Hopi mucha tabata spijbel pa bay uza droga scondi --- ORANJESTAD (AAN) – Un trio cu tabata dedica nan mes cu bendemento di droga a presenta dilanti Hues. A resulta cu e trio aki, tabata bende droga hasta cu studiantenan di school.
E acusacion cu Fiscal a presenta den Corte contra e hombernan F.K., N.P. y J.L.R. ta di bendemento di cocaina y marihuana desde Mei 2020 te cu Juni 2021. F.K. tabatin tambe pildernan XTS y cultiva matanan di marihuana.
J.L.R. a bisa Hues cu entre Mei 2020 y Maart 2021, e tabata bende pa F.K. y tabata haya marihuana pa propio uso di F.K.
N.P. a bisa Hues cu e ta calcula 7 pa 8 luna el a bende pa su ruman F.K. Segun N.P., un biaha so el a bende cocaina. Hues a remarca cu den e tas berde cu N.P. ta uza pa bende droga a haya 1 gram di cocaina. El a bisa cu e no sa con esaki a yega den su tas.
Segun F.K., na 2020 el a cuminsa y no 2019 manera ta acus’e. El a bisa cu despues a pidi N.P. y J.L.R. pa yuda. E tabata bende tambe XTC. El a desmenti di tabata bende cocaina. Segun F.K. tin biaha ora sa sali cu muhernan cu ta uza cocaina cu nan. Por ta el a laga e gram den e tas.
PLANTACION
F.K. a bisa cu el a cuminsa cu 15 mata den su camber na October 2020. Despues ora nan a bira mas grandi, a bay hinca nan den un container. El a bisa Hues cu coriente a sali hopi halto y e matanan a bira malo y muri. E no a logra haya cosecha. Na e cas ey entre December 2020 y Januari 2021 a corta awa y coriente. Door cu e tabata keda na cas di su partner, a keda 5 pa 6 luna sin paga nada. Despues el a paga e gastonan.
POLIS A HAYA DROGA NA CAS
Hues a mustra cu segun e relato di Polis, Polis a haya informacion cu na cas di F.K. ta bende droga. Polis a bay haci investigacion y …bingo. A haya cosnan cu tin di haci cu bendemento di droga den e cas. Total a haya 143.9 gram di marihuana, 11.6 gram di hash, 1 gram di cocaina, 9.1 gram di pilder. Ta asina cu Polis a interoga diferente hende cu a bisa di a cumpra for di N.P. for di October 2020 y N.P. ta entrega e droga.
BENDE DROGA CU STUDIANTE
Investigacion a mustra cu F.K. tabata bende droga na school cu muchanan menor di edad. Hues a bisa cu agentenan di droga a scucha un mucha kende a bisa cu F.K. ta manda menu di droganan pa hende scoge. Hende ta manda WhatsApp y asina haya droga. Hasta tin un personal trainer cu tabata cumpra droga. Hopi ta bisa cu e droga ta wordo hiba cerca nan.
SPIJBEL PA USA DROGA
Studiante di school a bisa cu hopi mucha ta spijbel pa bay uza marihuana y XTC. Tin hende ta hiba e droga pa e muchanan na school y na school e muchanan ta uza droga scondi.
F.K. a bisa Hues cu un biaha tres mucha a bay cumpra. E no a ripara cu ta studiante pasobra nan no tabatin uniform bisti. El a bisa Hues cu e no tabata entrega droga na school. E ta kere cu ta otro lo ta duna e muchanan y e muchanan ta tira culpa riba dje.
TABATA HACI ENTREGA DI DROGA
N.P. a splica Hues cu e ta uza cellular di F.K. caminda hende ta haci pedido pa droga. El a bisa cu e tabata yuda su ruman F.K. bende droga. F.K. tabata huur auto pa parti droga. N.P. a bisa cu e tabatin droga den e tas berde den auto. El a palabra cu F.K. cu cada biaha cu e entrega droga e ta trece e tas bek y kita 50 florin. N.P. y F.K. tabata prepara e droganan. Tur dia ta hinca e droganan den tas y N.P. tabata pisa e droga y hinca den saco di plastic. El a bisa cu riba un bon dia por gana 600 florin.
J.L.R. a declara cu e tabata cumpra for di F.K. Hues a mustra cu J.L.R. a bisa cu el a mira plantacion den camber di F.K. y dos biaha a haya cosecha y bon calidad. Na dado momento el a cuminsa bende pa F.K. E tabata haya 25 florin y marihuana na balor di 25 florin. J.L.R. tambe tabatin un tas berde y tabata hiba pa hende. E ta laga e placanan den e tas pa F.K. El a bisa cu el a bende mas o menos 1 aña pa F.K.
Hues mustra cu F.K. a declara na Polis cu el a cuminsa na 2019 pero como su pareha no tabata kier, el a stop. El a bende mas o menos 1 luna pero masha tiki pasobra no conoce hende. El a uza e marihuana pa su mes. Na 2020 nan a separa y F.K. tabata coy trabao di haci cura limpi. Cos no a cana bon y el a cuminsa bende atrobe y tabata haci entrega pa no tin hende ta bin su cas y no molestia bisiña. E tabata huur diferente auto pa haci entrega di droga.
CASTIGO
Hues despues di a scucha e exigencia di Fiscal y defensa di e abogadonan, a dicta sentencia di biaha pa N.P. y J.L.R. Hues a condena J.L.R. na 175 dia di prison, kitando e tempo cu e ta sera den KIA. N.P. a wordo condena na 18 luna di prison di cual 6 luna ta condicional cu un tempo di prueba di 2 aña.
Recien Hues a dicta sentencia contra F.K. y a conden’e na 40 luna di prison di cual 6 luna ta condicional cu 2 aña di prueba.
