ORANJESTAD (AAN) – Manera ta conoci e Asamblea Mundial di Salud 2021, ta tumando lugar den formato virtual,
desde dia 24 di Mei te cu 1 di Juni 2021. DIARIO ta tumando nota di dje, pasobra locual sosode eyden, e resultadonan, tambe ta concerni nos region, nos pais.
Esaki ta e di 74 Asamblea Mundial di Salud den cual lo enfoca riba e urgencia di yega na fin di e actual pandemia di Covid-19, y preveni e proximo pandemia door di construi un mundo mas sano, sigur y husto.
E Asamblea di Salud (AMS) ta e maximo organo di WHO (Organizacion Mundial di Salud) den e tumamento di decisionnan, y e ta conta cu participacion di delegadonan di henter mundo. Durante su di 74 Asamblea Mundial aki, e lo ta habri pa tur su miembronan asocia, observadornan, representantenan invita di Nacionnan Uni, organizacionnan intergubernamental, y NG’s.
Diasabra cu a pasa, esta 22 di Mei, AMS ta señala den un publicacion, cu e casonan di Covid-19 a multiplica 40 biaha, te cu a yega na 162 miyon di caso na henter mundo, mientras cu e cantidad di morto a multiplica 11 biaha te supera e 3.3 miyon di fayecido.
AMS ta señala cu e pandemia a golpia duramente, tur pais di mundo, pero ta laga sinti su impacto cu mas forza den e comunidadnan cu ya caba tabata vulnerable, cu ta mas expone na malesa, cu tin menos probabilidad di tin acceso na servicionan di atencion di salud di calidad, y cu tin mas probabilidad di sufri consecuencianan adverso, manera perdida di ingreso financiero, crea door di e medidanan aplica pa contene e contagio.
Na inicio di e Asamblea Dr. Tedros Adhanom Ghebreyesus, Director General di WHO a expresa: “Un crisis sa saca e miho di e personanan y e organizacionnan”, agregando: “Desde e Plan Estrategico di Preparacion y Respuesta di OMS hasta nos orientacionnan tecnico, e Ensayo di Solidaridad, e Grupo Tareas di ONU tocante e Cadena di Suministro, e Plataforma di Aprendizahe di www.openwho.org., e iniciativanan manera e acelerado di acceso na e hermentnan contra Covid-19, incuyendo su alianza cu COVAX, y e Fondo di Respuesta Solidario, e Organizacion Mundial di Salud a proporciona e paisnan hermentnan eficaz, basa riba e evidencia pa preveni infeccionnan, scapa bida y mantene e servicionan esencial di salud.
Mi ta specialmente orguyoso di e trabao increible cu e personal di WHO a realiza na henter mundo den e ultimo 17 lunanan pa yuda e paisnan pone den funcionamento, e hermentnan aki”.
No obstante, e pandemia ta leu di caba y e contesta mundial ta haya su mes den un fase critico. E desigualdad den materia di vacuna ta un di e problemanan di mas urgente pa resolve ya cu ta sugeri un menaza pa e esfuerzonan pa pone fin na e pandemia y pa e recuperacion mundial: mas di 75% di tur e dosis di vacuna a worde administra den solamente 10 pais; e paisnan di ingreso mas abao a administra menos cu mitad di e porcentahe di e dosis mundial.
“E Asamblea Mundial di Salud 2021 lo hunga un papel fundamental den e configuracion di e arkitectura mundial di salud di futuro, y e fortalecimento di WHO pa e cumpli su mision y mandato”, Dr. Tedros a subraya.
