Gino Goeloe, Director di Wit Gele Kruis
*Pasadianan ta bay habri den diferente bario
ORANJESTAD (AAN): Director di Wit Gele Kruis, Gino Goeloe a indica cu e foro do adulto mayor a bay tremendo y a discuti tocante e tema di embehecimento.
A duna di conoce cu e 'wachtlijst' ta riba 100 persona cu ta wardando pa drenta cas di cuido, den e caso aki SABA. Tin basta cliente/pashent den un crisis y esey ta algo cu Wit Gele Kruis a wak for di basta aña.
A midi e 'vergrijzing' for di basta aña cu e lista di espera y ta contento cu den e foro di aña pasa y esun ultimo a duna di conoce cu tin cosnan concreto cu ta bay pasa, Goeloe a señala.
El a sigui bisa cu el a compronde cu e cinco pasadianan ta bay bira algo concreto den diferente bario y esey ta algo di aplaudi. Minister Ursell Arends a duna di conoce cu e pasadianan ta bay bin. E aña aki algun ta bay habri.
Un pasadia ta hopi importante pasobra tin adultonan mayor na cas y no tin ningun actividad cu nan por haci of interactua cu otro persona di nan edad. Pesey a yega momento pa tuma accion.
Gino Goeloe a laga sa cu e Comision di Cuido ta reuniendo pa bin cu plan di un maneho. E plan di maneho ta cu mester mas nurse na WGK. Por papia di 20 nurse mas pa por duna cuido na cas.
Tin hopi hende na cual no por duna e cuido pasobra no tin nurse. Actualmente tin 21 nurse riba mas di 100 mil persona cu ta biba na Aruba cu yudando e pashentnan di WGK. E cantidad ey ta mucho tiki y ta algo cu a ser treci dilanti den diferente ocasion, cu tin cu amplia e cantidad di nurse cu ta duna cuido na cas. Y banda di esaki kier pa e grandinan keda na cas tambe, Goeloe a duna di conoce.
