E decision pa cambio na Hulanda cu impacto mundial
- Dificil pa Reino Hulandes ignora resultado eleccion Hulandes
- Paisnan di Reino y Europa ta confronta un futuro nobo
ORANJESTAD(AAN)- E desaroyo cu DIARIO a anuncia durante ultimo siman, a transforma su mes den e realidad nobo di politica na Hulanda, cu directamente lo afecta tambe e Gobierno di Reino y Europa.
Na momento cu Mark Rutte a dicidi cu Gobierno Rutte 4 lo baha, tabata evidente cu Hulanda tabata den antesala di cambionan grandi.
E caida di Rutte tabata resultado di un Gobierno cu a wordo forma na 2022 cu hopi problema pero no a soporta e peso di gobernacion den situacionnan sumamente dificil.
E Pueblo Hulandes pa basta dia ta expresa su mal contento cu e resulta den crecemento di e partido relativamente nobo di Boerburgerbeweging y e entrada di e partido di Pieter Omzigt, cu a bira Nieuw Sociaal Contract.
Na nan entrada ambos partido nobo a priminti di a bira un sorpresa electoral, pero no a sabi di cristalisa e loke un grupo grandi di votador Hulandes tabata spera den e situacion social nobo na Hulanda cu durante gobernacion di Mark Rutte a conoce un caida social enorme.
E crecemento di pobresa na uno di e paisnan mas rico na mundo y e forma cu necesidadnan basico di mucha, famianan, ancianonan, pues henter e comunidad Hulandes no tabata presente manera mester tabata, a acumula den ansia pa cambio.
DIARIO na forma continuo a relata desaroyonan cu a marca e crecemento di BoerBurgerBeweging durante e eleccionnan pa Eerste Kamer y gobiernonan regional na Hulanda, mescos cu e nacemento di e partido di Pieter Omzigt cu a priminti di bira e dirigente di cambio grandi.
E siman aki Pueblo Hulandes a bay urna electoral den un situacion cu segun informantenan di DIARIO na Hulanda y paisnan Europeo entre otro, mester a wordo vigila manera DIARIO a mustra su lectornan.
E motibo di atencion grandi pa e eleccionnan na Hulanda ta sconde den e realidad cu tanto e futuro di Reino Hulandes como di Europa ta depende awor di e forma cu Hulanda ta atende cu e realidad, cu e no por ignora.
Mientras tur partido na Hulanda a mustra cu nan lo no traha cu Geert Wilders, cu ta conoci pa su posicion ultra derechista, nacionalista pero tam intransigente riba cierto partinan, a resulta cu nan negativo pa traha cu Wilders awor a pone nan den un situacion serio pasobra no por ignora e decision di Pueblo Hulandes.
E eleccion di Geert Wilders na forma abrumador ta nifica cu tur partido na Hulanda, Reino Hulandes y Union Europeo mester biba cu e realidad di e resultado di loke Pueblo Hulandes a dicidi.
Den esaki mester mira cu por ehempel Wilders ta oponente di e idea di Union Europeo.
Den formacion di un Gobierno Hulandes mester mira e realidad di formacion di un Gobierno nobo di Reino, cu mester ta basa riba resultado di eleccion cu a wordo gana pa Wilders cu (manera ultimo informacion a mustra ayera) cu 36 asiento cu ta 11 mas cu e siguiente partidonan riba lista cu a haya participacion den Parlamento Hulandes.
No por pone Geert Wilders sin mas un banda como formador di un Gobierno Hulandes nobo ni como e proximo Prome Ministro di Hulanda y alabez e dirigente di Gobierno di Reino, cu ta dicidi pa Aruba tambe.
E realidad den Tweede Kamer lo mester bini dilanti den e Gobierno nobo Hulandes, cu hunto cu e Ministronan Plenipotenciario di Aruba, Curacao y Sint Maarten, lo forma Gobierno di Reino.
Segun costumber awe e resultado di eleccion formamente lo wordo anuncia y Geert Wilders lo mester ricibi e encarga di formador di e Gobierno nobo di Hulanda y Reino.
