Advertencia na publico
ORANJESTAD (AAN): Tene cuidao! E ta simplemente un ‘scam’ diseña pa saca placa di bo. Y abo keriendo cu di berdad tin ordo di detencion contra bo. DIARIO ta na altura cu desde aña pasa caba nan ta manda e mensahe aki na Ingles, Frances, Italiano, y awor tambe na Hulandes. E ta un scam, caminda e personanan tras di e acto fraudulento aki ta gañabo cu bo ta envolvi den algo, y nan meta ta pa spantabo, y despues extorsiona placa di bo!
Esey ta loke e oficina di National Central Bureau for Counterterrorism, Security and Interpol (NCTVI) na Aruba tambe a confirma.
Funcionarionan di NCTVI a ricibi varios informe den e ultimo dianan di personanan cu a ricibi un mensahe via e-mail cu un carta den e anexo di e Agencia Policial Europeo EUROPOL of INTERPOL den cual nan ta worde acusa di transmiti pornografia di mucha.
E carta ta firma pa un supuesto “Alto Comisario” di e Cuerpo Policial estranhero of uno di Aruba. Investigacion a revela cu e mensahe di e-mail aki ta completamente falso.
Storia full falso: E carta, cu ta skirbi na Hulandes, ta bisa cu Agentenan di departamento di criminalidad cybernetico a proba cu e recipiente di e email a intercambia imagennan indecente riba internet cu menornan di edad.
Esun cu ricibi e carta den su inbox, ta ser pidi pa tuma contacto cu e Alto Comisario menciona den e carta, lo mas pronto posibel, pa medio di un adres di e-mail di un Gmail account cu no ta e-mailadres profesional. Nan ta bin cu e storia cu si esaki no tuma luga den 24 ora, e texto conclui cu un ordo di detencion lo worde emiti den contra di e recipiente.
Ta bon pa menciona cu polis of institucionnan hudicial nunca lo comunica tocante un investigacion den un forma asina. Ademas, e informacion menciona den e carta definitivamente no ta corecto.
NCTVI ta sospecha cu e criminalnan tras di e e-mail aki, lo ofrece un proposicion pa descarta e caso a cambio di un suma considerabel di placa.
NCTVI kier a enfatisa, cu si den caso tal ricibi un e-mail asina, pa por fabor sea asina bon di delete e e-mail aki mesora y no duna respuesta riba esaki.
Si tin mas pregunta of inkietud, esnan di NCTVI den Vondellaan 19 lo atende bo libremente.
