Mientras e pais ta na caminda pa record di eleccion den un solo aña
*Den porta di inicio di aña escolar nobo den temporada di horcan
*Medidanan pa controla arma a wordo tuma pa evita mas incidente arma
ORANJESTAD(AAN)—Kico ta pasa na Sint Maarten? Esaki tabata e pregunta cu tanto hende tabata haci nan mes, despues di problemanan serio cu a wordo registra na e pais, caminda ayera a cera cu e informe cu autoridad a tuma medidanan serio pa controla e cantidad di incidentenan arma cu ta tuma lugar na e pais.
Segun informacionnan importante cu for di inicio di ayera a cuminsa drenta na DIARIO, un situacion sumamente peligroso ta presenta su mes na e pais, caminda na e districto cu ta wordo yama Dutch Quarters, medidanan pisa a wordo tuma relacion cu e cantidad di tiroteo cu ta word registra,
Autoridad for di ayera den horanan di atardi tin e permiso, pa examina kico hende ta transporta.
Esaki ta parti di e medidanan cu a wordo tuma, mientras e isla ta prepara pa su tercer eleccion na 2024 dia 19 di Augustus 2024.
Informacionnan cu DIARIO a ricibi for di ayeramainta ta indica cu e problema na Sint Maarten no ta basa riba politica, cu riba su mes tambe ta basta turbulento y a haci cu publico na Sint Maarten despues di a deposita su voto ya na dos occasion na 2024, mester bolbe urna electoral.
Ta den e situacion special aki, ya e isla a conta cu asistencia di otro cuerponan oficial pa seguridad personal di tanto habitantenan di Sint Maarten mes como personanan cu ta bishita e pais.
Manera a wordo presenta ya na lectornan di DIARIO, pa motibo di e eleccionnan cu lo tuma lugar na Sint Maarten, asistencia di Defensa Militar estaciona na Aruba, tambe a wordo duna na Isla Aruba.
Di otro partinan di Reino tambe, Sint Maarten a ricibi sosten pa controla orden na e pais caminda medidanan special mester a wordo tuma ayera.
Sint Maarten cu ta depende di turismo pa su economia, sigur no ta wordo beneficia cu e instabilidad cu ta presenta su mes na e pais y cu ta kita e stabilidad nacional pero tambe ta bira amenaza pa hende.
E situacion na Sint Maarten na e tempo di aña aki, ya ta wordo influencia dor di pasashi di horcannan den un temporada cu ta duna prueba di ta sumamente peligroso.
Cu regreso di muchanan pa school despues di vakantie grandi, e normalidad di bida tambe lo mester a wordo logra na caminda tambe pues di eleccionnan cu pa nan cantidad na 2024 ta duna indicacion di instabilidad.
Sinembargo, den e caso aki ta wordo papia di e problema serio cu e pais tin cu gangnan y circulacion di arma cu a wordo uza publicamente na varios ocasion ultimo tempo.
Mantencion di orden y seguridad na e momento aki ta sigur vigente na Sint Maarten, caminda na lugarnan publico control di polis asisti pa militarnan di diferente parti di Reino den region di Caribe, mester atende cu e situacionnan peligroso cu a presenta su mes na Dutch Quarter.
E desaroyonan a bini despues cu recientemente a detene tambe personanan cu ta atende cu asuntonan di Immigracion na Sint Maarten a base di supuestamente un atake di un persona.
Informacionnan ta papia di un situacion sumamente tenso na Sint Maarten cu tin atencion total di no solamente Cuerpo di Polis di e pais pero tambe asistencia special di Defensa di Reino pa asina evita incidentenan serio cu por presenta.
Cu bida normal na Sint Maarten a wordo suspende y un situacion serio ta presente ta bini dilanti den tur informacion preocupante cu ta alcansa DIARIO y cu ta indica cu na caminda pa e tercer eleccion na 2024, Sint Maarten conoce hopi tension causa pa gangnan cu lo no tin preferencia politico pero si lo ta representa peligro serio pa comunidad.
Kico e situacion actual lo haci pa Sint Maarten cu como destinacion turistico ta central den atencion di publico, lo por bira e pregunta grandi pa poblacion di e pais, cu ta aspira trankilidad.
