Diadomingo 4 di Februari KWF ta cumpli 63 aña di wordo funda:
*Ta spera cu 2024 ta un aña hopi miho cu 2023
ORANJESTAD (AAN) – Den conferencia di prensa, e presidente di Wilhelmina Kanker Fonds (KWF), señora Lillian Prins (Lilly) a cuminza expresando cu e ta spera cu 2014 lo ta un aña hopi miho pa KWF, CU 2023, na momento cu nan ta bay recauda fondo, den e comunidad Arubano.
Prince a subraya cu e gastonan di KWF a bira sumamente halto, pero nan no ta perde e confianza den nos comunidad cu nan por logra e suma necesario, cu mester pa por sigui run Wilhelmina Fonds.
El a reitera cu e personal cu ta traha cu KWF tur ta boluntario. Nan no ta ricibi cent pa telefon, ni gasoline, ni nada otro.
“Nos ta traha boluntario pa comunidad Arubiano y muy en particular pa pashentnan y nan familiarnan, cu tin di haber cu e malesa di cancer. Nos yudanzanan ta sali gratuito pa tur persona cu ta inscribi na Wilhelmina Fonds, cu tin cu haya sea nan tratamento na Oncologia of na ImSan pa radioterapia, pa bay nan specialista ora cu nan tin cu haya nan chekeo cu mester prome cu nan haya nan tratamento. Tur e gastonan aki Wilhelmina Fonds ta cubri nan, y pa e pashent e ta gratuito”, Prince a indica.
Lilly Prince a recorda cu dia 4 di Februari proximo (Diadomingo) ta 63 aña pasa cu Wilhelmina Fonds a wordo funda, oficialmente, aki na Aruba, aunke e ta existi y ta activo for di 61 aña pasa.
“Nos ta gradici nos bon Dios cu te dia di awe, e fundacion aki ta lora. Y nos no por keda sin bisa un palabra grandi di gradicimento pa e comunidad Arubano cu semper a sa di apoya Wilhelmina Fonds den su trabaonan, cu ora cu nos sali riba caya anualmente, nan ta haci nan donacion”, Lilly Prince a menciona.
El a señala cu aña pasa tabata un di e añanan mas dificil pa Wilhelmina Fonds, apesar cu riba diasabranan nan a sali varios biaha riba caya, pero nan a logra recauda net 35 mil florin.
“35 mil florin, shonnan, ta net dos luna cu nos paga cierto gastonan, muy en particular ora cu bo tin e verpleegsternan, cu ta atende cu pashentnan na cas. E atencion aki ta gratuito na e pashent, e famia tin nada di paga. Pero Wilhelmina Fonds si mester percura pa e tin fondo pa cubri e gasto sikiera di gasoline di e verpleegsternan cu ta duna e atencion na e pashentnan. Pesey e aña aki, un biaha mas, nos ta cuminza for di aworaki na avisa e Comunidad Arubano, cu e Luna di April nos ta bay cuminza cu nos campaña. Naturalmente, nos tin cu adapta nos mes na e situacion mundial cu tin, y e situacion local”, Lilly Prince, Presidente di KWF a señala.
