ORANJESTAD (AAN) – Recientemente, “Xavier University School of Nursing” a cera un acuerdo cu “Thomas More University” na Mechelen, Belgica.
Un acuerdo cu ta encera un intercambio di studiantenan di Xavier University y Thomas More, pa alomenos un trimester.
Tabata presente señor Karel Matthijs y señora Cindy Heremans di Tomas More University, di Mechelen, Belgica, y Frank Croes di Xavier University.
Frank Croes, den entrevista cu DIARIO, a expresa, cu di parti di Xavier University, nan ta sumamente contento cu e acuerdo cu nan a logra cu Thomas More University, di Mechelen, Belgica.
El a menciona cu esaki ta un instituto top reconoci na Europa, pa entrenamento di nursenan y Xavier University a wordo pidi, door di gobierno, pa purba yega na un curso di Nursing cu ta adecua, y comparable, cu e Bachelor Degree Mericano.
“Nos kier tambe wak con por hinca aden e parti di Hospital cu cual nos tin un bon entendimento, y nan kier mira aden tambe e parti di esnan bon na Europa. Pues nos kier pa balansa nos curriculum, di e manera cu e ta sirbi nos Hospital, den nos sistema, miho. Asina ta, cu fuera di haya e diploma Mericano nan lo tin tambe den nan estudio e partinan bon di Europa, y cu esey nos a logra un tremendo acuerdo cu Thomas More University di Mechelen, na Belgica”, Frank Croes a expresa.
Croes a agrega cu incluso nan ta bay intercambia studiantenan, unda esnan di Aruba por bay un trimester na Thomas More University, naturalmente bao guia di Xavier University, pero nan ta wordo guia na scol na Mechelen, unda cu nan ta bay haya un parti di nan estudio.
Xavier University ta den crecemento y nan tin cu sigui bay dilanti y yega na e Bachelor Degree y mientras tanto tambe studiantenan di Thomas More University tambe por bin haci nan estudio na Xavier pa un trimester, por ehemplo, bao guia di nan universidad. Esaki pa mustra bon cla, con tur dos instituto: Thomas More University y Xavier University ta duna estudio di mes calidad, cu ta apto pa Merca, Europa y sigur Aruba.
“Y specialmente pa nos Hospital cu cual nos tin bon entendimento y unda cu e Academia di Hospital tambe ta tuma ‘back up’ e idea aki, pa nos haya bon calidad di enfermeranan na Aruba”, Croes a reitera.
Frank Croes a menciona cu Gobierno ta otorga awo, fianza di estudio na esnan cu kier studia na Xavier University, y door di esey e hobennan graduado cu ta califica, por bay traha, y reforza nos Hospital. E opleiding aki ta dura cuater aña.
“Hospital a bisa nos bon cla cu pa nan e aspecto mas urgente y importante ta, con pa tene nan pashentnan stabil. Pesey nan kier enfermeranan di calidad, pasobra e docternan nan support, mester di e nursing cu ta duna e cuido cu ta garantiza e stabilidad pa e pashentnan. Pesey, e acuerdo aki nos por considere e di tres parti di Hospital su Academia, y hunto cu e Instituto Thomas More di Belgica y cu Xavier University, nos tin un triangulo cu nos por garantiza estudio di calidad y mañan, graduadonan califica pa nos hospital y pa e otro Institutonan na Aruba.
