Sector di Water Sports a keda basta perhudica
ORANJESTAD (AAN): Desde cu e pandemia a presenta su mes, y te cu awor cu poco poco turismo a cuminza recupera, toch ainda e sector di Water Sports ta sufriendo hopi.
“Deporte Aquatico actualmente na Aruba no tin bida,” ta loke Sergio Maduro a declara Diaranson mainta durante un conferencia di prensa convoca riba Plaza Turismo na Linear Park.
Esaki durante un conferencia unda a denuncia cu ainda CDC di Merca tin e isla di Aruba poni riba e Lista Cora di ‘Very High’ y ta desonseha viaheronan pa bishita Aruba, no obstante cu e casonan activo di Covid-19 a cay bastante.
Sergio Maduro ta traha den turismo pa e sector di Deporte Aquatico, y na nan opinion tin hopi turista ta yegando, pero no esnan di ‘calidad’ cu ta gasta placa.
Pa tur e añaan cu el a traha na lama, esaki ta e prome dos aña unda practicamente cu nan ta bayendo bancarota.
“Ami como doño di Fun Under The Sun Watersports Aruba practicamente ta pensa cu dos luna so mas mi por wante,” Maduro a indica. Si practicamente den dos luna no bin cambio, e lo tin di haci esey.
El a bisa cu e turistanan cu yega beach, awendia ta hasta bin cu nan mesun stul y mesun parasol. Esey ta e berdad cu nan como operador di Watersports tin di biba cune.
Ya tin 3 negoshi di Watersports na Palm Beach cu a cera caba, y kizas esun di Sergio Maduro lo bira e number 4, pero tin di bay mira con e situacion ta bay sigui.
Maduro a admiti cu Watersports no ta un actividad barata, y esey ta bin debi na varios factor. Uno di nan ta e prijs di combustible cu ta keda subi, aunke toch e prijs na Aruba ta hopi competitivo.
Por ehemplo na Merca, un “paseo” cu Parasail pa bula 7 minuut ta costabo US$90. Na Aruba, e paseo aki ta costabo US$ 60 y bo ta bula 12 minuut.
Bo ta huur un SeaDoo na Miami y e ta costabo US$ 150 pa 30 minuut. Na Aruba nan ta paga US$ 75 pa 30 minuut. Un paseo riba Banana Boat na Miami ta costa US$ 60 pa mey ora. Na Aruba e mesun paseo ey riba Banana Boat ta US$ 25.
Si combustible ta sigui subi, esaki ta kibra bo entrada.
Antes Tour Bus ta yega y trece turistanan na e Watersports na Beach. Pero awor e Tour Busnan ta yega beach cu nan mesun stul. Esaki tambe a kraak e operadornan di Watersports. Antes nan tabata huur como 50 stul promedio pa dia. Awor na 2022 si acaso nan huur 5 stul mes pa dia, e lo keda hopi contento.
Na opinion di Maduro, enberdad awor Aruba ta hayando cantidad di turista bek, pero e no ta e “calidad” di turista.
