ORANJESTAD (AAN): Diabierna mainta Hues a dicta sentencia den e caso penal contra e hoben Z.C., y e homber A.S.
Ambos ta wordo acusa cu riba 13 Juli 2020 a purba mata e homber H. Tambe nan ta wordo acusa di posecion di arma di candela entre 22 Juli 2019 y 12 Augustus 2020. Ta asina cu Hues a declara Z.C. liber di tur acusacion mientras cu A.S. a wordo condena na 2 aña y 8 luna di prison. Hues ta hay’e culpable di a tira dos biaha cu un revolver riba cas di H. caminda tabatin mas hende den e cas.
EXIGENCIA DI FISCAL
Algun siman pasa tratamento di e caso a tuma lugar caminda Fiscal ta haya cu tin suficiente prueba cu A.S. a tira riba e cas. E auto cu A.S. a usa pa tira riba e cas ta e auto di oma di Z.C. Tin imagennan di video di seguridad caminda ta mira e auto ta core varios biaha ey banda. Z.C. a bisa cu el a huur e auto na A.S. y tabata sa masha bon kico A.S. tabata bay haci. A haya 7 diferente potret di arma riba cellular di A.S. Tin un potret di un arma den man y a compara e tattoonan cu esnan na A.S. y nan ta identico.
Fiscal no ta haya proba pa A.S. y Z.C. intento di asesinato y tampoco intento di mata. E tironan tabata na halto y esnan den cas tabata den un camber cu no ta serca di e impactonan di bala. Fiscal si ta haya proba, cu A.S. a menaza y tabata den posecion di arma di candela. Fiscal a bisa cu e no ta haya cu Z.C. ta complice di e tiramento pero si complicidad di arma y auto cu a facilita A.S. Fiscal a exigi pa A.S. cu ta blo keda desmenti, 3 aña di prison y pa Z.C. 360 dia di prison di cual 168 dia ta condicional cu un tempo di prueba di 2 aña y bou guia di Reclasering. Esey ta nifica cu Z.C. no mester bolbe bay sera. Fiscal tambe a bisa cu e auto confisca por bay serca e oma.
SENTENCIA
Via video conferencia Hues a bisa e sentencia pa A.S. cu tabata na KIA mientras cu Z.C. tabata presente. Hues a bisa cu e acusacion ta cu riba 13 Juli 2020, A.S. a purba kita bida di H. of menace y poseccion di arma candela. Hues no ta haya proba intento mata H. pero si proba cu A.S. a menaza H. y su mama y su yiu door di tira cu e arma 2 biaha riba cas di H. Tambe Hues ta haya proba cu A.S. tabatin un revolver y bala den su poder. Na opinion di Hues, esaki ta un caso hopi serio. A tira riba un cas caminda tin hendenan ta biba aden. Esaki ta trece hopi angustia no solamente na e cas sino den e bario. Hues a condena A.S. na 2 aña y 8 luna di prison.
Pa loke ta Z.C., Hues a bisa cu e ta comparti opinion di Fiscal y abogado cu no por considera Z.C. complice di a tira riba e cas. E no tabata hunto cu A.S. y pesey Hues a declara Z.C. liber. Hues a mustra cu e discusion den Corte ora di tratamento di e caso tabata, si Z.C. ta complice door cu a facilita e auto y arma. Z.C.. a bisa den Corte cu mas biaha el a fia A.S. e auto cu ta di Z.C. su wela. 13 Juli 2020, el a fia e auto na A.S. pero no tabata sa cu A.S. lo usa e auto pa bay tira riba e cas. Hues a bisa cu for di investigacion no por conclui cu Z.C. a fia e auto cu e meta cu A.S. lo tira riba e cas. Pa loke ta e arma Fiscal ta haya cu Z.C. a facilita arma na A.S. y como tal Z.C. ta doño di e arma. Den whatsapp Z.C. ta papia di “mi gun”. Hues a mustra cu den Corte Z.C. y anterior a bisa cu e revolver no ta di dje. El a expresa “mi gun” pasobra a fia A.S. 1600 florin y probablemente A.S. a cumpra un arma cu esaki. E tabata kier e placa bek sino e arma cu A.S. a cumpra cu e placa cu el a fia. Hues ta haya cu den whatsapp ta splica di e fiamento di e placa y e gun. Esey ta nifica cu e arma no tabata di Z.C. y no por a facilita A.S. e arma. Esey ta nifica cu Z.C. no ta complice di posecion di arma di candela. Hues a declara Z.C. liber di tur acusacion. E auto lo wordo debolbe na e oma.
