ORANJESTAD (AAN): Diabierna mainta Fiscal a exigi 6 aña di prison pa e homber Z.R.T. (24),
kende Fiscal ta haya culpable di intento di mata. Z.R.T. a bisa Hues cu e ta para pa loke el a haci dia 25 Januari 2022 dilanti Blue Moon. El a bisa Hues cu e mester a actua contra dos homber cu a saca un arma p’e.
ACUSACIONNAN
E acusacionnan cu Fiscal a presenta ayera mainta contra Z.R.T. ta cu dia 25 Januari 2022, el a purba mata un homber dilanti Blue Moon. Tambe Fiscal ta acusa Z.R.T. di posesion di arma di candela. E otro acusacion cu Fiscal a presenta contra Z.R.T. ta cu riba e mesun 25 Januari 2022, den dia e lo a tira riba un cas den Pindastraat. Fiscal ta haya cu esaki tambe ta intento di mata, pasobra tabatin hende den e cas y bala a bay te den e cas.
TIRAMENTO NA BLUE MOON
Hues a bisa cu 25 Januari 2022, Z.R.T. a tira riba un persona. Segun Z.R.T., dos persona cara tapa a saca arma riba dje y el a tira. El a bisa cu e no a mira e video di seguridad cual Recherche a bisa di lo lag’e mira. Hues a bisa cu riba e video di seguridad por mira Z.R.T. para dilanti 2 persona. Un persona cu Z.R.T. conoce, ta pusha e persona cu un capochon bisti riba su cabez. Despues ta mira Z.R.T. dirigi arma riba dje. Z.R.T. a dal e persona aki cu e arma na su lomba y parti patras cabez. E homber a los y core bay y Z.R.T. e momento ey a los tiro den su direccion y despues a warda e arma den su carson. Z.R.T. a bisa Hues cu tabatin algun persona para ta tira palabra y ora el a puntra kico e problema ta, un di nan a saca arma y arma esaki. E persona cu a lucha contra esun cu capuchon, ta pa kita e arma for di dje.
PASA VIDEO DEN CORTE
Door cu Z.R.T. no a mira e video, Hues ta haya ta bon pa pasa e video den sala di Corte y confronta Z.R.T. cu e imagennan. Z.R.T. a mustra Hues riba e pantaya unda e grupo tabata para y ora el a cruza caminda nan a tira palabra p’e. Segun Z.R.T., el a bay papia cu su amigo C. y e momento ey nan a tira palabra p’e. E momento cu esun cu capuchon a saca arma y arm’e, e amigo C. a bay riba e persona. C. tabata lucha cu esun cu e arma. E ora Z.R.T. a dal esun cu capuchon cu su man. Despues e persona ta core bay y Z.R.T. a tira. Hues y Fiscal ta bisa cu Z.R.T. a tira riba e persona. Segun Z.R.T. e no a tira riba e persona sino unda no tin hende para pa asina spanta e persona. Z.R.T. a bira emocional riba preguntanan di Fiscal y a bisa cu Fiscal no ta compronde pasobra e no tabata den e situacion.
TIRA RIBA CAS
Den Pindastraat, Dakota, tabatin un tiramento 25 Januari 2022. Z.R.T. ta desmenti cu el a tira eynan. Hues a bisa cu un bala a bay den e cas caminda tin hendenan. Hende riba un scooter y un brommer a pasa tira y un di e personanan tabatin cabey rasta. Z.R.T., kende tin cabey rasta, a bisa cu Recherche a bis’e cu e persona tabata bisti na preto siendo cu e tabata bisti cu flanel blanco. El a bisa cu e tin un scooter y door cu tabata Dia di Betico e tabata core den gruponan di brommer. Segun Z.R.T. e tabata na su cas ora e tiramento a sosode. Den oranan di merdia e tabata na Palo Marga pa wak drag. El a bisa cu e tin bon amistad cu esnan den Pindastraat y no tin problema cu nan. El a desmenti di ta of tabata forma parti di un gang. El a bisa cu tur dia e ta den Dakota. El a bisa Hues cu e tabatin un pistool 9 mm y a tir’e afor despues di a tira na Blue Moon pero Recherche no a haya e arma. E tabatin e arma 6 pa 8 luna.
