ORANJESTAD (AAN): Diaranson mainta despues cu Fiscal a exigi 5 aña di prison pa e trio: A.R.L., R.E.S. di Aruba y e Venezolano I.S.d P., e abogadonan a hiba nan defensa.
Abogado mr. de Hoogd di A.R.L., ta haya cu su cliente mester wordo declara liber pa ambos acusacion.
Acusado a hala atras di “bay busca dama”: Pa cu e promer acusacion, 29 April 2023, A.R.L. a wordo deteni como sospechoso cu Johana Salazara a perde riba laman durante contrabanda dia 22 Maart 2023. E yiu homber di Johana, K., a haci denuncia. Segun abogado, Johana ta un notorio pa bin Aruba ilegal. El a paga 2.100 Dollar. A.R.L. a nenga di bay busca Johana door di su salud. Voluntariamente A.R.L. a hala atras. Despues A.R.L. a papia cu I.S.d P. di e peticion di Johana y cu mester debolbe Johana su placa bek. Johana a rabia y ta I.S.d P. a puntra Johana ki dia e kier bin y I.S.d P. a bay papia cu R.E.S. Na opinion di mr. de Hoogd, no por papia aki di cooperacion manera Fiscal ta pretende pa trece Johana.
Dama no a perde y ta scondi na Aruba: E abogado a sigui bisa cu ora cu Johana a perde, a pidi A.R.L. pa yuda cu e buskeda. E abogado ta kere, mirando cu Johana sa bin Aruba mas biaha ilegal, cu el a landa yega tera y ta scondi na un lugar.
Segun e abogado, tin hende lo a “mira Johana na un fiesta di Venezolanonan”. El a mustra tambe cu R.E.S. a duna Johana salba bida. E abogado ta haya cu no por bisa cu A.R.L. ta complice di morto di Johana durante contrabanda.
Pa loke ta e caso 22 November 2022, tin declaracion di I.S.d P. na Polis cu e no a papia cu A.R.L. pa trece su yiu muher ilegal. E abogado no ta haya cu A.R.L. ta complice di contrabanda di hende. El a bisa cu A.R.L. a bisa Wardacosta, cu el a bay hiba paña di un Venezolano pa hiba Venezuela, pero e boto no a bin. E abogado ta haya cu no por bisa cu A.R.L. a haci contrabanda di hende. E no ta haya exigencia di Fiscal na su lugar. E abogado a pidi Hues pa laga A.R.L. di biaha liber pendiente e sentencia.
Acusado no ta complice: Abogado mr. Banis di I.S.d P. a bisa Hues cu I.S.d P. tin negoshi hiba fruta. Door di pandemia a bay traha cu Grupo 123 y ta ganando bon placa. E tin dos yiu na Venezuela. Tur siman e ta manda placa Venezuela. Esaki te dia cu I.S.d P. voluntario a entrega su mes na Polis. El a perde su asilo. E abogado ta haya cu I.S.d P. a haya suficiente castigo. Pa e caso di Johana e abogado a mustra cu I.S.d P. tabatin contacto cu un persona pasobra A.R.L. kier debolbe Johana e 2100 dollar. Johana no kier accepta y a keda insisti cu e mester bin Aruba.
Segun e abogado, I.S.d P. no ta esun cu a convence R.E.S. pa bay busca Johana. E no ta haya cu aki por papia di complice. E abogado ta haya cu mester declara I.S.d P. liber. Pa loke ta e caso 22 November 2022, den combersacion cu yiu di Johana, K., por tende K. bisa cu I.S.d P. a confia nos cu su yiu muher. Na opinion di e abogado, esey no kiermen cu e ta envolvi den traficacion di hende. El a pidi Hues pa declara I.S.d P. liber di biaha di tur acusacion.
No sa cu dama a bula den lama: Abogado mr. Mohamed di R.E.S. a bisa Hues cu pa loke ta e caso 22 November 2022, no ta conoci con e contrabanda di 6 persona a sosode. A haya R.E.S. cu 6 documento y el a bisa cu el a wordo pidi pa hiba e documentonan aki Venezuela cu ta di hendenan cu a wordo deporta. E no tabata envolvi den contrabanda di hende y mester wordo declara liber.
Den e caso 22 Maart 2023 cu Johana a perde den laman, ta un hecho cu R.E.S. a bay busca Johana y trece Aruba. E abogado a bisa cu Fiscal ta acusa R.E.S. cu door di su culpa, Johana a perde. R.E.S. ningun momento tin culpa cu Johana a bula na awa. No ta conoci si el a yega tera pasobra sino e lo wordo deporta. No por conclui tampoco cu el a fayece. R.E.S., despues di control di Wardacosta, a bay busca Johana cu lo a bula na awa sin cu R.E.S. tabata sa. E abogado ta haya cu mester declara R.E.S. liber.
