e mucha su pechonan y su parti intimo. T. ta desmenti esaki. Na KZP el a desmenti. Hues a bisa cu e mucha A. a bisa su juffrouw na school y asina e caso a cuminsa. E juffrouw di school a conta A. su mama y asina denuncia a wordo haci na KZP. Hues a bisa cu e mama y e tata a papia cu T. y T. a pidi pordon pa loke a pasa. El a bisa cu e lo a mishi cu e mucha su pechonan y no su parti intimo.
Den Corte, T. a bisa Hues cu no ta berdad. Hues a puntra, pakico T. a pidi pordon anto. El a bisa Hues cu el a pidi pordon pasobra nan ta compronde cos robez. Hues a bisa cu e señora di T. tambe a wordo interoga y tambe a bisa cu T. a bis’e cu e no a mishi na e parti intimo di e mucha pero a mishi cu su pechonan. T. a desmenti esaki. Hues a bisa cu aki tin e mama y tata di e mucha y e señora di T. cu ta bisa cu T. a bisa cu el a mishi cu e mucha. T. a bisa cu absolutamente e no a mishi cu e mucha.
Hues a puntra pakico nan ta bisa asina contra T. Hues a bisa en total tin 4 persona cu ta bisa cu T. a bisa cu el a mishi cu e mucha su pechonan. T. a bisa Hues cu nunca e tabata su so cu e mucha. El a bisa cu ora e yega cas di trabao, e mucha ta cu su señora. Si e mucha ta den su camber, e ta hib’e serca su señora. El a bisa Hues cu e tin 71 aña y e no ta bay haci algo asina. E no ta compronde pakico nan ta bisa cu el a mishi cu e mucha.
Hues a bisa cu esaki lo a sosode diferente biaha. T. a bisa cu no ta asina. Ta asina cu T. tabata traha como sub contratista cu ta haci limpi pa DOW. El a bisa Hues cu nan a kit’e for di trabao door di e caso aki. El a bisa Hues cu tur hende ta jaloers contra di dje, door cu e cu su señora tin 52 aña casa. El a bisa Hues cu door cu media a publica di dje, nan a kit’e di trabao
Demanda di daño: Hues a bisa cu e mama di e mucha a entrega un cantidad di recibonan, calculacion di tratamentonan pero e formulario di demanda mes no ta yena. E mama a bisa cu abogado a pone tur cos den un envelop pa duna Hues na Corte. E mama a bay na mesa berde caminda el a splica Hues kico tur e recibonan ta y e calculacionnan di tratamento. E mama a paga 450 florin caba pa citanan di e mucha na specialista. Ta calcula 3.900 Florin pa e tratamento.
Fiscal ta haya homber culpabel: Fiscal a bisa Hues cu e ta haya legalmente proba cu T. a mishi cu e mucha. T. ta welo di e mucha. Na opinion di Fiscal, apesar cu T. ta nenga categoricamente, tin suficiente prueba. Ta door di juffrouw cu e mucha a conta, a bisa e mayornan y asina e mama a haci denuncia. Fiscal a bisa cu tin declaracion di 3 persona, mama y tata di e mucha y e señora di T., kendenan ta bisa cu T. ta pidi pordon di a mishi cu e pechonan di e mucha pero no a mishi cu su parti intimo.
Fiscal a bisa cu e no ta mira motibo di jaloersi cu lo a haci denuncia. El a sigui bisa cu tambe tin declaracion di e mucha cu ta bisa cu T. a mishi na su pechonan y su parti intimo. Fiscal ta haya cu no tin prueba di penetracion. El a bisa Hues cu e ta kere declaracion di e mucha, cu mas cu 3 biaha T. a mishi cu ne. Fiscal a bisa cu tur e abuso a stop ora cu T. mester a bay haci operacion na Colombia.
Exigi castigo: Fiscal a bisa cu comunidad ta reacciona fuerte riba casonan asina. Caso asina ta sacudi comunidad cu hende grandi ta abusa di mucha chikito. No ta nada straño cu muchanan victima ta keda afecta pa hopi tempo. Fiscal a sigui bisa cu a aumenta castigo pa proteha muchanan pa tipo di casonan asina. Pa cu e castigo, Fiscal a bisa cu e ta tene cuenta cu edad di T. y e condicion di T. El a exigi 20 luna di prison, di cual 10 luna ta condicional cu 3 aña di prueba y bou guia di Reclasering. Pa loke ta demanda di daño, Fiscal a bisa cu e ta fastioso. El a bisa cu mester wak e dañ real y daño inmaterial. Fiscal ta haya acceptable cu e mucha lo mester haya tratamento. El a pidi Hues pa aproba 2 mil florin di daño y declara e resto no admisibel. Esey ta haci cu e mama por haci caso civil. Tambe Fiscal ta haya cu T. mester paga 300 florin y 150 florin cu e mama a paga caba. Fiscal a exigi pa pone medida di pago.
Abogado: Abogado mr. Mohamed a bisa Hues cu T. ta wordo acusa di a abusa di yiu di yiu muher di su señora. Abogado ta haya perculiar ta cu despues cu Juffrouw a bisa e mama di loke a pasa, despues di 1 luna e mama a dicidi di bay haci denuncia. E ta haya cu durante e tempo aki, lo a palabra kico tur ta bay haci y tambe influencia e mucha pa bay duna declaracion. Segun e mucha, ta dos biaha T. lo a mishi na su parti intimo, mientras cu e oma tabata sinta ta lesa corant. Asina e juffrouw di school a bisa e mama. E abogado a mustra cu durante interogacion na KZP, e mucha ta bisa cu e mishimento a sosode 10 biaha y den oranan di anochi.
Na opinion di abogado, esey ta diferente cu loke e mucha a bisa na juffrouw di school y su mama. Pakico ta haci denuncia asina. El a bisa cu e mama y tata ta bisa cu T. a pidi pordon. Ta asina cu T. a pidi pordon. Na Polis el a desmenti categoricamente cu el a bisa cu el a mishi na pechonan di e mucha y no vagina. E abogado a bisa cu T. a pidi pordon pa no daña e relacion cu su señora. El a bisa cu el a pidi pordon si nan ta pensa cu el a abusa di nan yiu. Na opinion di mr. Mohamed, esaki ta comprendibel pero ta straño cu ta bay pidi pordon si no a haci algo. Na Polis T. a desmenti pasobra e no a haci nada. Abogado a bisa Hues cu e ta haya cu tin duda y ta pidi pa declara T. liber. E ta laga na Hues pa dicidi riba demanda di daño.
Fiscal a reacciona cu abogado ta bin cu speculacionnan. E ta haya cu no ta asina cu a dura 1 luna pa haci denuncia pa planea. Fiscal a bisa cu tin caso cu a dura 1 aña of mas promer cu a haci denuncia. Fiscal a sigui bisa cu e declaracionnan ta bisa bon cla cu T. a pidi masha hopi pordon. Tambe tin declaracion di e señora di T. cu tambe ta bisa asina. T. a pidi su señora pordon promer cu el a bay pidi pordon na e mama y tata. E ta haya T. culpable.
Abogado a reacciona cu nunca el a haya caso cu mayornan ta warda 1 luna promer cu haci denuncia. Normal ta di biaha mayornan ta haci denuncia. El a mustra cu e mucha a papia di T. a pidi pordon na su mayornan pero e mes no tabata presente.
Hues a bisa cu e ta sera tratamento di e caso y dia 15 Maart 2024 e lo dicta sentencia.
