Deadline lo ta 30 di April venidero -- ORANJESTAD (AAN): Bon noticia sigur for di GLW Foundation, como cu nan ta den pleno preparacion pa Miss Teen Aruba International 2022.
E aña aki celebrando 13 aña di eleccion unda cu durante añanan Miss Teen Aruba International a sa di demostra cu e comision ta traha den e mihor formacion di e candidatanan. Sin lubida e logronan durante e ultimo 15 añanan aki cu George Winterdaal como Presidente pa e prueba di e trabao cu e candidatanan.
Paisnan unda e candidatanan di Aruba a bay ta Rep Dominicana, Panama, El Salvador, Bahamas, Guatemala, Costa Rica, Nicaragua, Honduras, Bulgaria y mas. Desde cu George a tuma e presidencia di Miss Teen Aruba y despues Miss Teen Aruba International a usa e lema “Algo mas cu un certamen di beyeza” y tur aña ta organiza diferente proyecto.
GLW Foundation ta organiza e.o Cupcake di Speranza, Un man pa nos ruman, Feed the Kids y tambe un sin fin di actividadnan caritativo cu e candidatanan. E commission organizador ta sigur prepara e candidata cu tur equipo necesario pa asina por yude den su desaroyo pa futuro.
Inscribi awor: Si abo tambe kier participa, inscribi awor! DIARIO a haya sa cu e aña aki GLW Foundation a haci algun cambio masha interesante. Nan a amplia e categorianan y awor ta duna mas hoben e chens pa por participa.
E biaha aki lo tin categoria Petite (Miss Teen Petite Aruba International) pa hobennan di estatura abao te cu maximo 1.63 meter.
Tambe lo tin categoria Regular (Miss Teen Aruba International) cu ta pa e hobennan di estatura riba 1.63 meter.
Lo tin categoria Plus (Miss Teen Aruba Glorious International) esaki pa e hobennan cu tin curva (estatura no ta importante).
Bo tin e edad di 15 pa 19 aña? Bo tin gana di biba un experiencia unico? Bo kier representa Aruba na nivel international? Wel esaki ta bo chens pa participa.
Gastonan: Hopi biaha e preocupacion di Mayornan ta e gastonan halto cu no necesariamente ta asina. Mirando e situacion, comision organizador mes ta cubri basta cos di e candidata, basicamente e unico gasto ta e trahe di gala cu no necesariamente mester ta un shimis demasiado costoso paso e trahe no ta saca e candidata.
E candidatanan lo ricibi di e commission organizador diferente Polo Shirts di Miss Teen Aruba International cual ta ser usa pa e diferente actividadnan. Tambe ta importante pa menciona cu pa anochi final no lo tin Trahe de Baño pero Trahe Deportivo cual tambe e candidata ta ricibi esaki di e comision organizador, ademas e candidata ta ricibi su zapato.
Si cualkier mayor ta desea mas informacion por yama libremente George Winterdaal na 561-6151 y asina por ricibi tur informacion y detaye. Deadline pa inscribi ta 30 di April 2022.
DIARIO a compronde cu e final di Miss Teen Aruba International lo tuma lugar diadomingo 17 di Juli den Cas di Cultura.
