ORANJESTAD (AAN): Den fin di siman durante e actividad di Mercado di Santa Rosa, e personal a ricibi e grato bishita di e viuda di un politico cu a haci hopi pa agricultura di Aruba.
Pa Santa Rosa, tabata un honor pa a ricibi señora Maria Leo-Croes, viuda di nos tata di Agricultura y pionero di nos Departamento di Agricultura, Cria y Pesca, Sr. Daniel Leo q.e.p.d.
Despues di hopi aña, Señora Leo-Croes a bin bishita Santa Rosa y por a aprecia di mira locual su defunto esposo a establece hopi decada pasa.
Daniel Leo tabata un persona cu stima agricultura, y a traha duro pa Aruba a haya forma pa tur agricultor y criador di bestia por a cuminsa cana den mesun direccion, ricibiendo hermentnan necesario. Daniel Leo su vision pa yuda no djis agricultor y esnan cu ta cria animal, sino tambe yuda e piscadornan.
Fuera di esey, Daniel Leo tabata un motor grandi tambe den promocion turistico, y aki tambe el a goza di hopi admiracion. Sin lubida e forma ferviente cu e tabata defende su idioma Papiamento, y esey ta algo cu DIARIO ta corda hopi.
Cu e bishita di señora Maria Leo-Croes, cu hopi entusiasmo el a comparti su anecdotanan y su experiencia propio como yiu di un Cunukero cu a lanta den Criansa di bestia, y despues a casa cu un visionario pa Aruba su Sector Primario. Aki por mire hunto cu directora Nathalie Maduro, kende a gradici señora Leo-Croes inmensamente pa bishita nan Mercado. Tabata presente tambe Carola Geerman di Santa Rosa.
