Director di WEB ta ok pa Hotelnan bin cu Solar Panels
- Proyectonan grandi di solar den negoshinan mester ta ‘regula’
- Tin di corda cu motornan RECIP tin nan down-time pa mantenimento
ORANJESTAD (AAN): Manera cu DIARIO a trece dilanti den edicion di Diaranson, cu desde comienso di aña caba, entre WEB Aruba NV y Hotelnan tin un sorto di Plan cu a wordo acorda riba dje, unda cu den cualkier caso di debilidad den produccion di coriente, cu e consumidornan grandi aki lo tuma accion riba nan tereno, pa reduci consumo, y esaki ta inclui tambe pa e Hotelnan start cualkier generator cu nan por tin. Di e forma ey ta salba WEB Aruba NV di recuri na ‘Load Shedding’ cu por nifica cu cierto bario lo keda sin coriente pa 2 of 3 ora, y despues ta switch pa otro barionan keda sin coriente.
E motibo pakico WEB tabata tiki debil na luna di Mei cu a pasa, ta debi cu un motor di RECIP di nan a sufri incidente cu candela na luna di April, y varios factor mas. Y e Plan cu Hotelnan a demostra cu e cooperacion a yuda perfectamente y a evita cu problema di coriente a escala e anochinan ey.
Den un entrevista cu Alfredo Koolman, director di WEB Aruba NV, a puntr’e riba posibilidad cu Hotelnan tambe lo por inverti den e.o. Solar Panels pa asina yuda un tiki den reduci consumo di energia produci na Balashi.
Segun Koolman, nan como compania estatal den e viahe pa haci Aruba mas duradero, cordando cu e ‘National Energy Policy’ ta indica cu e porcentahe di energia renobabel mester ta na 50% na aña 2030, nan semper ta apoya cu comunidad y negoshinan tambe ta bin cu iniciativanan duradero, incluyendo panelnan solar.
Teniendo cuenta cu tur esaki, toch WEB Aruba NV ta sostene energia renobabel, pero toch tin di keda sigura cu e red di coriente na Aruba keda stabil. Pasobra e momento cu ta bin cu inyeccion di ‘diferente’ fuente di energia duradero, si bo no tuma medida e lo por destabiliza e red y ponebo keda sin coriente.
Anto e discusion ey tin di wordo hiba conhuntamente, pa asina palabra ta kico por of no, y loke tin di bay limita, of introduci medidanan pa sigura cu ta keda cu un bon voltahe, cu bon coriente di bon calidad y cu ta suficiente pa cumpli cu demanda.
Koolman a agrega cu como compania estatal, e momento cu bo tin demanda halto asina, e uso responsabel di energia sostenibel na negoshi of cas, ta pone cu na e planta tin di percura pa tin extra capacidad, y e forma con ta bay incorpora tur esaki, lo wordo haci ora di bay regula e proceso. Esey ta algo cu ainda no tin ainda na Aruba. Siendo cu e isla ta uno caminda generacion di coriente ta isola, y tin di bay mira con ta deal cu esaki.
Parke Solar Gigantesco: Segun Alfredo Koolman di WEB Aruba NV, e pensamento di e compania ta pa haci algo mas grandi pa cu energia solar, pero na nivel industrial. Deseo di WEB ta pa bin cu un parke grandi di Solar Panels. Esaki e ora por alivia WEB na Balashi cu su uso di motornan RECIP.
Tin di corda cu e motornan aki tin di ricibi nan mantenimento segun un schedule, y ta bira fastioso ora di bay haci esey, net ora cu tin hopi demanda pa coriente.
Pero cu un Parke grandi di Solar Panels, caminda coriente ta wordo warda (“almacena”) cu bateria, y si acaso diripiente tin produccion debil den oranan di anochi cu momentonan piek di demanda, e ora por ‘inyecta’ coriente di e baterianan aki den e red di coriente, pa asina evita cu tin di bay cu Load Shedding.
Segun Koolman, esey ta algo importante cu nan a avisa recien den un reunion teni cu hunta di Asociacion AHATA, cu WEB ta uno ta pro pa otronan tambe haci nan contribucion door di busca energia sostenibel, pero semper y cuando cu esaki wordo haci na un forma ‘regula’. Asina por garantiza cu lo keda mantene e nivel di servicio, y calidad como tambe cantidad di coriente cu ta aceptabel pa tur hende.
