Abogadonan di un cantidad di funcionario den Gobierno
- Tambe a pidi pa interoga Marisol Lopez-Tromp
- Kier scucha agentenan tambe di investigacion
ORANJESTAD (AAN): Dialuna mainta tabata e comienso di caso Flamingo, caminda 6 sospechoso mester a presenta den Corte di Husticia. Un Hues di Hulanda a trata e caso cu tabata un “regie zitting”. Por a nota cu di e tres abogadonan, dos a pidi pa interoga Promer Minister Wever Croes.
Un sospechoso no a presenta: Den sala di Corte tabata presente Otmar Oduber di 51 aña di edad, Eisia Esser, Richinella Wever Croes, Jeandrick Oduber yiu di Otmar, Laurence Phillips. E sospechoso Gilberto Tiel no a presenta pero Fiscal a bisa cu ta sigui cu su caso.
Acusacionnan: Fiscal a acusa Otmar Oduber cu entre 2017 y 2020 a duna terenonan na Malmok. Esey ta hiba e nomber caso Malmok. Tambe Fiscal a bisa cu ta acusa Otmar Oduber di trahadornan di Gobierno spirito o sea nunca nan no a presenta pa traha pero ta cobra salario. Ta trata aki di Tiel, Phillips y Hans Geerman. Tambe ta acusa Otmar Oduber di a worde cumpra door di Hans Geerman y Tiel. Fiscal a bisa tambe cu ta acusa Otmar Oduber di a mal usa su funcion como minister door di duna terenonan.
Fiscal a acusa Esser di ta complice di a worde cumpra entre November 2017 y 2020. E a tuma cosnan y tambe e ta worde acusa di a mal usa su funcion.
Richinella ta worde acusa di a falsifica documento relaciona cu dunamento tereno. Phillips ta worde acusa cu entre Januari 2018 y Juni 2020, a malversa placanan. Tiel tambe ta worde acusa di a malversa entre October 2018 y 2020. Tambe cu el a cumpra Otmar door di traha pa Jeandrick.
Jeandrick ta worde acusa di malversacion entre October 2018 y Juni 2020.
Phillips y Jeandrick sin abogado: Hues a puntra Phillips y Jeandrick si nan ta desea di abogado. Phillips a bisa cu e no mester di abogado. Jeandrick a bisa cu e no tin placa pa busca un abogado.
Scucha funcionarionan, Marisol y Minister Presidente: Hues a bisa cu tin investigacionnan haci den e caso aki. Awor ta turno di abogadonan pa pidi si nan kier haci mas investigacion. mr. Carlo a bisa Hues cu e no a haya tempo pa studia tur e documentonan y no por bisa kico e lo kier investiga. El a bisa cu e ta abogado den diferente casonan y no a haya tempo.
E abogado a bisa cu tin un proceso andando den Corte y 15 November 2023, Fiscalnan mester bisa con a yega na informacionnan pa cuminsa investiga.
Scucha agentenan di investigacion: Segun abogado mr. Carlo, por ta cu ta a base di informacionnan falso a cuminsa haci investigacion. Esey ta bira un asunto mas serio contra e team di investigacion. Esey ta trece cun’e cu lo mester declara Ministerio Publico no admisibel.
E abogado a menciona nomber di tres funcionario di e team di investigacion cu e ta pensa cu mester worde interoga pa Hues Comisario.
Cuestiona Marisol Tromp: E abogado a menciona denuncia di Marisol Lopez-Tromp kende a mustra riba Phillips y Tiel cu ta ambtenaar fantasma. Nunca nan a presenta na trabao ni tempo di Otmar ni tempo di Marisol.
- Carlo a bisa Hues cu e kier scucha e miembronan di team investigador, si a investiga loke Marisol ta denuncia ta asina. El a bisa cu Otmar a haci denuncia contra Marisol pa e denuncia haci. Ta asina cu Otmar a haci denuncia contra Marisol pa loke Marisol a haci denuncia.
Interoga cantidad di funcionario: Pa loke ta caso Malmok, e abogado a bisa Hues cu e ta puntra si di berdad a pasa terenonan y a entrega e terenonan. E abogado kier pa interoga diferente funcionarionan di DIP y DOW. Puntra si e casnan tabata disponibel pa entrega. Na opinion di mr. Carlo, tin 16 persona a haya tereno promer cu esnan cu tin derecho di haya tereno. El a splica cu tin un maneho cu esnan promer, cu a pidi tereno, mester worde atendi promer. E 16 personanan cu a bin despues ta haya tereno promer.
Interoga Promer Minister: Abogado mr. Carlo a mustra cu Geerman no tabata traha pa Otmar. El a bisa Hues cu tabatin palabracion politico cu Geerman ta traha pa Minister Presidente, pero a pasa Geerman pa Otmar pasobra no tabatin lugar cerca Minister Presidente.
E abogado a pidi pa interoga Minister Presidente Wever Croes. El a sigui bisa cu tin palabracion tambe cu minister Oduber, caminda hendenan cu ta worde paga door di ministerio di Otmar ta traha pa Oduber. Asina tambe tin palabracion cu Glenbert Croes.
E abogado a bisa Hues cu e kier pa tin un di dos regie zitting, caminda e lo por argumenta tur loke el a trece pa dilanti.
Abogado mr. D. Croes kende a representa Esser a bisa cu e no a haya tempo pa studia tur e documentonan. E tambe a bisa cu tin palabracionnan politico haci y lo ta bon pa haya sa kico esakinan ta. E abogado a bisa Hues cu e ta comparti e peticion di Carlo. E kier pa scucha Minister Presidente Evelyn Wever Croes.
Abogado mr. Odor, cu a representa Richinella, a pidi investigacion di estado mental di su cliente durante e periodo ey. Tambe e kier scucha e funcionarionan di DIP.
Jeandrick a pidi pidi pa scucha su partner di compania y e mama di e partner. El a bisa cu e no a haya e documentonan di e caso. El a splica cu su ex abogado a haya digital y a keda di haya USB. Jeandrick kier haya tur cos riba papel. Hues a bisa cu e abogado mester duna Jeandrick. Jeandrick a bisa cu e kier pa scucha Gilberto Tiel.
Interoga Marisol Tromp: Phillips a bisa cu e kier mesun cu Jeandrick documentonan di e caso y no digital. Hues a bisa cu lo percura USB. El a bisa cu e kier pa scucha Marisol Tromp cu tabata su hefe y tambe Minister Presidente Wever Croes.
Den oranan di merdia, e dos Fiscalnan a duna nan reaccion riba e peticion di e sospechosonan. Hues a bisa cu e ta bay analisa tur cos y Diahuebs e lo duna su decision.
