Directora di Santa Rosa ta conseha comunidad pa cumpra webo local:
*Pa sostene e produccion di webo local ta stop di importa webo bruin
ORANJESTAD (AAN): Manera ta conoci, prijs di webo a bira halto. Esaki ta trece cu ne un situacion fastioso pa e consumidor.
Nathalie Maduro, Directora di Santa Rosa a splica cu webo ta un di e poco productonan local cu tin un ley di proteccion riba dje. Locual Economische Zaken a haci pa sostene e produccion di webo local ta stop di importa webo bruin.
El a sigui bisa cu aworaki na momento cu un cliente ta cumpra un webo blanco, e ta un webo di afo. Tin varios criador di galiňa cu e proposito di produccion di webo cu ta activo. Loke Santa Rosa ta conseha comunidad ta pa purba di cumpra webo local.
Maduro a bisa cu nan ta consciente cu e produccion di webo local no ta abasteciendo henter comunidad, sinembargo, ta recomenda pa purba cumpra webo local pasobra esaki ta mas barata cu e webonan di afo.
E directora di e Departamento di Agricultura y Pesca a agrega cu hopi biaha ta haya e industria hotelero cu ta esun cu ta haci pedidonan grandi di webo. Nan por haci uzo di webo importa pasobra nan tin capital pa haci'e.
Importante ta pa e residentenan por yega na e webonan local, cu ta un tiki mas barata, y asina ta sostene e productornan local, placa no ta bay afo, a indica.
Segun Maduro, mester tene cuenta cu pa tin un cantidad di galiňa tin cierto factornan manera tin un tereno cu ta apropia pa haci esey. Si bo ta un persona cu ta consumi hopi webo, bo por cuminsa cu un criansa chikito di galiňa pa bo propio consumo. Mester tene cuenta pa esaki no bira un molester pa bo bisiña.
Gobierno ta bezig cu un instituto financiero pa pone fondonan disponibel pa proyectonan agrario. Tur esaki ta den plan y e bon ta cu ta wak alomenos cu tin un plan, a manifesta. Tin un structura y sa kico ta e limitacionnan y ta reconociendo tambe kico ta e potencialnan pa Aruba.
A sigui bisa cu tin biaha ta depende di e hendenan cu ta keda realisa cu no por keda depende di importacion. No por bay produci tur cos y den esey mester ta realistico.
