Consul General di Venezuela:
ORANJESTAD (AAN) – Manera ta conoci Diadomingo awo, dia 28 di Juli 2024, tin eleccion Presidencial na pais bisiña Republica Bolivariana de Venezuela.
Den e contexto aki, DIARIO a entrevista e Consul General di Venezuela na Aruba, señora Anabel Lugo, ken a splica cu duna di conoce cu tur e preparativonan ta tumando lugar segun e cronogram estableci pa e Conseho Nacional Electoral, cual ta e Organo Rector den e area di procesonan electoral.
Lugo a indica cu den e exterior, te ora nan habri e cahanan electoral nan lo no sa cual ta e cantidad di lectornan cu ta inscribi, of cu no ta na Aruba mas y no por eherce nan voto den e eleccionnan aki.
El a agrega cu, sinembargo, den e eleccionnan anterior a vota 132 elector, cu tabata inscribi den e Registro Electoral di Aruba.
Segun e normativa di e Conseho Nacional Electoral esnan cu ta apto pa vota den e eleccionnan presidencial di Venezuela ta tur persona mayor di 18 aña y den e exterior, specificamente, mester ta inscribi den e Registro Electoral di Aruba pero cu e condicion cu mester tin un residencia permanente, comproba, pa tin derecho di voto den e exterior.
Unico rekisito pa participa den e votacion, ta cu mester tin e cedula di identidad lamina, no fotocopia ni gescan. Mester ta original, y por ta venci, pa eherce e derecho di voto. Mester aparece inscrito den e buki di votacion.
Venezolanonan cu ta na Aruba indocumenta, pues cu no tin un permiso legal di estadia, no por eherce e derecho na e voto, ni esnan cu a renuncia na e nacionalidad Venezolano. Esnan cu tin passport Hulandes pero cu no a wordo manda na renuncia nan nacionalidad, por eherce e voto, pero esnan cu a wordo envia pa renuncia no por eherce nan voto.
