Na Curaçao
WILLEMSTAD: Oficialnan di Wardacosta di Caribe Hulandes, hunto cu Polis y demas autoridadnan competente lo bay haci controlnan riba lama y costanan di Curaçao, durante e conocido evento yama ‘Fuikdag 2024’.
Nan a splica cu meta di e controlnan aki ta pa garantisa cu personanan ta mantene nan mes na e medidanan cu Gobierno di Curaçao a stipula pa e dia aki, y pa mantene ordo publico durante Fuikdag 2024. Wardacosta ta informa doñonan di botonan di placer, ‘charterboats’ y seadoo pa tene cuenta cu e reglanan cu ta valido pa Fuikdag.
A base di e medidanan, no ta permiti benta di alcohol durante Fuikdag, no ta duna permit pa musica publico riba vlot of podium, tur boto cu ta participa na e evento mester tin nan documentonan valido di nabegacion. Tambe mester tin suficiente vest di salbabida abordo conforme e cantidad permiti di pasahero, ademas artefactonan apropia di señal y fluit mester tey abordo. Lo tin control riba tur e rekistonan aki di boto door di ‘Haven en Veiligheid Inspectie’ y Wardacosta. Ademas Servicio di Bombero lo efectua control pa loke ta cendemento di candela abordo di boto pa prepara Barbecue. Despues di 5’or di atardi no ta permiti pa sigui toca musica y despues di 5’ or di atardi lo bay tin controlnan na bahianan pa evita aglomeracionnan na beach.
No ta permiti e asuntu di hiba y trece hende, cu otro palabra hende cu tin nan propio boto so por yega Fuikbaai. E medida aki ta necesario pa motibo cu hendenan cu tuma cabe’i boto ta keda pega na Fuikbaai sin por yega Caracasbaai mas. Consecuentemente nan ta purba cana via tereno priva di Santa Barbara pa yega ciudad. Tur esaki unicamente ta contribui na mas caos y como tal no ta keda tolera.
Tur boto cu ta bin di otro pais y bin bishita Curaçao ta obliga di pasa Inmigracion y Aduana pa ‘klaar in’. Autoridadnan encarga cu mantenimento di
ordu publico lo atende debidamente contra tur esnan cu no tene nan mes na e medidanan menciona.
