Director WGK Gino Goeloe:
ORANJESTAD (AAN) – Den entrevista cu DIARIO, director di Wit Gele Kruis, Gino Goeloe, a duna di conoce cu, en principio, dia 28 di Juli ultimo e Institucion aki a cumpli 65 aña di ta sirbiendo comunidad di Aruba.
El a indica cu Wit Gele Kruis ta un Stichting cu a wordo funda na Hulanda na aña 1930, na unda Soer y Pastornan Catolico a mira un necesidad na Hulanda, e tempo ey, pa cuida e pobernan.
“Te dia di awe, Wit Gele Kruis tin e meta ey pa cuida nos hendenan, di nos babynan te nos grandinan. Di Hulanda WGK, e tempo ey, a bay Belgica na unda nan a funda Wit Gele Kruis, y di Hulanda WGK a bay Curacao y di Curacao a bin Aruba, y di Aruba a bay Sint Maarten. Un cos bunita ta cu di Belgica, WGK a bay Rumania y Bucharest. Pues, nos tin partners tur parti di mundo”, Gino Goeloe a comenta.
El a expresa cu Wit Gele Kruis no ta un institucion di Aruba so, pero e ta internacional. “Dus, nos coleganan na Curacao a cumpli 81 aña, aña pasa, nos coleganan na Belgica cu a cumpli 100 aña, dos aña pasa. WGK na Belgica ta un fundacion hopi, hopi grandi di 7 mil empleado. Curacao tambe WGK tin 250 empleado. WGK Sint Maarten hasta tin un Behaardentehuis cu tin mas di 40 aña, y nan tin e cuido di baby na cas cu tambe tin mas di 40 aña existente. Esun na Rumania ta e di mas jong cu tin mas di 35 aña di existencia”, Goeloe a trece dilanti.
El a agrega cu akinan por wak cu e Wit Gele Kruisnan ta internacional, y el a splica cu e Cruz blanco cu geel, por wak den tur nan autonan den e paisnan menciona. “Dia cu nos a cumpli 50 aña di aniversario, nos a invita tur e Wit Gele Kruisnan di e tempo ey, nan a bin y nos a forma nos lazonan y cada tres luna nos tin contacto y nos ta manda e-mail pa wak kico di nobo tin, loke ta algo hopi bunita”, Goeloe a indica.