MALTRATO DI POLIS
Z.R.T. a bisa Hues cu e no a resisti contra su detencion manera Polis ta pone. El a bisa cu e kier a core bay pero a wordo deteni. Ora e tabata geboei, Polis a bent’e abao y nan a bati’e. El a bisa cu su cara y mannan tabata rasca mientras cu Polis tabata dal’e cu rudia patras di su cabez. El a pidi Hues pa pasa e video caminda lo por mira tur cos.
Hues a mustra cu na 2016, Z.R.T. a wordo condena na 3 aña di prison pa intento di mata. Hues a puntra Z.R.T. si e tabatin un arma. Z.R.T. a bisa Hues cu e tabatin un arma skerpi. Z.R.T. a bisa Hues cu el a siña cosnan positivo y tabata traha. Riba 25 Januari 2022 el a hay’e den e caso na Blue Moon.
FISCAL
Fiscal a bisa cu Z.R.T. ta admiti di a tira dilanti Blue Moon. Polis a bisa cu Z.R.T. a resisti. Un guardia a bisa cu ta Z.R.T. a tira. Ariba video di seguridad por mira kico tur a pasa. Por mira cu Z.R.T. tabatin un pistool color nikkel y a tira den direccion di e homber cu a core bay. Despues Z.R.T. a bay for di e lugar y a bay tira e arma afor y bolbe Blue Moon caminda el a wordo deteni. Fiscal a bisa cu no a por mira cu ta dos hende manera Z.R.T. ta bisa, lo a saca arma p’e. No por papia aki di defensa propio. Fiscal ta haya cu Z.R.T. por a herida otro hendenan cu tabata para ey banda ora el a tira. Esaki Fiscal ta considera intento di mata mirando cu Z.R.T. a dirigi arma riba e persona y a tira diferente biaha. Segun Fiscal, subsidiario Z.R.T. por a causa herida severo. E no ta haya cu aki ta trata di premedita y a pidi pa declara Z.R.T. liber pa esaki. Fiscal ta haya cu Z.R.T. tabatin un arma den su poder.
NO A TIRA RIBA CAS
Pa loke ta e tiramento na Pindastraat, esaki a sosode algun ora promer cu e incidente na Blue Moon. A haya 3 huls di bala y impacto di bala riba e cas. Nan a bisa cu un scooter color blauw y un brommer a pasa los tironan. Un di e personanan tabatin cabey rasta. A mira cu e arma ta color di nikkel cu ta mesun color di arma cu Z.R.T. a usa na Blue Moon. Fiscal ta haya cu no tin suficiente prueba cu ta Z.R.T. ta esun cu a tira. El a pidi Hues pa declara Z.R.T. liber pa esaki.
Fiscal a bisa cu posecion di arma di candela ta un problema hopi serio na Aruba. Hopi hoben ta cana arma. Ta hopi caso di tiramento ta sosode y hasta matamento. Ministerio Publico a aumenta castigo. Fiscal a bisa cu tira na un lugar publico ta bira un asunto mas serio. El a exigi 6 aña di prison pa Z.R.T.
ABOGADO
Abogado mr. Zara a bisa Hues cu Z.R.T. a tira na Blue Moon pero no tabatin intension pa tira mata e homber. E ta haya cu aki no por papia di intento di mata sino menaza cu arma. Pa loke ta e caso na Pindastraat, door cu tabatin e caso na Blue Moon, Polis ta pinta Z.R.T. tambe den e caso aki. Z.R.T. a bisa cu e hendenan den Pindstraat ta su amigo. El a desmenti categoricamente di a tira den Dakota. Mr. Zara ta comparti opinion di Fiscal, cu mester declara Z.R.T. liber pa esaki.
Pa loke ta resisti contra detencion, e abogado a bisa Hues cu el a mira riba video con un grupo di Polis a maltrata Z.R.T. formal mientras cu e tabata geboei. Z.R.T. tabata kier a core bay y tabatin un bebida den man cu a basha riba Polis. Esey e abogado no ta considera resisti contra detencion. E ta haya e castigo exigi pa Fiscal ta mucho halto. El a pidi Hues pa tene cuenta cu e edad hoben di Z.R.T. Hues a sera tratamento di e caso y a bisa cu e ta bay studia e caso y 22 Juli 2022 pa 10’or di mainta lo tin sentencia.
