Sue Ann Lee ta splica:
ORANJESTAD (AAN) – Sue Ann Lee, Decano di e Facultad di Hospitalidad y Turismo di Universidad di Aruba, den entrevista cu DIARIO relaciona cu nan celebracion di Dia Mundial di Maestro, el a duna di conoce cu aworaki tin lesnan ta wordo duna den un “formato hybrid”, unda nan ta traha cu nan partnernan internacional tambe, sea di Hulanda of Merca.
“Tin cu nos tas haci cu teaching, otronan nan ta bin dos siman na Aruba, of nan ta duna les online via nan mesun cas of di nan facultad eynan, y bo ta wak cu esaki tambe ta trece cu ne un dinamismo. Kiermen, e parti digital ta importante, y nos ta deal akinan cu studiantenan jong, pero tambe cu studiantenan cu a bin bek pa sigui nan opleiding. Esey ta duna cu e ora ey, bo tin cu wak tur expectativa eynan, pasobra nos ta duna un combinacion di lesnan atardi, lesnan anochi, pa studiantenan jong tin les mainta, kiermen kico ta funciona”, Lee a comenta.
E parti digital, el a agrega, ta pasobra nan kier duna e les online pero na mesun momento kier trece aden e parti social cu ta importante ainda den educacion, e cosnan di trabao den futuro pa siña comunica y socializa cu bo coleganan.
“Kiermen, esey tambe ta un parti cu nos ta wak, y naturalmente, e parti digital ta bin cu inteligencia artificial cu tambe ta un reto grandi pa nos, pasobra e industria, unda cu bo wak, tambe ta bisa ‘prepara bo studiantenan pa por traha cu inteligencia artificial. Pues, nos tin cu wak con nos ta prepara nan y con nos mes ta adapta n’esey, pasobra e no ta bay cambia”, Sue Ann Lee a remarca.
E desaroyonan aki ta bay sigui crece, e docente y decano a expresa. E docentenan, constantemente, mes sa kico ta e trends cu tin pa nan por incorpora nan den nan lesnan.
