Analisis di un furia di masbango cu tribon sabi kier guli
- Evelyn a haci posibel pa ainda Aruba por papia di BTW of BBO
- Na 2017 ningun hende tabata sa kico wea lo a mata den futuro
ORANJESTAD(AAN)- Pa analisa e situacion actual na Aruba, mester mara rabo di un pushi na rabo di un baca.
Pa ta honesto, e problema mas grandi cu e situacion actual conoce ta, cu tur hende kier papia, tur hende kier wordo scucha, pero ningun hende kier scucha loke nan mester scucha pa asina ora nan papia, nan sa kico nan ta papia.
Remarcabel den e situacion actual ta, cu Aruba ta papia di BTW of BBO, mientras na 2013 ya e situacion di Aruba tabata papia di RIP, cu ta “descansa na paz”.
Ora analisa loke tur hende ta papia, sin pues comprende di kico nan ta papia, mester conclui cu Evelyn Wever-Croes como Prome Ministro a percura cu awe Aruba por discuti kico e kier pa futuro, loke na 2017 no tabata posibel pasobra no tabata tin futuro.
Na 2017 e situacion financiero y economico di Aruba tabata asina malo, cu hasta e cayman na boca di rio, Mike Eman, a bay sconde cuatro aña largo.
El a despedi cu awa na wowo como lider di partido, lider di tur cos y no a tende di su persona mas mientras Aruba tabata puntra su mes kico lo pasa cu Aruba.
E situacion actual ta exigi sinceridad y seriedad.
Si mira cifranan, for di 2013 Aruba tabata den problema financiero mortal manera tur e gremionan cu a expresa nan mes den “Economisa”, a trece dilanti.
Gabinete Mike Eman tabata tremendo pa su mes. Hasta Mike a logra cu mientras e ta na bida, ya nan a skirbi un buki riba su bida.
Ta bon mes cu nan a haci esaki e tempo pasobra despues…..mihor ban papia di e regalo cu el a trece for di Cuba, cu ta Citgo.
Hopi hende na Aruba a kere cu nan ta bira Sheik ora Citgo yega. Nan a baila, nan a canta, mientras Aruba tabata den agonia.
Tur compania a kere cu nan ganashi lo a subi y ta celebracion tras di celebracion tabata tin tambe cu cada proyecto PPS, cu mester a paga despues (cu ta awe).
Mike a uza apertura di brug pa e celebra su “happy birthday” gratis, pero ora eleccion a entregue e mensahe final, el a desaparece.
Un Pueblo sin rumbo a keda atras.
Si no tabata pa e hecho cu Aruba ta parti di Reino, Florin lo a muri.
Evelyn Wever-Croes a wordo pone na timon di e pais. El a tuma medida. El a actua y esaki a haci cu ora Covid-19 a paralisa Aruba, e pais no a zink.
Ora situacion a drecha, Mike a aparece atrobe den publicidad.
El a bolbe bira lider di su partido. El a priminti cu un dia e lo bolbe drenta Parlamento, loke a pasa despues cu e no a haya suficiente voto pa bolbe bira Prome Ministro.
Aruba a surpasa Covid-19. Crisis petrolero mundial a cuminsa. Guera di Ukraine a cuminsa.
Den un situacion di hamber rond mundo, Aruba ainda tin suficiente fondo financiero pa sindicatonan exigi pa paga nan tur nan placa y deshaci di tur medida di austeridad.
Esaki ta nifica cu Evelyn Wever-Croes a haci cu Aruba a sobrevivi tempestad cu ni sikiera Merca ta anuncia cu el a sobrevivi.
Cu mester aumenta entrada di Aruba y sigui baha gasto, tur hende sa. Cifranan ta papia. Pero pa un hende sabi algo, e mester kier!
Evelyn Wever-Croes a papia cu gremionan. El a reuni cu gremionan. El a laga haci estudionan cu ta demostra cu ta mihor aumenta BBO y no bini cu BTW loke ta di acuerdo cu loke gremionan a bisa cu nan kier.
Dificil comprende kico mester wordo alcansa cu e furia di masbango actual, aunke Mike ta un hende talentoso y sa con brasa y sunchi tur hende.
Conclusion ta pues, cu Evelyn Wever-Croes tin hopi pacenshi. Conociendo oportunidadnan cu ta habri rond mundo pa un persona capaz manera Evelyn Wever-Croes, cualkier hende lo a subi avion y bay gana bon placa den un empresa internacional, sin dolor di cabez cu drecha loke Mike a laga atras, ta nifica!
