*Hotelnan a confronta mas di 600 cancelacion - ORANJESTAD (AAN): Minister di Salud Dangui Oduber a indica cu por a tuma nota cu di e 40 fayecidonan cu tabata tin na Aruba desde1 di Juli te cu 31 di Augustus,
85% di esnan cu a fayece no tabata vacuna, 15% si tabata vacuna, pero nan tabata sufri di otro condicionnan fisico.
Por mira tambe con e variante Delta a bin ta afecta turismo. A mira cu turismo a crece substancialmente den luna di juni, juli y tambe augustus. Y ya caba a cuminsa mira e efectonan di e variante Delta tin riba turismo.
Segun Oduber, a experencia un caida di 15 mil turista den luna di Augustus. Inicialmente a proyecta cu ta bay ricibi 100 mil turista den luna di augustus, pero a wordo confronta cu e variante Delta y esaki a ocasiona cu a ricibi 15 mil turista menos.
Por mira tambe cu e ocupacionnan na hotel tambe a conoce un reduccion di entre 3 cu 5 porciento.
E mandatario a bisa cu por conclui cu e variante Delta a afecta e recuperacion turistico di Aruba bastante. A mira tambe cu hopi grupo a cancela nan reservacion pa Aruba den luna di Augustus y September. Ora un grupo cancela no ta reemplaza e cancelacionnan aki facilmente.
Ta papiando akinan di mas di 600 cancelacion di personanan cu tabata cla pa bishita Aruba y a dicidi pa no bin pa motibo di e situacion.
VACUNATHON
Oduber ta enfatisa e importancia pa haci uso di e oportunidad pa presenta na e Vacunathon awe diasabra y mañan diadomingo na e Ballroom di Ritz Carlton Hotel.
Esaki ta pa tur esnan cu a haya nan prome shot pa pasa haya nan di dos dosis, ya sea diasabra of diadomingo. Tambe e invitacion ta bay pa esnan cu ainda no a vacuna pa acudi na Ritz Carlton. Acudi cu bo carchi di AZV of bo Aruba Health App. E ta habri pa tur persona riba 12 aña, Minister Oduber a indica.
E dia aki lo tin e vacuna di Pfizer y Johnson & Johnson disponibel. Esnan cu kier Johnson & Johnson mester pidi pa esaki. Ta importante pa remarca cu Johnson & Johnson ta disponibel solamente pa adultonan, di 18 aña bay ariba. E no por wordo duna na hende muher na estado, asina Jurette Croes, vocero di Departamento di Salud a señala.
Muchanan entre 12 te cu 18 aña lo haya solamente e vacuna Pfizer, a remarca.
